Pathiana innghah tlat hi a fuh ber -Lalrintluanga Sailo, MLA
ZPM party hi foundation neilo party a ni-Lalchamliana, Ex Minister

Vawiin April ni 12, 2024 (Zirtawpni) hian Mizo Hnamrun chhung inkhawm neih a ni a. Hun hnihnaah Pu Lalrintluanga Sailo, MLA, adviser MNF Gen. Hqrs. chuan thusawiin, “Kawng engkimah Pathiana innghatin, kohhran belh tlat mai hi a tha ber mai. Duhamna leh chapona hian mihring a hnukhniam thin. Mahni inen zel ila, Pathianin min chawisang mai thin. Pathian min hruainaah hian lawm hle tur kan ni. Kan hmalawka MP thlan lo awm turah pawh hian Pathiana innghat chungin hmachhawn ila, kan candidate in a zir bawk a, hnehna kan chan ngei a rinawm, “a ti.

Pu Lalrintluanga Sailo chuan, Dampa bial chhunga hriselna, inkalpawhna, hriselna, zirna, tui chungchangah hmasawnna tamtak kan hmu a. A bialtu ka nihna angin bial mipuite aiawhin sorkar hmasa lakah lawmthu ka sawi a ni. Bial chhung hmasawnna atana sum lokal ah cheng khat mah ka la lo, a ti.

MNF adviser chuan, opposition kan nih hnuah, unit level atanga Gen. Hqrs. level thlengin party mi nghing sawitur an awm manglo ang. Mi nghet kan ni a. Pathian leh kan ram tan kan tih tak tak angai a ni, a ti bawk.

Thusawitu dang Pu Lalchamliana, ex minister chuan, “Parliament hi tawng thiamte invawrhna tur leh, tawng thiamte thusawi tam na hmun a ni lo a. MP te quality zawk a pawimawh ber. Ram leh hnam veimi, sakhaw himna ngai pawimawh tu an nih a tul hle. Rem leh remlo chunga house chhung leh pawna ram leh hnam, Zofate tana auchhuak thin, Pu K. Vanlalvena hi MP tha anih zia kan hre tawh a. Ani tluk tur hi an awmlo, “a ti.

MNF adviser Pu Chama chuan, ruling lai te hian MP inthlan ah hian chak an in beisei hle anga, amaherawhchu, an chak dawn tih a chianglo hle. Hun hmasa lamah opposition lamin MP ah chakna an la fo. Chuvangin, beiseina sang tak kan nei a ni. ZPM party hi foundation neilo, midangte thiltih sawisel thiam em em, party hrang hrang leh pawl hrang hrang kalkhawm an ni a. Rei an daih a rinawmloh. MNF erawh chu martar te thisena nemngheh, ram leh hnam tana zalenna sual ngam kan ni. Mihuai kal hmasate hniakhnung zui zel ila, nghet leh rinawm takin hmalam i pan zel ang u, a ti bawk.

Mizo Hnamrun chhung inkhawm hi Pu K. Vanlalauva, Adviser MNF Gen. Hqrs. chuan kaihruaiin, Pu C. Lalnunmawia, President, Mission Veng Unit (S) chuan hunserh a hmang.