March ni 16, 2025 Thawhṭan khan Mizo Hnam Runah chhung inkhawm neih a niin, Pu Tawnluia Ex-Dy.CM leh NCC member ni bawk chuan thusawiin, zalen sang ber neih hi Mizote chanvo a ni, a ti.

Mizo hnam thinlung, kan hnam tundin duhna hi district council hunlai atang tawhin Mizote rilruah a lian em em tawh a. Chumi zalenna nei tur chuan, zalenna kan sual atanga vawiin thleng hian ala mit lo a ni, a ti.

Pu Tawna chuan, Mizote ramchhuahna ber chu Sapho ten an vat chereu a, Mary Wincherster-i khan man tur hrim hrima kal an nilo a, kan ram humhim tura kal an ni, a ti. Khatiang khawp khan kan pi leh pute hunah pawh kan ram nasa takin an lo humhalh tawh a ni, a ti.

Pu Tawna chuan, British ho kha kum 1871-1890 ah Mizoram an rawn luta, kan Lal te hnuneihna chhuhsakin min awpbet a, kan piputen kan ram hi an satchhuak a, kan dikna chanvo hi British ho min chhuhsak a ni. British khan min chhuahsan dawnin Mizote chuan an nihna chanvo kha an nei let leh thei ang, tiin thu an dah a, chu chu India in min upbehsakin anmahni duh angin min awpbet zui a ni, a ti.

Pu Tawna chuan, kan ram leh hnam zalenna tura kan pi leh pute hunlai atang tawha an lo beih dan leh, kum 1966-a Pu Laldenga huna an beih dante sawiin, kan ram humhimna hi India sorkar pawhin Mizoram sorkar remtihna lo chuan a tidanglam thei lo, tih hi Article 371G ah chiang takin a inziak a, he remna thuthlung hi zahawm takin India nen kan hotu Pu Denga te khan an siamtir a ni, a ti.

Pu Tawna chuan, Mizo Nationalism chungchangah thalaite an harh chhoh zel angaih thu te sawiin, article 371G kan nei a, a venhim chu Mizoten kan tih tur a ni. Ramri humhalh chungchangah, ni 21 July, 2021-ah pawh khan kan ramri min rawn chuhpuitute chu kan um haw leh vek anih kha, tiin, khang te kha engdang vang niloin, Mizo Nationalism spirit vang a ni, a ti a.

Tuna kan Chief Minister ni ta hian Opposition anih lai khan, "IR Battallion kan la hi kan tihsual lian ber a ni", a ti kha thudik lo a ni, khangho khan vawiin ni ah chuan kan ram min venhim sak a ni, a ti a, Pu Tawna chuan, Ramri buaina hi cultural troop-te nena chinfel chi a nilo a ni, tih hi kan hriat tel a ngai, a ti bawk.

Pu Tawnluia chuan, Article 371G- chu ZPM sorkarin an pek let daih thu sawiin, Dan sakei ti dum dum siin, sum leh pai duh vang erawhin FCAA erawh an adopted leh lawi si. Chuvangin, kan ram humhalhna kawngah thalaite ke an pen a ngai a, Lengpui ram compensation chungchangah pawh CM leh Revenue Minister te hi a mawhphurtu dik tak an ni, a ti bawk.

Hnam Run chhung inkhawm hi Pu R.Vanlalruata Adviser chuan kaihruaiin, Pu F.Lalthankhuma Secretary-in hunserh ahmang bawk.

(B.LALHMANGAIHZUALA)

Secretary

Media & Publicity Department/ Mizo National Front

Memo No. 444/2026/ Dt. 16.03.2026