Vawiin hian Mizo Hnam Runah chhung inkhawm neih a ni a, Pu J Malsawmzuala Vanchhawng, General Secretary chuan thu a sawi a. "ZPM sorkar hian mipuiin thudik leh langtlang an hriat theihna tura duan RTI Act an rapbet nasa a, an hmang sual nasa hle a, a pawi tak zet a ni," a ti a. "Hetiang zela sorkar a kal a, a insiam ṭhat loh chuan ram tan a pawi hle dawn a. MNF pawhin mipuite chanvo leh dikna humhalh turin a tawp thlengin kan bei zel dawn a ni," a ti.

Pu J Sawma chuan, "Democracy dik tak awmna ramah chuan sorkar-in mipuite lakah thup ruk an nei ṭenṭun ngai lo a. Sorkar langtlang awmin, khua leh tui ten an hriat duh an hre zung zung thei ṭhin a. Chu chu thil dik lo leh corruption dona atan pawh a pawimawh em em a ni. Tun ZPM sorkar-ah erawh chuan sorkar-in thup duh a ngah ta hle mai a, CM leh Minister ten RTI zawhna an en ve duh ta zel a. Thup duh an ngah ta em em.hi a serious hle a ni. Hei hi ram tan a pawi tak zet a ni," a ti.

MNF General Secretary chuan, "India ramah RTI Act 2005 kan nei a. He dan hmang hian khua leh tui ten sorkar kal dan hre ve turin zalenna thui tak kan nei a ni. He dan mipuiin tangkai taka kan hman mek hi palzutna a nasa ta em em a. RTI zawhnain Chief Minister leh Minister te dawhkan a thleng ta zel niin a lang a, Minister ten an chhan mai loh avanga RTI zawhna a huna chhan hman loh pawh a awm ta nual a ni. Hei hi a pawi tak zet a ni," a ti a. "RTI zawhna pakhat Chief Minister Office aṭanga an chhanna phei chu a 'official' lo hle a, bung tak takin RTI zawhna an chhang a. Hetianga RTI zawhna chhan chin hi a thinrim thlak a ni naran mai lo a, thuneihna hmansualna leh dan palzutna a ni. Sim se a ṭha hle," a ti.

Pu J Malsawmzuala Vanchawng chuan, "MUHCS chungchangah Sorkar leh Private Hospital-te inremna RTI hmanga ka zawh pawh sorkar-in thup a tum a. MLA-te pawhin an zawt chhuak thei lo a nih kha. Kha Inremna thuthlung duangtu kha sorkar a ni a, thup duh nei pawh sorkar a ni. Information Commission-in ka thil dilte pe turin sorkar an ti a. Sorkar-in min pek loh dan a zawng char char a, High Court-ah hial sorkar a kal ta a. High Court-in mipui tana duan, mipui sum hmanna a ni a, puanzar tur chi a ni, a ti ta si a. Tunah hian Private Hospital leh sorkar inremna chu October ni 12 ral hmain min pe turin Information Commission chuan sorkar a ti ta a ni," a ti bawk.

He inkhawm hi Pu C Laltawnvela, Adviser-in a kaihruai a, Pu Vanlalruata Ralte, vice president Ex MNA-in hunserh a hmang a ni.

(LALLENMAWIA JONGTE)

Secretary

Media & Publicity Department/Mizo National Front

Memo No. 552/2026/Dt.09.10.2026