Vawiin ni 26th, September 2026 Inrinni hian Ramhlun South YMA Hall-ah Aizawl North II, MNF Block Special Conference hman a ni a, Pu Lalruatkima, Treasurer, MNF chuan a hmanpui a, thusawiin, nihna chelh ringawt ni lova, a taka thawktu hruaitu kan nih a ngai a, kan rah chin apiang kan ram a nih zel a tura thawhrimna neiin, mutthluk a thianglo a ni, a ti.

Zoram mipui rin ngama 2028-a Sawrkarna siam turin MNF te kan insiamtha zel a, Chhungkua ah bul kan tan anga, thenawmah, khawtlangah, rampum huapin MNF in rorelna kan chan leh ngei hi kan ram tan a tul em em a ni. Kan Mizo nunmawi, rinawmna, taimakna leh dikna kan chawi vul zel a ngai, kan hnathawh reng rengah MNF kuthnu chu a tloin, a tha tur a ni. MNF thatbikna hi Mipui hmuh theih turin kan pho lan a ngai a, tunlai thiamna mil zelin Zoram tan kan pen anga, kan nihna tak Nationalism hloh silova, tivul deuh deuhin hma kan sawn zel tur a ni. Kan neihchhun kan ram ral lohna turin MNF hian neitu kan nihna kan lantir zel a pawimawh a ni, a ti a, Kohhran leh khawtlangah kan mawhphurhnaah te midang tana malsawmna nasa zawka thlentu ni tura nasa zawka kan hlen a ngai a ni, a ti.

Mitin mai hian kan ram thatna turin kan awmna apiangah mawh kan phur vek a, MNF chuan mi nawlpui piah lamah kan mawhphurhna a lian bik a ni tih kan hriat a tul. Dawt sawi ngar ngar Sawrkar kan neih mek hian, an insawi loh ang zelin an khawsa a, mipuiin an hmufiah zel a. Kil tinah an hek zel a. An mitha tak tak pawh an chan mek zel a ni. Dawt thu nen kan hotupa ber pawh thusawi tirin, tunlai thiamna hmang sualin hna an thawk mek a. Dan kalha dawt nena khawsa mek ZPM tana thawktu leh bei mektute hi Dan hmang vekin MNF chuan kan hmachhawn chat chat zel dawn a ni, Pu Ruatkima chuan a ti.

Dik takin, belhchian dawl tak zelin kan politics zinkawng zawh ila, kan Pathian, a hming kan lam zel hian MNF te mal min sawm ngei ang, tih hi kan beiseina nung tlat a ni, MNF Treasurer chuan a ti bawk. Pu Ruatkima hian mithar 33 MNF party ah lawm takin a lawmlut bawk.

He hun hi Pu H. Lalringzova, President, Aizawl North II MNF-in kaihhruaiin, Pu C. Vanlaldika, Adviser, Aizawl North II Block in hunserh a hmang a, MNF General Headquarters atangin Er. Lalrinawma, Gen. Secy. & Ex-Minister, Pu VL Krosshnehzova, Gen. Secy., Pu Zodinpuia, Gen. Secy., te kalin, anni hnen atang hian fuihna thu tha tak tak ngaihthlak a ni bawk. Aizawl North II Block atangin Unit, Group leh Block hruaitute bakah member thahnem tak an kalin, thu tha tak tak an sawi a, Pu PC Vanlalruata, Vice President, Aizawl North II Block in lawmthu a sawi a ni.

(PETER CHHANGTE)

Secretary

Media & Publicity Deptt/ MNF General Headquarters

No.538/2026/ Dt. 26. 9. 2026