GENERAL SECRETARY, MEDIA & PUBLICITY DEPARTMENT, MNF GENERAL HQRS, AIZAWL, MIZORAM

• 91 9436144919 www.mnfparty.org

PRESS STATEMENT August 26, 2023

PATHIAN HRUAINA HNUAIAH MIPUITE DUHSAKNA HMANGIN KAN SAWRKAR LEH NGEI ANG – MNF

Kum 2018 kum tawp khan Pathian leh mipui zarah MNF chuan sorkarna a siam a. Kan Chief Minister, Minister leh MLA rualten theihtawp chhuaha bul tanin, an chanvo theuh ah an bung nghal phat a, an tha tichak tur leh zau zawk a hma la turin SEDP Board pawh 14 siam nghal a ni a, heng board te pawh hian ruahmanna leh hmachhawp an nei nasa hle a ni. Sorkar hmasain a hnutchhiah sum awm ang hmangin hun rei tak Zoram hmun hrang hrang kawng chhia, mipuiin kan nin em em leh harsatna tam tak kan neihte phuhrukin chei that an ni a, a tul hmasa ni a hriatah te chak takin hmasawnna kalpui nan hman a ni.

Thapui thawhin hnathawkin kan bung tan hman chauh a, hna bul tanin, hnathawhna tura Central lama Project leh dilna thlen pawh thahnem tak a awm hman a. Kum khat vel awrh hnuah khawvel pum huapin kan hriat ngai loh Hripui rapthlak takin min nuai ta kha a ni a. Hnathawh chu sawiloh, a kawng awm ang ang hmanga dam khawchhuah kan tum tawp a nih kha. Alo thleng dawn tih hre lawk kan awm lo a, inbuatsaihna engmah a awm thei lo, sum emaw, ei leh in emaw kan neih sa ang ang kan hmang a, kan bei a, kan do a, kan hmachhawn tawp a, kum hnih chuang zet kha hripui khan min nuai a ni. Khawsak phung a buai vek a, khawvel sum leh pai a tihbuai dan zawng zawng hre chiangtu chu kan Media mite pawh in ni.

Covid avanga Mizoramin sum kan hmuh tur kan hmuh loh, hloh zat leh hloh dan RTI hmanga Pu J. Lalramnghaka zawhna, Finance department a chhanna chu
(a). FY 2019-20, January-March 2020 inkarah Share of Taxes-ah Rs.867.39 crore,
(b). FY 2020-21 chhungin Share of Taxes-ah Rs.1093.73.crore.
(c). FY 2021-22 1st quarter-ah Share of Taxes-ah Rs.125.46 crore
(d). 15th Finance Commission Special Grants ah Rs.546.00 crore.
Total = Rs.2632.58 crores a ni. (Document Attached).

Hetih lai hian Central lam atangin Vbc 70 bawr vel Hripui do nan hian lokal awm mahse, a hmanna tur ruahman sa, ruahman a nihna baka hman sawn theih lem loh te an ni. Chief Minister Relief Fund- a sum tlingkhawm cheng 31,37,73,096/-a awm bawk. Heng te hi Committee on Utilization of Chief Minister’s Relief Fund for COVID-19, Chief Secy.kaihhruaina hnuaiah MKHC leh CYMA hruaitute telna in a ruahman anga hman chhuah zel a ni. Ruahman lawkna awmlo heng Raltlan puihna, Business 20 thlenna, Youth 20 district tina buatsaihna, International Tourism Mart 2022 thlenna atan cheng nuai 1463.25 hman a ni a, heng hmanna hi Raltlan puihna atan cheng nuai 300 bak hmuh let a awm hrih lo.

Harsatna in nasa taka min nuai na karah hian Mizoram Sawrkar hnathawk te hlawh pawh Pathian zarah kan sawrkar hian a pe thei zel a. Scheme leh Project thenkhat hnuaia thawk, central lamin duh anga sum min pek khawtlai thin te tih loh chuan an thlabi hlawh pawh khel lovin an dawng thei kha a lawmawm takzet a ni.

Hripui leng chauh ni lovin Vanduaina thuahhnih thuah thumin min nang zui a, khawchhak lamah vawi tam tak lir nghingin chhiatna tamtak a thlen a, chhim lamah rapthlak takin ram a kang a, thil tam tak a tichhia a, a thelh nan tha leh sum tamtak sen ral a ni. Vawk pulh hri namen lovin a leng a, mi tam tak eizawnna leh inghahna ber vawk tam tak an thi puk puk a. Ramri buai avangin kan thenawm Assam nen kan inkap hial a, hun rei tak, kan eihmuhna kawng min dan chah sak a nih kha. Khaw chhak lama unaute Myanmar politics buai avangin thahnem tak lo tuam hlawm an ngai a, chutiangin Bangladesh lam atangin thahnem tak himna zawngin an rawn tlan lut bawk. Manipur atangin kan unau tam takte kan lo chhawmdawl mek bawk a ni. Election dawn apianga kan buaipui thin Tuikuk pawh anmahni remtihna thlapin kan Chief Minister hmalakna in Tripura awm nghet turin chinfel a ni ta bawk.

Kan sorkar hian a hriat lawk miah loh, harsatna chi hrang hrang hi a hmachhawn tam em em a, kan budget-a awm sa miah lo, sum tam tak luanralna hi a tam em em a. ‘Dam leh tlang khatah, thih leh ruam khatah’, ti thin hnam kan nih anga kan unaute chunga huai taka kan Chief Minister kaihhruaina hnuaia kan hmachhawn tlan mek pawh hi a tam em em a ni.

Hriatlawk loh harsatna namen lovin min tlakbuak karah a remchan ang anga theihtawp chhuah a, kan sawrkar hmalakna tam tak a awm thei hi a lawmawm kan ti em em a. Ei leh barah hnianghnar taka chatlak awm hauh lova kan awm te, Tui leh eng kan hmu tha viau mai te, Kawngpui thar tam tak sial te, a hlui chhe tawh thawm thatte, Lei thahnem tak dawh a ni te, Sawrkar Building tam tak sak thar leh thawmthatte, Damdawiin tih changtlun leh thawktu indaih lohna thawm that te, sawrkar hnathawk tam tak lak belha a awm te, Khelmual changtlung tam tak siam thar te, District thar Pathum ngawt mai a nihna anga hnathawk theia siamte, heng district thara department tam tak hawn thar leh a awmsa tih len te, kum upa te duhsakna lantir leh hamthatna pek te, zirna tha zawk leh changtlung zawk neih belh te leh a dang tam tak a awm a ni. Hnam rilru kan put zual deuh deuhna tura inzirtirna leh a taka kan kalpui mawlh mawlh te hi a ropui kan tiin, chhuanawm pawh kan ti takzet a. Kan ram hruaitute thawhrimna nasa tak leh ram mipui ten kan thlawp tlatna hi Mizoram kan mawina tizualtu a ni.

Hun khirh leh hun harsa kan tawh mekah, abikin kan unaute chenna hmuna buaina awm mek hi vawi leh khatah a kiang duakin a rinawm hauh lova, unauza kan nih angin induhsak tawnna nen kan hmachhawn zui zel hi engemaw chen ala ngai ngeiin a rinawm a, he hun harsa tak kara ram kaihruai tura Pathianin a ruat Pu Zoramthanga kaihhruai sorkar hi hun laklawha thlauhthla lova, Zoram mipui hmanga hun ralmuang zawkah Engkim tithei kan Pathian hian min hruai kai ngei kan ring tlat a, kan beiseina pawh a ni.

He sorkarin a a hun tawngah harsatna a tawh hrang hrangte avanga min beisei ang kan phak tawk lohna tam tak a awm kan ringin, heng harsatna hi a taka kan tawh ho vek a nih avangin Zoram mipuiten thuk takin min hriatthiam sak ngei kan ring tlat a, tihdikloh leh tihfuh tawk loh tam tak pawh kan neih ngei kan ring. Heng te hi min hriatthiam sak a, hun ralmuang zawk lo thleng zel tur beiseina nen, hun tha min siamsak leh ngei turin Zoram mipui zawng zawng kan sawmin, kan ngen tak meuh a, Pathian hruaina in Zoram mipuite duhsakna hmangin kan Sawrkar chhunzawm leh ngei kan ringin, kan beisei tlat a ni.

Issued by Media & Publicity, Department, MNF General Headquarters, Aizawl, Mizoram