Mizo National Front
General Headquarters
Mizoram : Aizawl

Press Release

MIZO NATIONALISM VAWNGNUNGTU MNF HI ZOHNAHTHLAKTE TAN INNGHAHNA TLAK A NI
– Dr. Irene Lalruatkimi

Vawiin September ni 11, 2023 (Thawhtanni) hian Mizo Hnamrun chhung inkhawm neih a ni a. Hun hnihna ah political session hun hman niin, resource person Dr. Irene Lalruatkimi, Associate Professor, MZU chuan, “Mizo Nationalism vawngnungtu MNF hi Zohnahthlakte tan innghahna tlak a ni a. MNF hi ram leh hnam hmangaihna avanga lo piang a ni. Assam sorkar hnuaiah fahrawn ena en kan ni a, District Council enkawlna sum beitham em em mai min pe a, mautam tam a lo thleng zui leh bawk nen, ram leh hnam chhanchhuah nan MNF a lo piang ta a ni. Tun hun kan thlen theihna atana lo tuara, nunna hial lo hlan tute kha zahna chibai kan buk thar leh a tul hle a ni,” a ti.

Dr. Irene-i chuan, Covid hripui len laiin sorkar tha kan nei tih a lang a. Central atangin kan sum hmuhtur tamtak kan hmulo a, phai leh ramdang atangin kan mi leh sa thahnem tak an lo haw khawm a, sorkarin theihtawp chhuahin a lo tuamhlawm a. Chutih laiin, ran hri a leng a, lirnghing nen, kan thenawm ramah kan unauten buaina leh harsatna namenlo an tuar bawk a. Mi tamtak an rawn raltlan a, central sorkarin nawrlet tura min tih pawh pawisa loin, kan unaute an ni, tiin kan sorkarin theihtawp chhuahin a lo tuamhlawm a. Ramri buaiah silai phawrh ngam sorkar kan nei. Hun harsa leh khirh taka sorkar turin Pathianin MNF a ruat tih hi a chiang hle a ni.

Hmun hrang hrangah kawng hrang hrangin hmasawnna a lo thleng zel a. Thalaite tan sorkarin nasa takin hma a la zel a. Chimrala kan awm mailoh nan kan nationalism hi kan vawnnun reng a pawimawh hle. Thalaiten kan ram leh hnam, kan sakhaw himna kan ngaih pawimawh a tul takzet a ni. Thalaite hian social media a, thlalak leh mi thusawi nazawng hi an awih mailo. Thlalak leh a tak hi a inanglo fo tih leh thu belhchian dawllo a tam hle tih hi an hailo a. Chuvangin, opinion poll tih ang chi te pawh rintlak ber anih lohzia an hria. Ram leh hnam tana kan hotute hmalakna pawh hi an hmuin an hre em em a ni. Babulon saltang hruaichhuaktu, tuipuisen chunga thuneitu Pathianin MNF hi sorkarna a pek leh ngei ka ring a. Kan ram leh hnam leh sakhaw him zel nan, nationalist rilru pua MNF vote leh vek turin ka sawm che u, a ti bawk.

Mizo Hnamrun chhung inkhawm hi Pu P.C. Laldinthara, Gen. Secy. MNF Gen. Hqrs. chuan kaihruaiin, Rev. Vanlalduha, Luangmual chuan hunserh a hmang. Pu H. Lalhlimpuia, Secretary, MNF Gen. Hqrs. hnen atangin zin report ngaihthlak a ni bawk.

Sd/-

(PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/04/2023/837
Dt.11. 09. 2023