Indian Constitution Article 243 leh 74th Constitution Amendment Act 1992 in thuneihna a pek angin, Mizoram khawpui Aizawl Municipal Council chu, Aizawl Municipal Corporation-ah hlankai a ni ta a. Aizawl khawpui hmasawn nana thil tha leh lawmawm tak a ni.

Chutih rual chuan Aizawl Municipal Council term hmasa ber (2010 –2015) chu Sorkar ngel nghet (Majority) awm loh avangin nasa taka sawp kual a ni a, hei hian mipui a ti luhai a, khawpui hmasawnna a tithuanawp hle a ni. AMC hi uluk taka MNF Sorkar-in Assembly rorelna kal tlanga a siam a ni a, chuvangin AMC \ha taka a kal hi MNF Party chuan a duh dan a ni. Kum 2015 AMC inthlanah MNF chuan Sawrkarna (Majority) a la ta a, Mipui beisei ang ngeiin Sawrkar ngelnghet chu a din ta a ni. Congress Sawrkarin harsatna tamtak a siam chungin, Aizawl khawpui in hma kan sawn phah viau thoin a lang. MNF in Sawrkarna kan siamlaia AMC-a MNF Sawrkar siamtir hi Aizawl hmasawnna atan chuan a pawimawh hle mai.

MNF Party chuan AMC-ah Sorkar tha leh ngelnghet a din theih nan mahni in a ding leh dawn ta a. Aizawl Municipal Corporation hi ram neitu dik tak thinlung putu MNF Party hi mawhphurhna latu kan nih ngei tulin kan hria a ni.

MNF Sawrkar hmasa (Pu Laldenga 1987 & 1988 leh Pu Zoramthanga 1998 – 2008) in Aizawl tana hma a lo lak tawhna thenkhat te:-

1. Aizawl khawpui chhung kawngpui Bawngkawn –Ramhlun-Chanmari tih zauh hna tha tak a an thawh te;
2. Assam Riffles Hqrs. Zokhawsang hmuna insawn chhuak tura hmalakna chak taka kalpui; (A hnu Congress Sawrkarin an bawhzui tak loh te);
3. Treasury Square atanga Pachhunga University College thlenga kawngpui zauh te;
4. Pu Laldenga hma lo lak tawhna bawhzui a Assam Riffles-te Zokhawsang hmuna sawnchhuah nana chak taka hma an lak zui avanga hnathawh tan alo nih leh tak te;
5. Aizawl khawpui tawt lutuk tih zia awmna atana Assam Riffles-in Khatla veng chhunga ram zautak an luah thinna hmun ngei maia New Capital Complex ropui tak a sak te kha Aizawl mipui hian kan theihnghilh mai theih hi kan ring thei lo a ni.
6. Bawngkawn – Durtlang kawngpui tha tak leh zau taka a siam te;
7. Committee leh intawhkhawmna hrang hrang atan mipui vantlang hman theih tur, Aijal Club/Aizawl City Centre Building ropui tak an sak te;
8. Aizawl Bazarpui (New Market) leh Aizawl veng hrang hrang Bazar tha tak tak an sak te;
9. Mizoram Super Market lian leh changkang ber Millenium Centre an sak te;
10. Rangvamual Motor Truck dahna hmunpui, Ch. SaprawngaTruck Terminal an siam te;
11. Thuampui venga Ch. Chhunga Inter State Bus Terminal an siam te;
12. Chaltlanga Lalsawia Bus Terminal an sak te;
13. World Bank sum hmanga Aizawl By Pass Road, Falkland to Melthum an siam te;
14. Thalai rualawhna hria a Lammuala Rajiv Gandhi Sport Stadium sak tura ruahman fel vek tawh leh pawisa awm sa vek tawh, a hnua rawn Sorkarte’n Mualpuia an sawn tak daih te;
15. Zirna lama Mizoram hmasawnna tura Tanhrila Mizoram University changtlung tak te, Selesih-a Vety College leh ICFAI University an din te;
16. Assam Rifles ram la hek a, Dak Inpui atanga Aizawl chhuah lam kalkawng siam te;
17. Infiamna lama hma kan sawnna tura Ramhlun Sport Complex ropui tak an siam te;
18. Aizawl khawpui chawmna tura Tlawnglui Pump chhuahna hna Greater Aizawl Water Supply Scheme Phase II an siam te;

Han hmuh ngawt pawh hian Aizawl khawpui enkawlna tura hma lakna hrang hrang ah, “Ram neitu diktak nihna thinlung putu” MNF Party sawrkar hun chhunga hma an lo lak nasat ziate kha, han sawi vel hian chiang taka hmuhtheih vek an la ni.

Chuvangin, Zoram mipui te leh a bik takin Aizawl khawpuia cheng te phei hi chuan hengte hi theihnghilh mai lo a min hriatsak leh tur pawhin kan in ngen nghal bawk a ni.

Chutichuan, Mizoram inpawhna leh sumdawnna kawng pawha kan hmunpui lian ber, Aizawl khawpui inenkawlna leh in awpna hna hi keini MNF party koa nghah anih phawt chuan, Hun reilote chhungin Aizawl khawpui hmelhmang leh landan hi, mawitak, tha tak leh fel fai takin kan cheidanglam thei ang tih kan ring tlat a, kan tum tlat a ni.