Mizo National Front
General Headquarters
Mizoram : Aizawl

Press Release

MIZO MIPUI THLAWPNA ṬHA TAK KA DAWNG ṬHIN A, KA THLA A MUANG ṬHIN: K VANLALVENA

Vawiin Dt 13.4.2024, Inrinni hian Aizawl hmun hrang hrangah Street Campaign neih a ni a. Heng hmunah te hian MNF hruaitu hrang hrangin thu an sawi a ni.

Zoram Mipui MP Candidate Pu K Vanlalvena chuan thusawiin, “Puitu ka neih miah lohna hmun, Parlianment chhungah te kan tal chang a awm a. Ka hnungah Mizo mipui zawng zawng in awm tih ka hria a, min thlawp ṭha ṭhin em em a, chu chuan min ti thlamuang a, huaisenna min pe ṭhin. “We shall kill them all” tih ka sawi kha ka inchhir lo a, ka tih tur tak tiah ka inngai. Khatih hunlai khan ZPM Ṭhalai chuan Press Release siamin min chhuah zia an puang a. Ka lawm ngawih ngawih a ni. Vawiina nuihza siam nana Chief Minister-in khami chungchang a sawi kha chu ZPM candidate ka nih loh vang a ni. ZPM candidate chu ni ila min chhuanzia sawi thiam ber a ni ang,” a ti a. “Kan police te thil tih kha ka phatsan thiang lo a ni,” a ti bawk.

Pu K Vena chuan, “India ram chhung leh pawna Zohnahthlak ten harsatna an tawh laiin theih tawpin Parlianment House chhung leh pawnah ka lo au ve tawh ṭhin a. Kan Ram, kan hnam leh kan sakhua a him theihna tura theih tawp chhuah chhunzawm zel thei turin, Mizo mipuiten hnathawhkawr min hak tir zawm turin ka ngen a ni,” a ti a. “Ṭhalai tam zawkin eizawnna an neih theihna tura beih te, lo neitute hma lam pan zel theihna tura theih tawp chhuah ka tum bawk a ni,” a ti.

Pu Lalruatkima ex Minister, MNF Treasurer pawhin thusawiin, “India rama MP 500 chuang zinga pakhat chauh nei ve kan ni a, kan MP neih chhun tura hi kan uluk a ngai. Kan candidate neihte kan zirchian a ngai a ni. Pu K Vanlalvena hi Mizo mipuiin MP kan hmuh dan thlaktu, thusawi a har em emna hmuna vawi tam tak thusawi thei a ni a. House chhung leh pawna a chet lakna te a chhuanawm hle a ni,” a ti a. “Kan ram, kan hnam leh sakhuain neksawr leh dodalna nasa tak a tawh mek lai hian Pu K Vena ang hnam rilru pu rumrut, mihuaisen leh a ngaihna hria hi hnamin a mamawh em em a ni,” a ti.

Pu Ruatkima chuan, “He sorkar hnuaiah hian kan sorkar hnathawkte nekchep leh khuahkhirh an ni nasa lutuk te, kan police chhuanawm tak tak te hmuhsit an nite hi a pawi kan ti tak zet a ni,” a ti a. “Chief Minister hian Free Movement Regime (FMR) leh ramri hung hi vei ber niawmin a sawi ṭhin a. Assembly Session-ah meuh pawh duh lohna an pass a. Chuti chung chuan External Affairs Minister Dr S Jaishankar Mizorama a lokala an inhmuh khan hemi chungchang hi a lo sawipui miah lo a ni. Hei hian ram leh hnam a vei tak tak loh zia a tilang chiang hle a ni,” a ti bawk.

Pu Lalrinsanga Ralte Serlui bial MLA pawhin thusawiin, “Kan bial hi ramri a awm a ni a, harsatna hrang hrang kan tawk ṭhin a. Pu K Vanlalvena’n ramri chungchang a hmalakna hi a ropui tak zet a. ZPM ṭhalai hial pawhin MP huaisen tiin lawmthu sawina thuchhuah an siam hial a ni,” a ti a. “Tunah hian Hnam leh sakhua aia party dah hmasa CM kan nei ta em ni? Ram leh hnam chhantu nuihzat zawnga thu Chief Minister-in a sawi kha a pawi ka ti hle a ni. Tun hun hi ṭanrual hun a ni e. Kan ramin neksawrna nasa tak a tawh mek lai hian Pu Vena mi huaisen leh hrat khawkheng ramin a mamawhna hi a sang hle a ni,” a ti.

Sd/-
(LALLENMAWIA JONGTE)
Secretary
Media & Publicity Deptt
Mizo National Front
Memo No. 68/2024
Dt.12.04.2024