Mizo National Front
General Headquarters
Mizoram : Aizawl

Press Release

ZORAM NATIONALIST-TE IN PIANNA RAM MNF-AH LO KIR LEH TURIN KAN SAWM A CHE U -LALRUATKIMA

Dt 15.3.2023 hian Mizo National Front, Tuirial East Block, Block Conference chu Nisapui Volleyball Court-ah neih a ni a. He hun hi Pu Lalruatkima Rural Development Minister leh MNF Adviser ni bawk chuan khuallian niin a hmanpui a. Bialtu MLA Pu K.Laldawngliana chu khualzahawm a ni bawk. He hunah hian party hrang hrang aṭanga MNF zawm thar voter 76 Pu Lalruatkima’n a lawmlut a ni.

Pu Lalruatkima chuan thusawiin, “Nationalist kan ni, tia Zoram Nationalist Party lama min kalsan ta ZPM member ni ta te, in pianna ram MNF-ah lo kir leh turin thinlung takin kan sawm che u a. In hotuten kalphung thar an sawi hi thuneihna leh lalna chauh duha tuihalna a ni tih a chiang em em a. Nationalism an sawi ngai tawh lo a, an zuar hek lo. Sawisel tur leh phunna tur ringawt zawng hmuha miin an hmuh ve hma che u hian, Zoram Nationalist-te in pianna ramah lo kir leh turin kan sawm che u a. Pathian leh kan ram tan tichungin nationalism meichher chhitpuiah kan duh che u a ni,” a ti.

MNF Adviser chuan, “MNF party hian chhuan tur dang pakhat mah kan nei lo a, chhuan tur kan neih chu Pathian chiah a ni. He kan zui, kan chhuan Pathian hian Covid 19 hripui karah pawh Israel fate mana leh vahmin a pe ang mai khan ei tur min pe a. Kohhran, tlawmngai pawl leh sorkar thawhhona ṭha malsawmna kan dawng a. Min thlahthlam ngai lo Pathian hian kawng chanveah min kalsan lovang,” a ti a. MNF-in inthlana Manifesto a siam pawh a tihlawhtling deuh vek tawh tih sawiin, “Lunglei Municipal Council pawh kan tiam ang ngeiin kan din a, a hringtu MNF ngeiin mipuite duhsakna changin sorkarna kan siam ang tih ka ring tlat a ni,” a ti bawk.

Pu Ruatkima chuan, “Congress sorkar laiin Zu zawrh avangin kan rum a, kan thi zawih zawih a. MNF sorkar-in kan titawp nghal a. Assam Police-in Zophaiah silai nen tiang nen, Mizo nula leh tlangval an lo vua a, an kap a, kan ṭap a, kan rum a ni. Chhantu nei lovin kan awm. Pathian leh ram tan titu sorkar-ah ramri-ah buaina a lo awm leh a. Mizoram Police hliam pakhatmah awm lovin Assam Police kan hnawt kiang a ni,” a ti a. Zoramah hmasawnna hrang hrang a thleng mek zel a, zirtirtu 3000 chuang kan la a, zirlai pawh an lo ṭhahnem ta. kum 5 chhunga MNF chhawpchhuah hmasawnna hi a tam asin. Sorkar hmasaah kawng a chhe em em a, tunah erawh chuan kan kawng pawh hi a nuam ta hle a ni. Kawngpui ṭha avangin Zoram kar kan pawt tawi nasa hle a ni,” a ti bawk.

Rural Development Minister chuan, “Ei leh bar chungchangah pawh kan hnianghnar ta hle a. Buhfai ṭha thlanna pawh hmuh tur a awm ta lo, a ṭha vek tawh. Gas harsat ṭhin ziate kha kan la hria em? Tunah a hnianghnar ta hle tih kan hriat hi,” a ti.

MNF Adviser chuan, “Congress party hi Pu Lalsawta pa ṭha tak maiin a hruai a, a kang hleithei chuang lo. India ramah an hniam telh telh a. Ṭhat loh theih lohna bawm an zuar a, ṭha thei reng reng lote kha an awmkhawm a. Sorkar meuh tur chuan an beisei awm lo. An bial ṭha ṭhin minority bialah pawh BJP-in a ei te zel a, keini kan pung zel bawk si,” a ti bawk.

Pu Ruatkima chuan, “ZPM hian kalphung thar an zuar a, Social Media lamah chuan an sorkar. Nikum maiah Siaha-ah an inthlang a, inthlan dawna an lawmluh zawng zawng aiin an vote hmuh a tlem zawk. Zonu unit Chakma vek awmnaah te an din a, an kalphung thar a danglam hle,” a ti a. “Lalna leh thuneihna an thlakhlelh luatah an lo sawi tawh ṭhin zawng zawngte an mahni ngeiin an phatsan zel a ni,” a ti.

Pu Ruatkima chuan, “Kum tawp election-ah hian Pathianin MNF chu sorkar nawn leh tir ngei ang. Hun harsa leh khirha ram hruai tlaka min ngaitu hian hun ṭhaa ram kan hruai hi a phal ang tih ka ring,” a ti a. “Flagship programme SEDP pawh 2nd installement pawh tun thla chhung hian sem hman tum a ni a, 2nd phase pawh July thla chhoah sem hman tuma chak taka hmalak mek a ni,” a ti bawk.

Khualzahawm bialtu MLA Pu K Laldawngliana pawhin thusawiin, “Bialtu MLA ni mah ila in tel lo chuan engmah ka ni lo a, min kaihhruai a ngai a. Bible-in a chhe lai siamṭhatu, a tih angin kan zavaiin a chhe lai siamṭha tura thawhpui turin ka sawm a che u. Bial hmasawn ber ni turin hmalak ka tum a ni. Kum khat leh thla thum chhung chauh MLA ka la ni chhungin sorkar chak tak Pu Zoramthanga kaihhruai zarah hmasawnna hna ṭhahnem tak thawh a ni thei hi ka lawm hle a ni,” a ti a. “Pathian leh kan ram tan, titu MNF party hi Pathianin min kalsan ngai lo a ni,” a ti bawk.

He Block Conference hi Pu K Lalthanpuia, Block President-in a kaihruai a. Pu Lalruatkima Minister hi Pu Lalfakzuala Chenkual AMC Corporator, Pu BC Lalbiakngura General Secretary leh MNF hruaitu ṭhahnem takin an ṭawiawm a ni.

Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.MNF/Media/03/2022/622
Dt.15.03.2023

Mizo National Front
General Headquarters
Mizoram : Aizawl

Press Release

ZPM HI MIMAL ANGA MI BEI NASA BER PARTY AN NI  – R.Lalzirliana, Minister

Vawiin March ni 13, 2023 (Thawhtanni) hian Mizo Hnam Run chhung inkhawm hun hnihnaah Power Minister Pu R.Lalzirliana chuan tun hnaiah Mizoram khawchhak lam hmun hrang hrang a zin chungchang sawiin, Champhai ‘N’ leh Champhai ‘S’, East Tuipui leh Tuichang bialahte MNF party atanga MLA ni mekte chu an la that tawk thu leh, party dang tan khin thlak mai chi nia mipuiin an la hmuh loh thu a sawi.

ZPM chu a tha zawnga Zoram kaihruai ngam tur anga insawi, party dang zawng aia danglam ngam tura ngaih, Pathian pawh hnaih bik riau nia in sawi thin an ni a. MNF-in senior front kan tih ang hi ZPM chuan Val Upa Council (VUC) an invuah ve a. VUC-te chuan VIP culture tihhniam te, MLA hlawh chungchang tihhniamte an sawi ve thin a. Mahse, tunah pawh ZPM MLA-te hi designation plate tar mawi ber berte an ni. ZPM MLA-te hian tunah pawh VUC thu hi an zawm reng reng lo, opposition nih lai pawha an zawm lo anih chuan engtikah mah an zawm reng reng lo ang tih ring rawh u. An hotupa ber an thiam pui pa Pu Duhoma danglam bikna hi politics-a pawl sawn tam bak hmuh tur a awm lo. ZPM chu mimal anga mi bei nasa ber party an ni tih Power Minister chuan a sawi bawk.

Pu R.Lalzirliana chuan, “Kohhran pakhata nihna sang tak lo chelh ve thin pakhat kan inkawm a. ZPM kal dan hian a rilru a tihnat thu min hrilh a, ZPM hi hun enge maw chen kha chu rintlakah kan lo ngai thin a. Bible tan chhana kohhran kan Unit ti thin an ni a. Tuirial bial bye-election ah ZPM chet duh dan atang kha chuan a rinngam tawh loh thu min hrilh a. Inthlan hmasak kha ZPM dinhmun san lai ber a nih a rin thu min hrilh,” a ti.

Power Minister chuan hripui leh harsatna hrang hrang karah sorkar anga hnathawh a harsat hle lai a, department anga hnathawh tawh leh hmalakna hrang hrang an neih mekte a sawi a. Aizawl Khawpui chhunga electric hrui inzam nuai hi felfai taka ABC line-a thlak thuai anih tur thu te, power-ah kan hnianghnar zawk theih nan DPR hrang hrang an siam mek thu a sawi a. Kumin kum tawpah MLA election-ah MNF kan tling leh ang. Solar Vankal Mega watt 25 pe thei pawh commission thuai a ni ang a, NBARD funding atangin Thenzawl Vantawng mega watt 10 pawh tihfel thuai a ni ang. Zoram mipui leh party mipui tan a vur kum a thleng dawn a ni, a ti bawk.

Lunglei LMC inthlan lam buaipuia kal Pu PC.Lalkristiana, Secretary, MNF Gen.Hqrs.chuan Pu Lalthlengliana Vice President leh Minister Dr.R.Lalthangliana-te hmalakna report peiin, LMC inthlan lo awm turah MNF candidate tan chance a that ber thu leh beiseina sang tak nen an lo haw thu a sawi.

He hun hi Pu T.Lalhmachhuana, General Secretary chuan kaihruaiin, Pu JH.Lianchungnunga, Ex-MLA, Adviser MNF Gen.Hqrs.chuan hunserh a hmang a ni.

 

Sd/-(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/04/2023/621
Dt.13.03.2023.

Mizo National Front
General Headquarters
Mizoram : Aizawl

Press Release

Pu Zoramthanga tluka finance enkawl thiam Mizoramah an la awm lo -K.Liantlinga, Ex-MLA

Vawiin March 10, 2023 (Zirtawpni) hian Mizo Hnam run ah chhung inkhawm neih a ni a. Hun hnihnaah MNF Adviser, Pu K.Liantlinga, Ex-MLA, Vice Chairman Social Rehabilitation Board chuan thusawiin, Inthlan kan hmachhawn leh dawn a theih tawpin Party Worker te pawn tan kan lak angai hle a, Kan Policy pawh tihhlawhtlin chhoh mek a ni a, kan la tih hlawhtlin loh thenkhat pawh tihlawhtling turin hma kan la mek zel a ni, a ti.

Pu Liantlinga chuan, kan sawrkarin sum leh paiah pawh nasa takin hma asawn chho a, Mizoram hi leiba nei tlem pawl tak kan ni a, hei hian Finance Minister tha tak Chief Minister, Pu Zoramthanga kan nei hi kan in chhuang hle tur a ni. Pu Zoramthanga tluka finance enkawl thiam Mizoramah an la awm lo a. Kum 1998 khan Congress sorkarin cheng vaibelchhe tam tak leiba min hnutchhiah chungin bul a tan a. PM Pu Vajpayee hnenah Peace Bonus, Rs. Vbc. 182.45 chu a dil chhuak a ni, a ti. Tunhnaiah Congress hovin an ngum khak hmu lovin sum harsatna chungchangah min bei a. An hunlai khan sorkarin sum a neih loh avangin Treasury vawi 30 chuang an khar a ni, ati bawk.

Mizo Hnamrun chhung inkhawm hi Pu K.Vanlalauva, Treasurer chuan kaihruaiin, Upa Lalnunmawia EM MNF General Headquarter chuan hunserh a hmang a, Pu K.Kristiana secy. leh Pu RK Hmingthanga hnen atangin zin report ngaihnawm tak ngaihthlak a ni bawk.

Sd/-
(LALTHAKIMA)
Joint Secretary
Media & Publicity Department
Mizo National Front
Memo No.MNF/Media/04/2023/620
Dt.10.03.202

Mizo National Front
General Headquarters
Mizoram : Aizawl

Press Release

MNF VICE PRESIDENT-IN MNF LMC CANDIDATE PUANG.

LMC HI LUNGLEI KHAWPUI TANA RO PHUM RUK HAICHHUAHNA TUR :

– Dr.R.Lalthangliana, Minister

Vawiin March ni 9, 2023 (Ningani) hian Lunglei Saikuti Hall-ah ‘MNF Lunglei Municipal Council (LMC) candidate puanna’ leh ‘Lunglei West Assembly South Block Political Training Cum Workers’ Meet’ neih a ni a. MNF Vice President Pu Lalthlengliana chuan
MNF LMC Candidate-te a puang, chungte chu :

Ward No I – Pukpui & Zotlang : R.Lalhmingmawia, Bukpui. Ward No II – Serkawn & Zohnuai : Laldingngheti Pautu, Zohnuai. Ward No III – Bazarveng & College Veng : F.Lalsawmkima, Bazarveng. Ward No IV- Venglai & Venghlun : Zoramdina Ralte. Ward No V – Rahsi Veng, Sazaikawn & Hauruang : T.Vanlallawmi, Rahsiveng. Ward No VI- Electric Veng : LH.Lianzama, Electric veng. Ward No VII – Chanmari : Lalrotluanga Ngente, Chanmari. Ward No VIII- Ramthar & Farm Veng : C.Lalrindiki Ramthar Farm veng. Ward No IX- Lunglawn & Salem Veng : Lalngaihawma Pachuau, Lunglawn. Ward No X- Sethlun, Luangmual, Theiriat & Hrangchalkawn : C.Vanlalthangi, Theiriat. Ward No XI- Lungpuizawl, Zobawk ‘S’ & Zobawk ‘N’ : ZD.Ngurlianchhunga, Zobawk.

MNF Vice President, Pu Lalthlengliana hian Lunglei khawpui chhung veng hrang hrang atangin MNF-ah mi thar 171 a lawmlut a. Lunglei South bial Zehtet atangin Congress VC Treasurer leh Secretary telin voter 9 a lawmlut a, MNF VC a piang nghal dawn a ni.

MNF Adviser Dr.R.Lalthangliana, H & FW, etc. Minister chuan LMC chu Lunglei khawpui mipui tana rotling, malsawmna leh development tinreng kengtu tur niin ro phum ruk haichhuahna tur a nih thu a sawi. Tuna MNF LMC Candidate theh chhuahte hi Lunglei khawpui tana mi thiam leh tha thlan khawm, kohhran leh khawtlang tan pawha mi tangkai, party dang tan pawh zam phah rum rumna tur an ni a ti. Municipality Act hi sorkar laipuiin a duan angin, kum 2007 MNF sorkar hmasak lai khan LMC hi Assembly House-ah pass a lo nih tawh thu te, kum 2008 MLA inthlanah MNF an tlak tak avanga hun rei tak, a taka kalpui theih loh hnuah tunah a lo hlawhtlin tak avanga a lawmzia thu a sawi. Tuna candidate, a sulsutute hi Lunglei khawpui hmasawnna tura ngaihtuahna hmang thiam tur an nih avangin mipuiin an thlan tlin ngei chu an mawh anih thu a sawi. Kum 2015-a AMC thlan pawh MNF sorkar kut chhuak a ni a, congress sorkar vanglai takin party malin kan tling a, chutiang bawkin LMC pawh a hringtu leh dintu ngei MNF LMC candidate-te lo thlang tling u la, Lunglei khawpui hian in tangkai pui hle dawn a ni, a ti.

Dr.R.Lalthangliana chuan, “Municipal tih tur kan hriat a pawimawh a, state sorkarah chuan Minister/MLA-te an awm a. Department lian leh pawimawh tak tak an enkawl a. Municipality-ah chuan khawpui tawt lutuk te, in sak dan kawngah te, bawlhhlawh paih danah te, khawpui a himna atan te, hriselna lamahte a lo than len zel nan LMC chu hmalatu tur a ni. Motor parking te, khawpui miretheite dawm kanna tur te, kum upa leh thalaite intawllenna, thlanmual hmun thlengin state sorkar suma tih theih loh kha a hma tel dawn a ni. Vawiina kan thil tih hian Mizoram leh chhim lam tan hmasawnna rotling a siam dawn a ni. Covid avanga kan tawrhnaah kan thawhhona tha tak kha Lalpa’n mal min sawm a, vawiina kan thil tih theihna chhan pawh mipui vang a ni a, MNF sorkar leh keimah covid-a kan thawhthat vang a ni lo. Chutih rualin kum hnih leh a chanve hripui vangin sorkarin hna leh development a kalpui thei lo a, SEDP pawh kan beisei angin a kal thei lo a ni. In beisei kan tlinlohna tam tak a awm a, kan vei loh leh tih duh loh vang a ni lo, covid vanga kan tih theih lohah in ngaihdamna leh hriatthiamna kan dil a. Chutih karah la awm ngai miah lo, Lunglei Civil Hospital-ah ICU 28 kan hawng thei a, Trauma centre te, integrated multipurpose laboratory Mizoram hmun danga la awm lo te, building leh quarter engemaw zat kan sa theite hi a lawmawm hlein ka hria a. Chuvangin Lunglei hmasawn nan MNF LMC lo piantir ngei ang che u,” a ti bawk.

MNF Vice President Pu Lalthlengliana chuan LMC inthlan lo awm tur atan Lunglei Sub-Headquarters hruaitu te, Minister leh MLA rualte thahnemngaihna leh thawhrimnaah lawmthu a sawi a. LMC-ah hian party pathumten a mal theuha an chuh dawn avangin rulling party candidate-te an tlin ngei a beisei a, ward tinah MNF candidate an that ber thu a sawi. Congress chu hlauhthawnawm an awm lo nia sawiin, ZPM lah a phaw vuak chauha thawm nei lian, a tak tih tham awm lo, ‘thawh hma leh phun hma, men rei leh phun rei’ thin mai an nih thu a sawi. “Kum 2023 hi Lunglei history-a dai tawh ngai lo tur, thangtharte tan chhinchhiah tlak tak a ni dawn a, chutah a hmasa ber atana candidate turte in nih avangin in tlin ngei a ngai a ni. Thlan tlin in lo ni ang a, in tu leh faten nakinah ‘ka pi/ka pu chu Lunglei LMC rorelna hmasa berah a thu’ tiin, chhuang takin an la sawi dawn che u a ni. Kan candidate mi tha tak takte hian kiltin atangin beihna in la tawk dawn chauh a, lo zam reng reng suh u. MNF chu party lian, nghet leh tlo, diamond jubilee pawh lawm tawh kan ni,” a ti.

He hunah hian Minister Pu C.Lalrinsanga, Pu Lawmawma Tochhawng MLA, Vice Chairman HPC, Dr.Vanlaltanpuia MLA, Dr.K.Pachhunga MLA-te pawhin thu an sawi.

Nizan khan Lunglei Mizo Hnam Runah Pu Lalthlengliana Vice President leh Dr.R.Lalthangliana Minister-te chuan MNF LMC candidate-te hi kokhawmin inhmelhriattirna leh thu pawimawh hrang hrangte an inhrilh tawn bawk a ni.

MNF LMC candidate puanna hi campaign directorate chairman Pu Vanlalhmuaka’n kaihruaiin, political training cum workers’ meet hi Pu PC.Zohmingthanga, Vice President, Lunglei West South Block chuan a kaihruai a, Upa R.Tawnliana, Adviser, Lunglei West South Block chuan hunserh a hmang.

Sd/-

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/04/2023/619
Dt.09.03.2023

Mizo National front
General Headquarters
Mizoram : Aizawl

Press Release

 

COVID KARA KAN THAWHRAH A LO LANG: CHIEF MINISTER
Phullem phah hi demand driven base-a kalpui a ni: Sports Minister Pu RRRa

 

                Vawiin ni 08.03.2023 khan Chief Minister Pu Zoramthanga chuan Armed Venga 1st Bn. MAP Football Ground-a Synthetic Football Turf & RCC Gallery a hawng a. Covid hripui kara hnathawh rah lo lang a ni, tiin, “Khelmual (gallery) hnuaia in pui awm ngat hi Mizorama a awm chhun a ni ang,” a ti.

Khuallian Pu Zoramthanga chuan, Covid buaina karah sorkarin theihtawp a chhuahna rah chu tun hun a lo thleng ta, a ti a. Indopui vanga Japan ramin chhiatna an tawk leh atom bomb-in an khawpui a tichhe vek chungin an thawhrimna avangin an ding chhuak leh a, tunah chuan khawvelin chhiat an tawk tih a hre tawh mang lo a ti.

“Covid vanga harsatna karah Pathianin malsawmna ropui, tunhmaa kan neih ngai loh kan han neite hi – bawng vun khawra aurinna siamchawp nen kan inkhelh thin laite ngaihtuah chuan khelmual sira tawm hulna tur tha tak a awm tate hi hmasawnna nasa tak a ni,” a ti bawk.

                He hunah hian khualzahawm Pu Lalchamliana, Home Minister pawhin thutawi a sawi a. Mizoram state pachhiatzia leh sports dept budget chu – a te ber a ni chungin Sports Minister, Pu Robert Romawia Royte-in theihtawp chhuaha hmalakna ropui tak a kalpui chu fakawm a tih thu sawiin, khelmual hmangtu turte duhsakna a hlan bawk a ni.

Phullem lem hawnna program huaihawttu leh khual-thlengtu Sports Minister Pu Robert Romawia Royte pawhin thutawi a sawi a. Police leh Armed vengten field tha tak an neih chhan chu Pathian zarah Chief Minister leh Home Minister vang a ni a.  Tin, Sports Council leh Police-te inremsiamnaa tihpuitlin a nih thu a sawi.

“A scheme – Khelo India angin vantlang hman tur (public utility) a ni a, Armed Veng tan phei chuan a thlawna hman theih tur a ni,” a ti a. “He khelmual gallery hnuaiah hian in chhawng thum – Mizorama in lian ber, Mizorama in sei ber sak mek a ni,” a ti bawk.

Phullem lem a tam, tih an sawi thin a, a tak takah chuan mamawhna (demand driven basis) avanga siam a ni zawk tiin, Pu Robert-a chuan:  “Area hrang hrangah an duh ber chu phullem a ni. MLA-te pawhin a fala min hmuh chuan, phullem min dil vek. Tun sorkarah hian Mizoram sorkar hmalaknain phullem 30 siam hman kan tum a ni,” a ti bawk.

 

Sd/-(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/618
Dt. 08.03.2023

Mizo National Front
General Headquarters
Mizoram : Aizawl

Press Release

 

PATHIAN LEH MIPUI ZARAH LMC LEH KUMIN KUM TAWP INTHLANAH KAN SORKAR LEH NGEI DAWN : – Zoramthanga, MNF President

Mizo National Front, Sub-Headquarters, Lunglei, LMC campaign directorate huaihawtin ‘Mizo Hnam Run Lungleiah’ vawiin February ni 7, 2023 (Thawhlehni) hian ‘Mi thar lawmluh inkhawm’ neih a ni a. MNF President Pu Zoramthanga chuan party hrang hrang atangin MNF-ah mi thar 101 a lawmlut. Lawmluh zingah Lunglei ZPM Southern Headquarters Thalai President R.Malsawmkima, Thorang bialah ZPM Unit Vice President Pu Zomawia leh ZPM Treasurer-te an tel.

Lawmluh paha thu sawitu MNF President, Pu Zoramthanga, Chief Minister ni bawk chuan vawiin chawhma thlenga LMC candidate tur engemaw zat an tihfel tawh thu te, campaign hunah sorkar ngei tura hma an lak tur thu sawiin, LMC seat 11 awmah hian lak vek an duh a, Pathianin sorkarna siam tura mamawh zat seat a pek tur thu a sawi. “Pathianin ka tawng ngaidam se, Pu Denga hova movement kan hruai mup mup lai khan, India sorkar chuan engto tham khingpui an nei ta tih min hria a. London atangin Pu Denga koh chhuah a ni a. Hun a kal zel a, inremna thuthlung draft tute zingah ‘inremna chhe ber’ titute an awm thin hi mak ka ti thin. MNF history hi incheimawi nan tun politics-ah tuten emaw lukhuma khum zung zunga hak thlak zung zung chingte an awm. Vice President ka nih lai khan Pu Denga awm loh hlanin kum 7 zet movement kha ka kaihruai ve a ni. MLA tlemte te chauh kan neih lai, kan sorkar theih loh lai khan, kan party-ah ka kaihruaina a sorkar zawh ringlote an awm a. Pu Lalfakzuala hnenah a Inah President ka nihna min thlak turin Pu Tawna nen kan kal a. Ani chuan a lo pawm lo nasa mai a. Party dang hotute hian mahni President nihna mi dang kian tura an ina kal chilh hi an awm ve hauh lo ang. MNF chu party entawntlak ber kan ni a, hnam thuthlung meichher vuan tlattute kan ni. Tui anga nghet lova awm ve thianglo kan ni,” a ti.

“MNF chu kum 60 chuang rinawm taka kal kan ni a, Congress leh ZPM-te angin a nghing a nghing ve lo. Lungawihlohna hote tein a ngam loh lungphum chunga rem chhoh kan ni. MNF atanga mawina leh ropuina khum chhuak, a tawp thlenga rinawm leh si lo a, chhuak lehte hi kal fuh an awm ngai lo a, a tawpah tumahin ka ui ka ar an ti ngai lo. MNF-in zalenna an sual tak tak lo titute an awm thin a, Marchi ni 5, 1966-a thil thleng kha a rei tulh tulh anga thangtharten hre rengin, Mizo nationalism an chawinung tawlh tawlh ang,” a ti a.

Pathian leh mipui zarah kumin kum tawp inthlanah sorkarna neih leh ngei an inrin leh an tum ngei thu a sawi a. Congress hian pahnih khat MLA an neih chuan an vannei hle ang. ZPM pawh Assembly Session neih zawh takah khan a dik leh dik lo tih an hriat chian loh pawh an au pui dum dum a, ngaihdam an dilte a ngai leh hial a nih kha. Kan sorkar hi beihna lian tham eptute hian an hre lo a. Khawvel tibuaitu Covid kha phurrit a tling lo tite in an sawi mai mai,  Chief Minister chuan a ti bawk.

Pu Lalthlengliana, MNF Vice President pawhin Congress chu thingkung lian tak, a chhung kawrawng vek tawh ang mai, central-ah leh Mizoramah pawh, a tlem berah kum 15 chhung chawr chhuak tawh loh tur an nih thu a sawi a. ZPM pawh thu puar pawleng mai maia sorkar lai chhun zan zawma bei ngar ngar, sorkar kalphung tha zawk tura thurawn pek tur hre si lo, sorkar lai an beihna pawh ram hnuk khawih pha awm lo, thu sepselte te hmanga social media-a vawrh vak vak thin, an sorkar huna thil tha an tih tur sawi tur nei lote an nih thu sawiin, hetiang mai mai hi Zoram kaihruai tura mipuiin an thlan a rin ngai loh thu a sawi. Covid hrileng karah Pu Zoramthanga kaihhruai sorkarin hna a thawh nasatzia thu leh Health Minister Dr.R.Lalthangliana pawh Covid do nana a thawh thatzia thu a sawi bawk.

MNF Adviser, Dr.R.Lalthangliana, Health Minister pawhin, kan khawpui senior Lunglei tihhmasawnna leh thanna tur ngaihtuahin kum 2007 MNF sorkar lai khan LMC hi ruahmanna kan lo nei daih tawh a, 2008 kan tlak khan a nang zui ta hlauh a. Congress sorkar kum 10 chhung khan engmah tih a ni ta lo a. Tunah kan sorkar leh a, a taka kan tihlawhtling thei ta hi lawmawm ka ti hle a ni. Thalaite infiamna leh awmze neia development tin reng, Khawpui hmasawnna hrang hrang a lolut dawn ta a, chuvangin LMC hi ram hnuk khawih a ni. A dintu MNF LMC hi lo piantir ngei ang che u. LMC awmzia hre lo party dangten an kalpui chuan anih dan turin a kal lo palh ang tih a hlauhawm a, a nih dan tur anga kalpui thei tur MNF candidate-te lo thlang tling ang che u, a ti.

Martar-te sun nan minute khat ngawi renga din a ni. He hun hi Lunglei Municipal Council (LMC) campaign directorate chairman Pu Vanlalhmuaka’n a kaihruai a, Pu J.Dengliana, Adviser MNF Sub-Hqrs.Lunglei chuan hunserh a hmang.

He hunah hian Pu C.Lalrinsanga Minister, Pu Lawmawma Tochhawng MLA, HPC Vice Chairman, Dr.Vanlaltanpuia MLA, MYC Chairman, Dr.K.Pachhunga MLA, Vice Chairman, Bamboo Development Board-te an tel a ni.

Sd/-(R.LALHMANGAIHA)
Secretary
Media & Publicity Dept.

 

Mizo National Front
General Headquarters
Mizoram : Aizawl

Press Release

 

CHIEF MINISTER HOVIN LUNGLEI KHAWPUIAH RALLY NEIH A NI

A hringtu kan ni a, hringtu ngeiin hnute tuia chawm seilen tluka tha a awm lo. – Chief Minister

Vawiin March ni 6, 2023 Thawhtanni hian MNF Sub. Hqrs. Lunglei huaihawtin Municipal Council inthlan lo awm tur inbuatsaihna atan Lunglei khawpui chhungah kawngzawh (Rally) neih a ni. He hunah hian MNF President Pu Zoramthanga leh Pu Lalthlengliana, MNF Vice President-ten an hmanpui. Kawngzawh hi Pukpui kawnah hawn a ni a, Zobawk Community Hall tualzawlah kharna hun hman a ni.

Pu Zoramthanga chuan Lunglei Municipal Council inthlanah MNF an chak ngei a ring tih sawiin, kum tawp inthlanpuiah pawh chakna chan a beisei thu a sawi. “Lunglei mipuiin kan candidate in lo thlantlin ngei ka beisei a. In inchhir hauh lovang tih ka sawi duh a ni. A hringtu kan ni a, hringtu ngeiin hnute tuia a chawm seilen tluka tha a awm lo ang,” a ti.

Pu Zoramthanga chuan Thuamluaia mualah Lunglei mipui duh angin Flood Light dah a ni dawn tih sawiin, Lunglei By Pass road atana cheng Vbc 10 dah khan a daih lo lutuk a, Lunglei khawpui tana hmasawnna turah hman a ni a. By pass road zawhfelna  daih tur chuan Vbc 330 vel a ngai a, chutiang daih tur project siam a ni tawh a, a nawr mek tih a sawi.

MNF President chuan MNF danglam bikna sawiin, Pathianin MNF dinchhuahna tur hun a ruat a thleng chho mek. MNF beitute chu an ral zel a. Pathianin a hun a tih chuan 2018-ah MLA 27 min pe leh mai a nih kha. ‘Hnam thuthlung vuantu, thisena baptist ,hnam thuthlunga a kaihharh kan ni.

MNF kum 60 chuang nghing hauh lova ding leh kum 36 chhunga party 10 a awm hi patla khata khai chi a ni lo tih mipuiin an hre zel dawn. Zoram hi khatiang kalphung, pawl thar din reng zui tura phe phe tur kan ni lo a ti.

ZPM chungchang sawiin – theihtawpa inhampuar nan tulin an hria a, Pu Duhawma chu chief ministerial candidate atan an zuar a. Congress leh MNF hian chief ministerial candidate a hranpa in kan vuah ve ngai lo. ‘Min chhin ve teh u, kalphung thar kan nei a nia’ an ti a. Kalphung thar hlir vawi 10 vel an nei tawh. Mahse, mipuiin engahmah an ngai lo a niang, under 10 ah an awm leh thin.

An inhampuarna hmasa movement anga awm a, kohhran note nih a, unit din duh lotute khan party dinhmun an luah vek tawh. Party recognised nei turin ECI-ah an tlan vut vut a, Unit din an hmanhmawh em em si.

Ram thuthlung an sawi thei em? Hnam thuthlung an sawi thei em? Party nghet kan ni, kan inthlak ve ngai lo an ti ngam em? Tui anga nghet lo hnenah malsawmna pek a ni dawn lo a ti bawk.

Pu Zoramthanga chuan Congress chu beih tham an awm lo tih sawiin, anni angin “kihhnawk” an sawi ve ngai lo tih a sawi. Zu zuara an tlak chhiat lai tak khan Congress chu an bupui Delhi ah an tlachhe vek a ni. Beih tham an awm tawh lo zawk a ni a ti.

Congress sorkar hmasakah district thar panga an siam thut a, MNF in kan rochun a. ‘An kihhnawk kan thian’ kan ti ve lo. Kan Sorkar hmasak chhungin Kolasib, Mamit, Champhai, Serchhip leh Lawngtlaiah chuan District chu kan tungding vek hman a ni. Kan sorkar tawp lamah Saitual, Khawzawl leh Hnahthial district kan puang a, mahse sorkar thar Congress-in an hlamzuih tir a. Engmah hmalakna an nei zui lo.

2018-ah kan sorkar leh a, kan tih thin danin district thar tundin kan tan leh a. District thar pathumah DC Building thar  nuai 1000 man vek kan sa khawn uai mai a. Luah theih an ni thuai dawn.

Aizawl Thuampuiah building lian tak kan sa a, AMC ruangam kan duang vek a. Sorkar tharin AMC a kalpui hnuah kan building sak chu AMC pisa atan an hmang leh nghal mai a ni.

MNF chuan hmathlir (vision) a nei a, chumi hlawhtlin nan an thawk thin tih sawiin, “Lunglei hmasawn nan Municipal Council pawh din nise kan ti a. Kan bawhzui leh mai. Amaherawhchu, vawi leh khatah kan hmathlir hi kan tihlawhtling vek thei lo,a tahtawlin kan thawk mawp mawp mai a ni. MNF hi ram hmangaihtu dik kan ni” a ti.  Ram tundin an tumna zawna Congress tih loh sawi a ngai leh thin chu pawi a tih thu a sawi.

He hunah hian Pu Lalthlengliana, MNF Vice President chuan thu a sawi bawk a. He hun hi Minister te, MLA leh MNF General Headquarters atangin hruaitu engemaw zatin an hman pui a ni.

 

Sd/-(LALLIANZUALA FANAI )
Jt. Secretary
Media & Publicity Department
Mizo National Front
Memo No.MNF/Media/04/2023/615
Dt. 06.03.2023

 

Mizo National Front
General Headquarters
Mizoram : Aizawl

Press Release

 

Pathian leh kan ram tan tihah kan hotute an dingnghet -Rochhunga Ralte

Vawiin March ni 6, 2023 (Thawhtanni) hian Mizo Hnamrun chhung inkhawm neih a ni a. Hun hnihnaah MNF Adviser, Pu Rochhunga Ralte Ex-MLA leh Vice Chairman, Land Revenue & Survey Board ni bawk chuan thu sawiin, “Pathian leh kan ram tan tihah kan hotute an dinnghet a, manifesto tihhlawhtlin tamtak leh pawimawh tak tak MNF in a nei. Inthlan hnuhnung bera vote nuai chuanga min hnehlo tuten, kan sorkar dawn, an tih hi awih chi a nilo,” a ti.

Pu Rochhunga Ralte chuan, kan hotute Pathianin finna a pe a. India ram danpuia tarlan (article 371 G, 4.3 para) angin, kan sakhua leh ram leilung humhalh tlat a ni a. MNF ministry hnuaiah ram kan zauh a, dan lova ramdangmi lo lutte vote paihsak mek zel a ni. Sorkar laipuiin tilo mah se, kan sorkar chuan raltlante a tanpuiin a tuamhlawm mai a. Citizen Amendment chungchangah pawh kan hotute an dingnghet tlat bawk a ni, a ti.

MNF Adviser chuan, Mizo Hnam tan MNF in thiltha tam tak a ti a. Assam Rifle Khatla Ram chhuhsakin, Mizoram New Capital Complex, MINECO-din a ni a. Fund awmsa awmloin, Durtlang kawng laih zauh niin, Aizawl khawpui kawng pawimawh laihzauh a ni bawk. World Bank kawng sial hna thawh niin ruahmanna siam zel a ni bawk. Ram rotling, Millenium Centre, bus leh truck terminal leh India rama a University tha ber zing a mi, MZU din a ni bawk, a ti.

Land Revenue & Survey Board Vice Chairman chuan, MNF sorkar hian manifesto pawimawh tak tak a tihlawhtling tawh a. Ram hmasawnna pawimawh tak, district pathum dinin hnathawk theiin a siam a. Sinlung Hills Development Council(SHDC) dinin hna a thawk mek a. Eirukna dotu pawimawh Lok Ayukta adin a. Vehicle tax pek dan a siam tha a, Aizawl hmun laili atangin Assam Rifles sawnchhuah anih theihnan theihtawpin hma a la mek zel bawk a ni, a ti.

Harsatna lian tak tak karah MNF sorkar chuan kohhran leh tlawmngai pawlte tha taka thawhpuiin, hmasawnna tamtak hmuh turin a awm zel bawk a ni. Inthlan kan hmachhawnah hnehna kan chang deuh zel bawk a. Tun hnaia loan thami kan hmuh leh project leh hmasawnna pawimawh lo lut mek zelte hian eptute lu a tihai hle a ni, Pu Rochhunga Ralte chuan a ti bawk.

Mizo Hnamrun chhung inkhawm hi Pu R. Kapzaua, Adviser, MNF Gen. Hqrs. chuan kaihruaiin, Pu PC. Vanlalruata, Secretary, MNF Gen. Hqrs chuan hunserh a hmang a. Pu Sangvuana, Vice President, Saiha Dist.Hqrs. hnen atangin Saiha district leh chhimlam politics dinhmun leh, MNF dinhmun a derthawng loh  zia report kimchang ngaihthlak a ni bawk.

 

Sd/-PETER CHHANGTE
Jt. Secretary
Media & Publicity Department
Mizo National Front
Memo No.MNF/Media/04/2023/614
Dt.6.03.2023

Mizo National Front
General Headquarters
Mizoram : Aizawl

Press Release

DIARY NI SI, LEHKHABU RAWN A NGAH LUTUK AVANG HIAN THUDANG BELH A TAM HLE.

KUM 2023 INTHLANAH MNF A TLING LEH NGEI ANG.

– Er.K.Lalsawmvela, Adviser to Chief Minister (Technical)

February ni 24, 2023 (Zirtawpni) hian Mizo Hnam Run chhung inkhawm hun hnihnaah Er.K.Lalsawmvela, Adviser to Chief Minister (Technical) chuan thusawiin, Pu Lalnunmawia diary kha MNF tan chhiatna leh pawina a awm loh thu a sawi a. Tuna a diary ziah hi a lar thar hle a, opposition party-ten an phur pui hle a, Pu Laldenga paihthlak tuma beitute kha an ni. Diary ni si, lehkhabu rawn a ngah lutuk avang hian thu dang belh a tam hle a ni, a ti.

Ram hnuai sorkarah khan President chu amahin a bang emaw, a thi emaw anih loh chuan thla 6 hnuah Vice President chu President-ah thlan a ni ang tih chauh a ni a. President aiawh thla ruk chhunga thlan tur thu hi, constitution of Mizoram Article 5 section 2(5) sawi dan kha a ni, President charge latuin Vice President thlan Parliament a, a dil tlat kha Pu Denga phiarna hmasa ber niiin a lang. Pu Lalnunmawia Vice President ni si kha, a lehkha chhhuahah President tiin a inziak thin a, President tiin lehkha pawh a hnen a thlentir thin. Pu Denga kha tlanbo a ni lo a, a awm loh laia President leh Vice President lo thlan theihna dan kha a awm lo. Parliament khan, Pu Nunmawia thil tihdan dik loh avangin Vice President atangin an paih ta a ni, a ti a.

Er.Sawmvela chuan, Pu Denga dam laia ziak ngam si lo, a thih tawh hnua duh dan dana lo ziah kawi hi a dawihzep thlak a, a pawi hle. Ram tana kan Hnam pasalthate khan a derin nunna an chan lo, Independence sual sawi bawrhbangtute hi nakinah thang tharten an la dem ang. MNF hi Hnam thuthlung kengtu, hming la thlak ve ngai lo a ni a, party dangten sawi chhe thin mahse, a kal zel dawn a ni, a ti.

Adviser to Chief Minister chuan MNF sorkar thil tih that sawiin, “Lengpui Airport pawh hi Pu Denga sorkar bultan a ni a, sorkar kha a rei lo em a, Congress sorkar khan a chhunzawm ta hlauh a. Bawngkawn to Chanmari road pawh hi tun hmain a zim hle a, Pu Denga sorkar khan huaisen tak khan a zauh a ni. Pu Zoramthanga sorkar hmasaah Bawngkawn to Durtlang kawng hi siam a ni a. Tun sorkarah Durtlang to Sihphir kawng pawh thawhtan thuai a ni ang. Aizawl to Lunglei world bank kawngte hi MNF sorkar hmasa kut chhuak a ni a. Millennium Centre, Aijal Club, MINECO-a building ropui tak tak te, Ch.Chhunga bus terminal, Ch.Saprawnga truck terminal-te leh sorkar building lian tak tak hi MNF siam vek a ni. National Highway hmasa 4 kha MNF sorkar hun chhungin state sorkar enkawl turin Central-in a pe a. Congress hun 2016 khan National Highway engemaw zat chu NHIDCL kuta awm turin central-in a siam a ni, a ti

Covid hrileng karah development tam tak zingah 2019-2022 khan PWD hnuaiah kawng 615km sial thar a ni bawk. Hunthar lei tla hniam kawng pawh sawi selbo a ni ta. Tun sorkarah pawh building ropui tak tak 43 sak zingah MINECO-a High Court building-te hi a lian zual zinga mi a ni. Department hrang hrangah development nasa tak kan hmu a, Health, Water supply scheme, Power leh MI lamahte nasa takin hmalak a ni,” a ti.

MNF Adviser chuan, Opposition-ten Chief Minister an beihna hrang hrangte hi sevedal in zirtirna, ‘dawt 100 i sawia pakhatin a awih chuan i hlawhtling a ni’ tih inzirtirna kha a ni a, a beitute hi ui ketang chiau, kal ngaihna hre tawh lo ho an ni. ‘Beram hmul mettu hmaa ngawi reng’ ang maiin kan Chief Minister hian a beitute a beilet ve ngai lo. Opposition-ten an sawi ber Abu Majumdar pawh hi Congress sorkar hun lai atang tawha Mizoram buhfai supply-tu ber a ni. Assam nen kan inkah khan Assam Chief Minister chuan Pu Zoramthanga rawn biak a duh a. Assam Chief Minister chuan Abu Majumdar ruaiin palaiah a tir a Delhi-a an inbiakna thlalakah Abu Majumdar chu lolang vein, social media-ah Pu Zoramthanga hruai angin an puh hlauh thung a, Assam Chief Minister hruai zawk a ni. Abu Majumdar kha Assam leh Mizoram inbiak nana leihlawn dawhtu leh dinner buatsaihsaktu anih avanga dinner table-a awm ve chauh ani. Pu Zoramthanga hruai a ni lo. Kamrula Chhangte tih pawh hi Congress hun laia tribal certificate pek a ni a, Congress sorkarah khan contract hna lian deuh deuh hmun riatah a hmu a, cheng nuai 4400 chuang man hna a thawk a ni, a ti bawk.

Er.K.Lalsawmvela chuan Congress sorkar khan NLUP kha an sorkar term tawp lamah thenkhat instalment-in an pe thei chauh a. Covid hrileng karah Pu Zoramthanga sorkar chuan cheng 25000/- in bul a tan thei a, 2nd instalment pawh March thla ral hmaa pek chhunzawm tum a ni a, a la tawhte pawh pek chhunzawmin a la dawng lote pawh pek zel an ni ang. SEDP leh SASCI hmang hian MNF sorkar chuan bial tinah hna thawkin 2023 MLA General Election-ah kan tling leh ngei dawn a ni, a ti.

Congress party hi Central-ah leh State tinah an tlachhe nasa tawh em em a. Thingkung lian pui, a chhung kawrawng vek tawh, tlumpi leh rannung ten an ei khawro vek tawh, a zarah pawh savate an fuk a, ei tur an hmuh lohna ang hi a ni a, a zar peng MPCC ho tan sorkar ngaihna a awm lo. ZPM pawh hming hrang hrang nei, party hrang hrang atang a beidawng kalkhawm, colour hrang hrang inchawh pawlh, colour hran theuh nei an ni a, a hmaa Unit kan nei lo ang ti kha Chakma ram thlengin Unit an nei tawh a. Leader nge President lal zawk tih pawh a hriat loh, mihring ngai reng hming thar mai a ni a, a hmaa MLA an neih zat kha an nei phak tawh lo ang, 2023 inthlan hnu hi chuan an zuihral vekin ka ring. ZPM, Z for ZNP, P for PC, M for Exodus Movement, an ni a. Sapin ‘old wine in a new bottle’ an ni, a ti bawk.

Pu R.K.Hmingthanga Secretary chuan Hachhek ‘W’ Block fan chhuah chungchang report a pe a. Pu Varthanzama Secretary pawhin Hachhek ‘E’ Block tlawhchhuah chanchin report a pe bawk. Report petute hian khaw hrang hrang an tlawhah MNF boruak a that thu te, ZPM/Congress/BJP dinhmun a hniamzia thu te, tun dinhmunah inthlan pui hmachhawn mah ila; MNF candidate tan tlinna chance a that ber thu te, party mipui an phur thar viau thu leh party hrang hrang atanga mi thar engemaw zat an lawmluh thu an sawi.

Pu K.Vanlalauva, MNF Treasurer chuan MNF ni pawimawh paruk zinga hman hmasak ber tur ‘Independence Day’ kha ‘National Day’ tih a ni tawh a, kum 1966 atanga hman tan, a vawi 57-na tur chu March ni 1, hian MNF Senior Vice President, Pu Tawnluia, Deputy Chief Minister hova Mizo Hnam Runah urhsun taka hman anih tur thu a puang.

Chhung inkhawm hi Pu Vanlalrema Rokhum, Adviser chuan a kaihruai a, Pu H.Manga, Secretary chuan hunserh a hmang.

Sd/-

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/04/2023/610
Dt.24.02.2023