K.VANLALVENA’N TLAN TLIN ANIH CHUAN MIZO THALAI, KUT HNATHAWKTUTE LEH BORDER TRADE A NGAIH PAWIMAWH HMASAK TUR THU A SAWI

Mizo National Front
General Headquarters
Mizoram : Aizawl

Press Release
  • K.VANLALVENA’N TLAN TLIN ANIH CHUAN MIZO THALAI, KUT HNATHAWKTUTE LEH BORDER TRADE A NGAIH PAWIMAWH HMASAK TUR THU A SAWI
  • ┬áDR.R.LALTHANGLIANA’N PU K.VANLALVENA VOTE VEK TURIN ZORAM MIPUI A NGEN
Vawiin April ni 12, 2024 (Zirtawpni) hian Parliament 18th Lok Sabha Election lo awm tura campaign mek Pu K. Vanlalvena, Mizo mipui MP candidate leh MNF Sr. Vice President, Dr. R. Lalthangliana te chuan Darzo, Hnahthial, Thiltlang, Pangzawlte leh Chhiahtlangte tlawhin thu an sawi a.

Mipui candidate Pu K.Vanlalvena chuan MP (LS) ah thlan tlin anih chuan hmalakna tam tak awm tur zingah a ngaih pawimawh hmasak tihhlawhtlin ngei a tumte a sawi a. Mizo thalaite eizawnna dapsak chungchang te, buh leh bala intodelh tura kut hnathawktute dinhmun chawisan te, ranvulh tute tana hmalakna tur te, border trade chungchang te chu a hna pui ber tur a nih thu a sawi. Mizoram tana ka hmalakna hrang hrangte tihhlawhtlin theihna tur chuan central sorkar leh ZPM sorkar pawh tha takin ka thawhpui ang, a ti.

Zoram thalai rual lehkha thiam leh thiamlote eizawnna a ngaih pawimawhzia sawiin, “Gujarat-a Diamond siamna hmunah ka kal a, ka be fo bawk a. Lehkha thiamlo tan pawh Diamond nawhtletin hlawh tam tak an hlawh thin, hetah hian Mizo thalaite training pe a, an luh theih nan hma ka la ang. India ram leh khawvel hmun hrang hrangah company leh hnathawhna hmun hrang hrangah an luh theih nan nasa takin ka bei ang. Sports lam kaihhnawihah thalaite tan eizawnna tlak hna a tam tawh em em a, Mizo thalai tam takin eizawnna atan an hman theih nan hma ka la ang a, hei hi ka ngai pawimawh em em a ni. Korean zaithiam, K-pop te hi thalaiten an ngainatzia kan hre theuh a, Mizoramah ko lutin Korean tawng zirna instituion din turin hma ka la ang,” a ti a.

Mizorama kut hnathawktute thawh chhuah tlemzia hian a rilru a tih nat thin thu a sawi a. Buh leh bal, thlai hrang hrang chingtu te, sawhthing, oil palm, aieng, hmunphiah, hmarcha chingtute tan minimum price support ngaihtuahsak ngei a tum bawk. Parliament session-ah Mizoram, Arunachal leh Nagaland ah oil palm hralhna a chhe lutuk a, kg ah Rs 10 aia tlem lova hralh ka rawt chu a hlawhtling a, session leh hunah a aia sanga an hralh leh theihna turin rawtna ka thlen leh ang. Kuhva chungchangah harsatna kan tawk fo a, heng atan pawh hian thlan tlin ka nih chuan nasa takin hma ka la ang,” a ti bawk.

Pu K. Vanlalvena hian Model Village a thlan zinga pakhat Pang khua chu khaw pawimawh tak, nakin zel atan thenawm ramte nen inkalpawhna kawng a puitlin huna ramri khua pawimawh em em tur anih avangin, Solar High Mast ka phun sak dawn a, ban eng zat nge phun tur chu ka sawi thei rih lo a, he ta tan hian cheng nuai 100 sanction a ni tawh a, inthlan puan avangin thawh theih a la ni lo a, inthlan zawhah thawh a ni ang. Sikul naupangte tan Solar water filter pawh dahsak ka tum a, hengte hi MP fund ni lo, central sum CSR atanga ka nawr chhuah a ni, a ti bawk. Assam lam nena buaina a awmin kan ei bar chawkluhna min hrek fo tihreh nan Kawrpuichhuah border trade te, Tuipui D lei dawh tur hmalakna kal mek leh muang lutukte chu thlan tlin a nih chuan chak zawka hmalak ngei a tum thu a sawi bawk.

Dr. R. Lalthangliana, Sr. Vice President MNF pawhin Pu K. Vanlalvena chu Zoram mipui vote vek tura ngenin, kan ram leh hnam, kan sakhua a him zel theihna tura thisen far tawp thlenga tang ngam tur a ni a ti.
Sd/-
(R.LALHMANGAIHA)
Secretary
Media & Publicity Deptt
Mizo National Front
Memo.N.64/2024
Dr.12.04.2024