Mizo National Front
General Headquarters
Mizoram : Aizawl

Press Release

ZPM KALPHUNG CHU KAN TI ANG, AN TIH CHU KAN TI LO ANG, AN TIHNA ANG ZEL A NI – K. LALRINLIANA,Ex-Minister & Adviser, MNF

Vawiin ni 12.07.2024 Zirtawpni hian Mizo Hnam Run-ah Chhung inkhawm neih a ni a, Pu K Lalrinliana Ex minister leh Adviser MNF ni bawk chuan thusawiin, ZPM sorkar kal dan demawm a tih thu sawiin, an sorkar hma a an intiam ang lo zela khawsa an nih thu sawiin, kan ti ang an tih chu kan ti lo ang, an tihna ang zela a ngaih thu a sawi a ni.

Pu Rintea chuan, ZPM sorkarin an in sawi angin hmunphiah chingtute Agency kal tlangin Hmunphiah lei sak a tiam a, Hmunphiah chingtute nasa taka an buai laiin, Mizoram Chief Minister chuan, “he thilah hian sorkarin thiam loh a nei lo, agent-te thiam loh a ni, kan tuar tlang a ni ber’ a ti chuan Chief Minister chu mawhphurhna la ngamlo a nih zia a tilang a ni, Agency te mawhpuh lo a, kan lo ti dik tawk lo a ni, ti ngam se a duh thu a sawi bawk. Tin Contractor hnaah nasa taka an mite induhsakna a awm thu sawiin, a thawk tur dik tak ten thawk lo in duhsak zawng an inpek nasat thu a sawi bawk. Sum inrenchem a, tanlak tum si, nasa takin an ti Lapse a, changkan aiin hniam lam kan pan zel a ni, a ti. Kan ti lo ang, an tih hi chu kan ti zel ang, an tihna ang tluk a ni, a ti.

Supply Minister ni mekin, VIP Quata a tihtawp anga a sawi chungchangah, VIP quota chu Congess sawrkar lai atanga tihtawp a nih tawh thu sawiin, ‘kan sawrkarah khan Buhfai, Chini, Khawnvartui leh Gas ah VIP quota pakhat mah a awm tawh lo, kan titawp vek tawh a ni’ a ti. Card var hmangte tan buhfai man tihsan chungchang pawh, Finance lam atangin tih san rawtna a awm na a, mirethei leh harsa zawkte dinhmun ngaihtuah chungin tihsan a nih tak loh thu a sawi bawk a, Central Ministry nasa taka kan dawrna te min hriatthiam pui zelin tito lovin kan sem chhunzawm thei a ni a ti. Sorkar hmasa thil tha tih pawh ZPM sawrkar chuan anmahni hmalakna ang maiin an puangzar hreh lova, an sawrkar hnua thil thalo lam thlengah erawh Sawrkar hmasa an mawhpuh zar zar thung a, thudik hria mipuite an zahlo hle a ni, a ti.

Chhung inkhawm hi Pu H.B. Lianmunga, Adviser MNF chuan kaihruaiin, Pu Biakchungnunga Jt. Secretary Gen. MNF Gen. Hqrs, chuan hunserh a hmang a ni.
Sd/-
(LALTHAKIMA)
Joint Secretary
Media & Publicity Deptt
Mizo National Front
No. 130/2024;Dt.12.07.2024

JUNE 28. 2024 -REMNA NI LAWMNA MZP-IN A SIAMA PU LALDUHAWMA, MIZORAM C.M THUSAWI DIKLO SAWI FIAHNA

Mizo National Front
Genetal Headquarters
Aizawl, Mizoram

Press Statement

JUNE 28. 2024 -REMNA NI LAWMNA MZP-IN A SIAMA PU LALDUHAWMA, MIZORAM C.M THUSAWI

DIKLO SAWI FIAHNA
June 28, 2024 Remna Ni lawmna MZP-in a siamah Pu Lalduhoma, Mizoram C.M chu thu sawi tura sawm a ni a. Chutah chuan thu dik lo engemaw zat a sawi a. A vaia sawifiah dawn chuan a sei lutuk dawn avangin a pawimawh zual bik tlem chauh kan han tarlang a ni.

1. ‘India sawrkar ruahmannain Ni 15. 8.1975 khan Pu Laldenga te chu Pakistan atangin ruk chhuah an ni a, Geneva-ah an kal’, tiin a sawi a. Pu Laldenga staff te leh India Sawrkar aiawhte hi foreign-ah vawi tam tak a hma hian an inbe tawh a, Chumi kal zelah chuan India Sawr- karin Pu Laldenga ngei hi biak an duh ve tawh avangin August ni 15, 1975 ah Pu Laldenga, Pi Lalbiakdiki leh Pu Zoramthanga te chuan Karachi atangin Beirut, Istanbul kal tlangin Geneva an thleng a, India Sawrkar nen chuan an inbe ta a ni. Engti kawng mahin ruk chhuah an ni lo.

2. Pu Lalduhoma hian ‘Chumi zul zui chuan India Sawrkar leh MNF ten Remna Thuthlung hmasa zawk an sign ta a. 1976 July ni 1 ah Shillong-ah an sign a. Hei hi Shillong Accord kan tih thin kha a ni. Hetih lai hian kan Chief Minister Pu CH. Chhunga nen Shillongah kan awm ve reng a ni’, tiin a sawi leh a. Hei hi dawt chiang tak a ni a. MNF leh India Sawrkar hian eng lai mahin Shillong Accord hi Shillongah an sign lo. (Naga ho erawh kha chuan Shillong Accord awmze nei zui ta lo kha vawi khat chu an sign). ‘Chutih lai chuan Chief Minister Pu Ch Chhunga nen Shillongah kan awmn ve reng a ni’ a han tih phei hi chu dawt chiang leh zual a ni. July 1, 1976 ah India Sawrkar leh MNF te chuan inbiakna chhunzawm zelna tura tihtur tulte sawiin Joint Press Statement Delhi-ah an siam a ni. Engtik lai mahin India Sawrkar leh MNF te hian Shillongah inremna an siam lo hrim hrim a. Chutianga thil awm hauh lo ni si ‘chutih lai chuan Pu CH Chhunga nen Shillongah kan awm ve reng a ni,’ a han ti te hi chu dawt chiang tak mai a ni tih, mitinin i hre vek ang u.

Han sawi belh ila, Pu Lalduhoma hian Remna thuthlung ziah a nih chungchang leh remna kawng India leh MNF in a zawh lai chanchinah hian thu leh hla engemaw zat a puangzar tawh a, a pawl awmna a sawn apiangin a thusawi a dang zel tih theih deuh thawin thu a ngah a. A engber nge rin tur hriat har tak tak anni hlawm.

Heng bakah hian finfiah leh mai harsa chiah te, ngun zawka han chhuia dawt nisi hi awihawm deuh deuhin Pu Lalduhoma CM hian a sawi fo thin a. Tunhma lama a sawi kha chu mi pakhat thusawiah a ngaih mai theih laiin, tunah chuan Mizoram Sawrkar Lu berah a thu tawh a. Thudiklo sawi hi a rem tawh lovah kan ngai a, abik takin Remna Ni lawmna a Zirlai tam tak, rilru thianghlim hmaa dawt a sawi mai khan, a sawi awihtuten, thil diklo kha thudik emaw tiin an hriatreng tawh tur a nih avangin vawiinah hian thudik tarlan tula hriatna avangin kan han puangzar ta a ni.

Issued by Media & Publicity Department
Mizo National Front, General Headquarters
Aizawl, Mizoram
Dt. 9.7.2024

AN INSAWI LOH DAN HLIRIN ZPM SAWRKAR CHU AN AWM.-Er. K. Lalsawmvela, General Secretary, MNF

Mizo National Front
General Headquarters
Mizoram : Aizawl

Press Release

AN INSAWI LOH DAN HLIRIN ZPM SAWRKAR CHU AN AWM.-Er. K. Lalsawmvela, General Secretary, MNF

Vawiin July ni 08, 2024 (Thawhtanni) hian Mizo Hnam Run chhung inkhawm neih a ni a. Er. K.Lalsawmvela MNF Gen. Secretary chuan thusawiin, ZPM Sorkar chu Mipui sawrkar inti chung siin, an insawi loh dan hlirin an awm, a ti.

Er K.Lalsawmvela chuan, Tuna kan Sawrkar hruaitu Super CM inti Pu Lalduhoma leh a hote hian Inthlan hma khan thu tam tak sawiin, nasa takin an intiam a. MNF leh Congress -in kum 36 chhung min hruai tawh a, heti zawng hi kan ni, tiin, Sawrkar hmasate kha engmah ti lo, chhe lailet derin an sawi a. Thil kalphung pangngai a an tih theih loh tawp tur kan hriat reng pawh ti tura intiamin, Kalphung thar, MNF nilo, Congres nilo Sawrkar min enchhin rawh u, tiin Serafim State din tur hial angin an intiam a nih kha. Mahse an insawi loh dan ang zelin an awm a, ZPM Sawrkar CM chuan portfolio a nei lovang a, Minister chaklo deuhte dawm kangin a pui kual ang, a ti a. Works dept. a chang lovang tiin an sawi danglam leh a. Mahse, Works Dept. zawng zawng control-tu Finance leh Planning bakah dept dang 4 a chang bawk a. CM hmasa Finance chang sawisel thinin, tunah aman a chang ve leh tho si a, VIP culture kan tibo anga, Minister zin inzui dum dum kan ti tawp ang a, Designation plate kan tar lovang an tih zawng zawng te kha a thlawn zo ta vek a, mipuite min zah lo hle a ni, a ti.

Pu Sawmvela chuan, Buhfai Card var nei tan a man a leta tihpun a, sum tam tak hum theih tura ruahman hi sum vawngtu Finance Department lam tan chuan thil lawmawm tak a ni thei a. Mizoram pumah Ration Card nei chhungkua 2,88,757 zinga 38.86% (mi 1,12,231) card var nei zingah pawi tilo engemawzat an awm laiin, chhungkaw engemawzat chu a nghawng ngei dawn a ni, a ti. MNF sawrkar-in petrol leh diesel man litre-ah Rs.7 laia a tih hniam tawh, tun Sawrkar- in 2% a a tih pun vanga motor chuan man leh thilphurh man a to vanga mipui min nghawng dan tur chu kan hotuten an sawi tawh kha. Hei bakan hian In hmun leh ram in hralh leh hming thlak dawna stamp duty nasa takin an tipung bawk. Chhiah kan tipung lovang, loan kan la lovang, ti thinte chuan enge an tih mek leh an tih zel dawn hi mipuiten kan thlir reng a ni, a ti.

Sawrkar hmasa lamin sum an puk khan, a hmanna tur mipui hrilh si lovin, mípui mín dahkhamin sum an puk vak vak a, leiba an ngah lutuk an ti a. Ninevi challenge an tih, Lammualah khan, “Hnam tam tak in puktir ang a, nangni chuan in puk ve lovang” tih thu tap aw tuauvin ZPM hotupa khan a sawi a, nuho an Halelui thawt thawt a nih kha. An sawrkar tirh December 2023 atangin kumin April tih loh chu thlatin OMB hmangin an puk a, chutianga an puk chu June thleng hian Rs.602 Crores a ni a. Chu bakah Ways&Means advance hmangin Rs.1,280 crores vel an puk bawk a. Thla 6 lek chhunga an puk belhkhawm chu Rs.1,859.94 Crores a tling der tawh a. Sum puk chhan an mipuite hnenah an puang zar ngailova, hetianga an kal zel chuan kum 5 chhung chuan Rs 18,600 Cr a tling dawn tihna a ni. Hetianga sum puk vak vak a development awm leh si lo hi a chhan sawifiah se, a duh thu a sawi bawk.

Mizo Hnamrun chhung inkhawm hi Pu D.Thangliana, PAC Member MNF chuan kaihruaiin, Upa K. Lalhmangaiha , Adviser, MNF Gen. Hqrs. chuan hunserh a hmang a ni.
Sd/-
(LALTHAKIMA)
Jt. Secretary
Media & Publicity Department
Mizo National Front
Memo No.128/2024
Dt.08.07. 2024

PU LALDENGA THIHCHAMPHA PUALIN A THLANAH ZAHNA LANTIR A NI

Mizo National Front
General Headquarters
Mizoram : Aizawl

Press Release

PU LALDENGA THIHCHAMPHA PUALIN A THLANAH ZAHNA LANTIR A NI

Tukin July ni 8, 2024 Thawhtanni zing dar 7:00am khan MNF Founder President Pu Laldenga (L) thih champha vawi 34-na pualin a thlan, Aizawl Treasury Square-ah hun hman a ni. Pu Laldenga thih cham July ni 7, 2024 hi Pathianni a nih avangin vawiin July ni 8, 2024 hian hun hman a ni. MNF President Pu Zoramthanga leh Pu Denga nupui Pi Biakdiki hovin Pu Laldenga zahna chibai bukin, a thlanah pangpar he huna kal ten dah a nia, inkhawm tawi hun hman a ni bawk.

He hunah hian MNF President Pu Zoramthanga chuan thusawiin, Pathianin Pu Laldenga min pe hi Mizote kan vanneihna lungphum pawimawh berte zing ami a ni. India ram mai ni lo khawvela Mizo hnamte min pholangtu a ni a, khatih hunlaia Zofate mai ni lovin, thangthar zelte thinlungah thleng pawh Hnam thinlung (Nationalism) a tuh a. Sawisela ngaihnep tum awm thin mahse, kan finna a sang tulh tulh a, Pu Denga hlutna hi kan hrechiang chho tulh tulh a ni, a ti a. Mizo hnam leh Mizoram a awm chhung chu Pu Laldenga hming a daih tawh loh tur thu a sawi bawk.

Tun dinhmuna kil tin Burma, Bangladesh, Manipur a buaina nasa tak thleng leh Tripura a bul intan mek kan unaute buaina thleng karah hian Pu Denga’n remnaa min lo hruailut ta ropuina leh finna a tilang zel a, kawng tinrengah hma min lo hruaisak hlawkna a lang zel a ni. Vawiina amah hriatreng nan hun kan hmang hian a hova Remna kan neih hlutzi a tarlang a. A changa Remna sawi neptu emaw a changa sawimawi tute emaw karah Pu Laldenga hova remna kan neih hlutzia hi a a lang zel a, ani Mizoten kan nei kan vanneih zia hi pholan a ni zel dawn a ni, a ti bawk.

MNF President chuan, Pu Denga hi Ram leh Hnam tan indo lai leh ralmuan lai pawha a hmatawnga mipuite hruaitu a ni a, kan hnenah awm tawhlo mah se, Mizo Hnam dinchhuahna atana a inpekna te, a hnathawh te leh Remna atana a rohlu tak min hnutchhiah ngaihtlutna hi a zual zel dawn a ni a ti bawk.

Pu Laldenga fanu Dr. Renee Rinzuali, General Secretary, MNF pawhin thusawiin, a pa hriatreng nana hun hmangtu zawng zawng chungah lawmthu sawiin, Pathian leh kan ram tan tih thu an ngaihtuah chhuah dan a pa hnena zawh a chak thu sawiin, sikkim mi pakhatin a fanu a ni tih hre lova, a hnena Laldenga kan lo nei bik vannei min tih thu min hrilh a ni a ti a. Keinin kan ngaihtlut chu thuhran nise, NE mi tamtakte hian ani kan lo nei hi vannei min ti hle a ni, a ti. A pa hnungzuia ram leh hnam tana hmala tute theihtawpa thlawp zel an tum thu a sawi bawk.

He hun hi Dr. R. Lalthangliana, Sr. Vice President, MNF in a kaihruai a, Upa Ramthanmawia, Member, PAC, MNF in hunserh a hmang bawk a ni.

Sd/-

(LALTHAKIMA)
Jt. Secretary
Media & Publicity Deptt
Mizo National Front
Memo No. 127/2024
Dt.08.07.2024

Mizoram Sorkar-in Kuhva Chingtute a bum -MNF

MIZO NATIONAL FRONT
General Hradquarters
Aizawl, Mizoram

PRESS RELEASE

Mizoram Sorkar-in Kuhva Chingtute a bum -MNF

Mizoram a Kuhva Chingtu, Vairengte, Bilkhawthlir leh Hachhek Bial Joint Committee te’n an kuhva hralhna a harsatna an tawh chhan ber Myanmar aṭanga Kuhva tawlh rukte chu Vairengte leh a chhehvel Kudam-ah ṭhehnem tak chhekkhawl a awm niin an hria a. Heng Kuhva chhekkhawlte hi 30.6.2024 ral hmaa thenfai sak turin Mizoram Sorkar an ngen a. An ngennain awmzia a neih loh chuan kuhva thenfai hnatlang neih an tum thu resolution an pass bawk.
Hemi chungchang hi Dt. 30.6.2024 & 1.7.2024 Vanglaini Chanchinbu chhuakah headline-a hmangin ‘Myanmar Kuhva ip 9635 man a ni- Sorkarin beihpui thlak zui a tum’ tiin Vairengte leh a chhehvela Godown te enfiah a nih thu tarlan a ni. Hemi ni vek hian Zonet chanchintharah, heng kuhva mante hi khawih chet theih loh tura hren nghal a nih thu a puang bawk.

Dt.1.7.2024-a Vairengte, Bilkhawthlir, Hachhek Bial Kuhva Chingtu Joint Committee thuchhuahin an tarlan danin, heng kuhva ip 9635 man ni a sawi chu man a nih loh thu an sawi a. Kolasib DC kaihhruaina hnuaia an meetingah, Kolasib SP pawhin man a nih loh thu leh thudiklo a darh thu a sawi niin an tarlang. Kuhva chingtute chuan, Sorkar official ten thenfai vat anih dawn thu leh hnatlang ko rihlo tura an ngenna zahawm tiin July 5 thleng nghak tura an ngenna chu an pawm a.
Kudam-a Myanmar Kuhva ip 9635 man anga puanzar leh thianfai tura inringtawk taka an sawiho hnuah, tunah hian Kuhva te hi a bo zo deuh vek tawh niin an hria a, Dt. 3.7.2024 khan Kolasib SP-ah complaint thehlutin hmala tura ngenna an thlen leh hian khawih chet tawhlo turin an hren nghalloh zia ati chiang hle. Kuhva smuggling thlakhat chhunga tihtawp tumtu Home Minister hian kuhva tawlhru ṭhinte thurualpuiin kudam a chhekkhawlte pawh a lakchhuahtir ta mai zawk nge, Thudik puang vat turin kan phut a ni.

Kuhva Chingtuten sorkara rinna nghat a, an harsatna sutkiansak nia an inhriat laia, sorkar-in a bum duh hi, kuthnathawktute ngai pawimawh ber sorkar nia insawi tih atan a zahthlak hle niin MNF chuan a ngai a. Zoram mipui hriatah sorkar in dawt a puangzar duh hi mak a ti hle a, hetiqnga inbumna hi thleng nawn tawhlo se a duh takzet a ni.
Sd/-
(LALLENMAWIA JONGTE)
Secretary
Media & Publicity Department
Mizo National Front
No. 125/2024
Dt. 04.07 2924

MLP-IN HLIMEN RELIEF CAMP AN TLAWHSORKAR-IN SUM PE CHHUAK RANG SE AN DUH

Mizo National Front
General Headquarters
Mizoram : Aizawl

PRESS RELEASE

MLP-IN HLIMEN RELIEF CAMP AN TLAWHSORKAR-IN SUM PE CHHUAK RANG SE AN DUH

Vawiin Dt 03.07.2024, Nilaini hian MNF Legilature Party (MLP) chuan Leader of Opposition Pu Lalchhandama Ralte hovin Hlimen-a khawtlang ṭangrualin relief camp an sak mek an tlawh.

He hunah hian Hlimen Relief Camp hotute chuan MLP-te hi lo dawngsawngin, Relief Camp pahnih sakzawh tawhah In pahnihah hian chhungkaw 20 an riak lut tawh tih an sawi a. Relief camp-a awm duh camp la sak loh avanga awmna la nei lo chhungkaw 21 an la awm thu an sawi a. Sorkar aṭangin cheng khatmah relief camp sak nan an la dawn loh thu sawiin, an dawn ngei an beisei thu an sawi a. An veng dawrah nuai 20 chuang man a ba thlauin In sakna hmanrua an la tawh tih an sawi a. “Pawisa kan hmuh ran theih nan theih tawp min lo chhuah pui rawh u,” tiin Relief Camp hotute hian MLP-te hi an lo ngen a ni.

Relief Camp hotute hian zawhna chhangin Disaster Management & Rehabilitation Minister-in an camp a la tlawh loh thu an sawi a. An bialtu MLA aṭangin camp sakna tur fund an dawn loh thu an sawi bawk.

He hunah hian Leader of Opposition Pu Lalchhandama Ralte chuan thusawiin, “Sorkar-in Hlimen Relief Camp sakna atan tun thlenga cheng khat pawh a la pe lo hi a lungchhiatthlak kan ti hle a. Khawtlang ṭangrualin nuai 20 chuang an seng tawh chunga sorkar a la ngawi thei hi a mak kan ti hle a ni,” a ti a. “Central sorkar-in chhiat tawkte chhawmdawlna tura India ram State-te min pek sum hi, hreng khawtlai lo leh pawtpeng lovin pe chhuak zung zung turin sorkar hi kan ngen a ni,” a ti.

Pu Chhantea chuan, “Nimin maiah Zemabawk lamah pawh vanduaithlak takin chhiatna a thleng a. Kha vanduaina thleng tuartute chhungte pawh kha installment lovin, a full-in tuamhlawmna leh ralna sorkarin pe rang se kan duh a ni,” a ti.

Leader of Opposition chuan, “Chief Minister-in phur takin Cyclone Remal avanga chhiat tawkte tuamhlawmna tur vaibelchhe 15 ruahman a nih thu a sawi hnu thla khat a chuang tawh a. Heti chunga relief camp sakna pawh sum an la pechhuak thei lo hi a mak hle a. Chhiatna tuartute an lainatawm tak zet a ni,” a ti a. “Thil ṭha ti tura sorkar nawr leh puih kawngah theih tawp kan chhuah zel dawn a ni,” a ti bawk.

MLP aiawhin Relief Camp ṭanpuina Rs 20000/- Pu RM Chakma MLA-in a hlan a, he hunah hian Pu Robert Romawia Royte MLA, Pu Lalrinsanga Ralte MLA leh MNF hruaitute an tel a ni.
Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.124/2024
Dt. 03.7.2024

LAWMTHU SAWINA

Mizo National Front
General Headquarters
Mizoram : Aizawl

PRESS RELEASE

 

LAWMTHU SAWINA

AMC Ward XIX by Election Vote chhiar zawh takah ward mipui ten an thlantlin Dr. C. Malsawmtluangi chu MNF chuan a lawmpuiin, bial chhung hmasawnna atana theitawp chhuaha thawk turin duhsakna a hlan a ni.

MNF Candidate Dr. Lalrinzuali Hrahsel chungah lawmthu a sawi a, vanduai zawka a tang hi pawi a tiin,tling tura a beihna leh thahnemngai taka a inpumpeknaah fakawm a tiin, thlantlin a nihna tura theihtawp chhuahtute leh duhsak taka amah vote tute chungah lawmthu a sawi takzet bawk a ni.

Rim taka Inthlan buaipuitu leh venhim hna thawktu zawng zawngte chungah lawmthu MNF chuan a sawi bawk a ni.

Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.119/2024
Dt. 27.6.2024
ZOHNAHTHLAK RALTLAN THAWNLET PAWI KAN TI

ZOHNAHTHLAK RALTLAN THAWNLET PAWI KAN TI

Mizo National Front
General Headquarters
Mizoram : Aizawl

PRESS RELEASE

ZOHNAHTHLAK RALTLAN THAWNLET PAWI KAN TI

Bangladesh-a Zohnahthlak ten buaina nasa tak an tawh vanga Mizorama raltlana rawn lut nunau 200 chuang lai, Mizoram an rawn luh tawh hnua BSF-in an thawhlet leh hi MNF chuan pawi kan ti hle a. Heng nunaute hi Bangladesh-a an khuaa let leh ngam tawh lovin ramhnuaiah khawchhe karah an tangkhang mek a. An zingah naupang leh kum upa ṭhahnem tak an tel a, a pawi kan ti hle a ni.

Hetianga kan unauten harsatna nasa tak an tawh laia Mizoram sorkar a ngawi tlat hi MNF chuan pawi a ti hle a. An nunna atana sahimna zawnga rawn luh tum kan unaute hi ngaihtuah hram turin sorkar kan ngen a. Zohnahthlak ram hrang hranga ṭhendarha awmte tan In pui kan nih chhunzawm theih nan sorkar hian ngaihtuahna hmang se kan duh hle.

MNF sorkar lai khan Bangladesh Zohnahthak harsatna tawkte hian Mizoram an rawn pan a. BSF-in lo dangin harsatna nasa tak an lo siam a. Khatih laia Chief Minister Pu Zoramthanga khan, “Kan unaute dan kan remti lo. Nangni pawhin in Bengali pui Bangladesh aṭanga India an rawn lut tur in dang bik lo,” tiin ṭan a khawh a. Mizoramah ṭhahnem tak an rawn raltlan a, chhawmdawlna pawh ṭhahnem tak pek an ni. Tun sorkarah kan unauten harsatna an han tawk a, sorkar a ngawi tlat hi hriattiam har kan ti hle a ni.

Zohnathlak te tuamhlawm a, kuahkhawmtu an ni thei ngang lo a nih pawhin, a lengdarhtu ni lo hram turin ZPM sorkar hi MNF chuan a ngen a ni.

Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.111/2024
Dt. 19.6.2024

MNF SENIOR VICE PRESIDENT-IN PRESS CONFERENCE KO

Mizo National Front
General Headquarters

Mizoram : Aizawl

Press Release

MNF SENIOR VICE PRESIDENT-IN PRESS CONFERENCE KO

MNF leh Congress khan thil tha turah sorkar hmasa thiltih an chhunzawm -Dr.R.Lalthangliana

Nizan dar 8:00pm khan MDC by-election a candidate leh Lawngtlai District Head Quarters-a MNF Treasurer Pu C. Lalsawmzuala In, L-IV Chanmari Inah L-IV Chanmari MDC by-election lo awm tur atan leh LADC area-a Village Council General Election lo awm tur atan campaign kick off neih a ni. Village Council election lo awm tur hi seat 99 thlan a ni ang.
He hun hi MNF Senior Vice President Dr.R.Lalthangliana leh Pu Lalrintluanga Sailo MLA-te bakah MNF General Headquarters hruaituten an hmanpui. He hunah hian MDC by-election atana an thawhpui Congress hruaitute an tel bawk.

Dr.R.Lalthangliana chuan MDC by-election a candidate leh MNF VC candidate zawng zawngte tling ngei tura duhsakna a hlan thu a sawi. MDC by- election ah Congress party nen lungrual taka an thawkho thei chu MPCC General Headquarters hruaitute leh LADC-a Congress hruaitute chungah lawmthu a sawi a ni.

Vawiin June ni 19, 2024 hian MNF Senior Vice President hian Lawngtlai MJA Press Club-ah Press Conference a nei nghal a, tukin zing khan Circuit House-ah MDC-te nen sawihona hun tha tak an hmang nghal bawk.
“MNF leh Congress hi chu party ruhrel lian leh nghet an ni a. Kum 30 lai politics khela MLA ka lo nih ve tawh hnuah MNF leh Congress khan ram tana thil tha nia an hriat chu tha takin an chhunzawm sak mai thin. Sorkar hmasa thil tih sawi chhiat chiam chiam an ching ve ngai lo. ZPM kal dan erawh hi chu a hun la reilo mahse, hriat thiam a har khawp mai, sorkar hmasa thil tih an sawisel nasa hle a ni. Sorkar thar hi chu pawl yhrang hrang paruk vel kalkhawm, mize inanglo tak tak an ni a. Chief Minister, Minister leh an MLA thenkhatte hi vawi khat mah la ni ngailote an ni a. Manifesto of visionary (duhthusam ram) an sawi a, an han sorkar a, an tum ang a lo ni si lo,” Dr. R. Lalthangliana chuan a ti.
India ram inawpna danah hian Village Council hi dinhmun pawimawh tak a ni a. Mi rintlak thlang chhuak turin ka ngen che u a, boruak tha tak hnuaiah mi tha tak thlang chhuak u la. Tun laiah chuan sorkarah VC-te an pawimawh ta hle a, sorkar khalh ngil turin rulling chauh ni lo, opposition in an pawlhte hi a that vena chin a awm a ni, a ti bawk.
Pu Lalrintluanga Sailo MLA pawhin Aizawl lam atanga mipui hmuh dan hrilhin state sorkar inthlak apianga he lam District Council sorkar a danglam ve fo thin chu mak an tih thin thu a sawi a, mahse, tuna kan hruaitute hian bung thar record tha tak in siam hi lawmawm ka ti a, hun kal zel atan chhunzawm zel a tha khawp mai. Politics hi bazarna hmun a ni lo a, rinawmna tel lo chuan a dinchhuah theih loh. Politics-ah chuan a bul tan that aiin a tawp khar that hi a tul zawk a, hun kal tawh aiin tun hun zel hi a pawimawh zawk a ni a ti bawk.
Sd/-
(R.LALHMANGAIHA)
Secretary
Media & Publicity Deptt
Mizo National Front
Memo No.112/2024

SAWRKAR INLULING TAK KAN HRAWN MEK TIH A LANG ZEL E

Mizo National Front
General Headquarters
Mizoram : Aizawl

PRESS RELEASE

SAWRKAR INLULING TAK KAN HRAWN MEK TIH A LANG ZEL E

Ni 14, June, 2024 khan Chief Secretary hnuaia hotu sang mi 31 zette an hna chanpual siksawi sak burh an ni a, hemi ni vek hian MCS, Senior and Junior Grade mi 28 leh Junior Administrative grade (JAG) mi 18 zet te transfer order chhuakin, an darh chum chum a, anni rual hian MCS – Supertime Grade A & B leh Selection Grade mi 21 te Department awmna pawh siksawi nghal a ni bawk. Hetianga tumkhata in transfer nasat leh siksawi nasat hi a thlen vawi khatna niin, Sawrkar inluling, a hnuaia thawkte chunga lalna na taka lantir kan hrawn mek a ni tih lantirtuah MNF chuan a ngai a. Pawi a ti takzet a ni.

Kan ram hmasawnna tura an tha leh zung, ngaithuahna nasa taka sengtu, kan sawrkar neitu berte tia chhal ngamte rual chunga Pu Lalduhoma kaihhruai sawrkarin, tun hma a la thleng ngai lo, nasa taka ṭum khata kan ram mi zahawm rualte a thehthang kual dan hi a demawm tak zet a, hnathawk tak tak tura an zeizia zira insawnkual mai leh an senior dan azira an thutna tur hmun awm insiamrem satliah ni lovin, thil tithei an nihna nataka lantir paha, an duhsak zawngte vohna hun remchang langsar takin an lantirah MNF chuan a ngai a ni.

An hnathawh kawnga senior zawkte thutna hmun tura ngaiha a nilo zawk thuttir te leh vawi lehkhata Officer rual 100 dawn chet tir huk an ni hian kan ram tan thil tha a herchhuah pui a rinawm lova, duhdah taka chin phar an nihna hian kan Officer rual, zahawm takte leh an chhung leh khatte rilru nasa takin a hliamin a rinawm a. Sawrkar kal tawha thleng ngai lo thil thar lo thleng zel hi Kalphung thar chu a nih hmel a. Kalphung chhemi, ‘Lal ngailo an lal a na, an lal a kha’, tih nemnghettu zel a niah MNF chuan a ngai a. Hetiang kalphung hi thleng nawn tawhlo se a duh takzet a ni.

Sd/-
(LALṬHAKIMA)
Joint Secretary
Media & Publicity Department
Mizo National Front
Memo No.110/2024
Dt. 18.6.2024