India ram inrelbawlna insingsa mek kara Mizoten aiawhtu huaisen leh rintlak kan neih chhunzawm chu kan ram leh hnam tan thil pawimawh em em a ni. -Lalruatkima, Ex-Minister,Treasurer, MNF

Vawiin ni 9, April, 2024 hian Aizawl Municipal Corporation huamchhunga Mizo National Front Local Council Member te chu inhmukhawmin, Aizawl khawpui enkawlna kawnga Aizawl Municipal Corporation hnuaia Local Council ten hna an thawh dan hrang hrangte an thlir hova, MP(LS) inthlan lo awm tur te ngunthluk takin an thlirho bawk.

He hunah hian Pu Lalruatkima, Treasurer MNF leh Vice Chairman, MNF MP(RS) Election Campaign Directorate chuan thusawiin, Aizawl chhunga Local Council tinte mipui tana an inpekna leh veng tin hmasawnna atana an hnathawhte fakawm a tih thu sawiin, hun harsa leh khirhkhan kara mipui aiawh zo taka hruaitu hna an thawh chu mipuite tan malsawmna a ni a ti. Veng tinin hmasawnna tha leh mipui thlamuanna kan mamawhin kan duh theuh a, chutiang a thlenna tura MNF sawrkar lai hun leh tun ZPM sawrkar tak hnu hi thil inthlak duaai lo se a duhthu a sawi a, Mipui mamawh te hnianghnar chhunzawm zel se a duh thu a sawi bawk.

Pu Ruatkima chuan MP Inthlan kan hmachhawn turah kan ram, kan hnam leh kan sakhaw himna kan dah pawimawh a tul thu sawiin, Pu K. Vanlalvenan chakna a chan ngei theihna turin kil tinah theihtawp kan chhuah a tul thu sawiin, Aizawl Munipal huamchhunga Local Council member tinte chu theihtawp chhuah turin a sawm a, India ram inrelbawlna insingsa mek kara Mizoten aiawhtu huaisen leh rintlak kan neih chhunzawm chu kan ram leh hnam tan thil pawimawh em em a ni a ti bawk.

Kalkhawmte chuan heng a hnuaia Resolution tarlante hi lungrual takin an pass a ni.

1. AMC huamchhunga veng hrang hrangten MNF Ministry hnuaiah nitin mamawh chi hrang hrang – Gas, Tui, Buhfai etc. hnianghnar taka kan hmu thin kha lawmawm kan tiin

ZPM Sorkar hnuaiah Aizawl Khawpui in hun hmasa lama Tui hnianghnar leh Gas/Buhfai Supply kan dawn thin ang dawn leh kan in beisei tlat a, Fur leh Thal lo thleng turah hian ruahmanna fel tak lo nei lawk turin kan beisei a ni.

2. MP(Lok Sabha) Inthlan lo awm tura Zoram Mipui Candidate Pu K. Vanlalvena, mi huaisen leh hrat khawkheng, hnam pasaltha kan nei hi a lawmawm kan tiin, kan chhuang takzet a. MP(RS) a nih chhunga a hnathawh leh a chet dan en in MP nihna tihlutu a ni a, thlan tlin chakawm tak leh rintlak a ni, kan ti.

3. Mizoram mipui aiawha Parliament House a thu tur hian Pu K. Vanlalvena hi kan ring tawk a, Hnamdang kara zam hauh lova, a Mizo nihna leh Kristian nihna a lantir ngam te, Mizoram mai nilo, kan thenawm ramdang leh state danga awmte harsatna a taka hre chung a, an thlavang huaisen taka a hauh ngamte hi fakawm kan ti takzet a. A huna huaisen ngam MP neih chhunzawm zel hi kan duh takzet a ni.

4. Kan State thenawm(Assam) nena ramri nena buaina kan tawh chungchanga huaisen taka a auchhuak ngam kha ropui kan tiin kan chhuang takzet a, Assam Sawrkarin man tuma a police uisathiam nen an um rap rap na kara zam hauh lova a hmachhawn ngamte kha chhuanawm kan tiin, Mizoram tana Pasaltha nihna a nunpui ngamah kan ngai a, Nunpui chhunzawm zel turin hun tha Zoram tana thawk zel turin kan duhsak takmeuh a ni.

5. Sakhaw tlem zawk leh hnam tenau zawk kan nih avanga India ram chhunga nekchep kan nih mekna kara huai taka ding chhunzawm ngam tur MP kan neih chhunzawm ngei hi kan duh takzet a ni.

6. He inthlan lo awm turah hian Zoram puma hnehna kan channa tura Aizawl khawpuiah hian hnehna sang tak kan chanpui theih nan theihtawp chhuah kan inhuam a. Kan ram, kan hnam leh Sakhaw him nan Zoram Mipui zawng zawngte Pu K. Vanlalvena Vote vek turin kan sawm tak meuh a ni.

He hun hi Pu Tawnluia, Chairman, MNF MP(RS) Election Campaign Directorate chuan kaihruaiin, Pi Vanlalbuki, Secretary MNF & Vice Chairman, Mission Vengthlang LC chuan hunserh a hmang a ni.

Sd/-

(LALTHAKIMA)

Joint Secretary

Media & Publicity Deptt

Mizo National Front

Memo No. 60/2024

Dt.9.04.2024