Thitin thla vawiin ni 10, 2026 (Thawhtanni) chawhma dar 11:00 hian Mizo Hnamrun chhung inkhawm neih a ni a. He hunah hian Pu K. Vanlalvena, Ex-MP(RS), chuan thusawiin, "India leh MNF inremna thuthlung hi keini MNF ten ralthuam nena inthlenga kan siam a ni a. Kan remtihna lova thiah emaw paihbo emaw anih dawn chuan, a thleng nan a kan pek, kan ralthuam leh thisen te kha min pek let leh a tul ang," a ti a. Zoram mipuite rawng bawl turin i insang mar ang u, tiin party mipui te a sawm bawk.

Pu K.Vanlalvena chuan, State kan nih hnuah MNF leh Congress in vawi 4 ve ve sorkarna kan chang tawh a. Mizoram mipui ten sorkar tha zawk beiseina avangin ZPM an enchhin a. An inzawrh ang an nih leh si loh avangin mipuite rilru beidawng a insual mek a.Chung hote hui khawm tur leh kan sorkar kal tawh zawng zawng aia tha sorkar siam turin i insangmar ang u, tiin party mipui kalkhawmte a fuih.

Kan ram leh hnam rawngbawlin ramhnuaiah te, opposition-ah te, ruling-ah te kan awm hunlai a awm thin a. Sorkarna siam ringawt hi MNF thil tum a ni ngai lo. Ram leh hnam dinchhuahna tak tak hi kan goal anih avangin tha thlah hman kan ni lo va. Tunah opposition-a kan awm lai anih avangin sorkar khalh ngil turin thapui kan thawh a tul a, awm mai mai hman kan nilo, a ti a.

Tunhnaia Chief Minister Pu Lalduhoma thusawi sawi chhuakin Pu K. Vena chuan, "Kan CM hian a sawi loh tawp tur a sawi a ni," a ti. Ram hruaitu kan nih chuan kan tawngkam hi silai; a mu pai ang anih avangin den a nei ngei ngei thin a. Opposition hruaitu anih laia duhdah taka thil a sawi thin anga tawng mai mai hi a dik tawhlo tih kan CM Pu Duha hian a hriat a ngai a ni. Chief Minister vekin, Mizoram Autonomous Dist. Council te chauh Tribal area anih tawh thu leh Mizoram hmundang zawng zawng hi hlauhthawn awm ni a a sawi pawh hi thudiklo a ni. Indian Constitution Article 342-a Tribal list-ah Mizo kan tel a, Article 371(G) ah te Mizorama hnamdangten hmun lo ram an neih theihlohna tur dan a awm a. Chuvangin, hlauhthawn tur a awm lo, a ti bawk.

MNF chu ramhnuaia a luh hmain, Assam state MLA thlan hnuhnung berah MLA seat 3 awmah seat 2 ah hnehtu kan nih avangin MNF hian Zoram mipui ai kan awh phak a. MNF leh India inremnaah MNF chu Mizoram mipuite aiawh ni phaklo anga Pu Duhan thu a sawi mai hi lo ngaihtuah chiang leh rawh se. Khatih laia Mizoram Chief Secretary Pu Lalkhama, IAS pawhin hming a sign ngei laia, Mizoram sorkar aiawha hming sign a nih loh thu a sawi lui talh te phei chu mipuite bum tumna liau liau a ni, a ti.

Pu K. Vena chuan, ILP hi Indian Consitution Article 19(5) behchhana Tribal te humhim nana hman thin a ni a. Mizoram Accord-ah chu chu nemngheh leh a nih avangin a nghet tawk a ni. Kum 1994, July thlaah India Home Minister SB.Chavan an hmarchhak CM te Shillong ah ko khawmin, ILP hlih a rawt tum pawh khan nasa taka dodal a ni a. MZP ten Independence Day kan boycott a, August thlaah Special Assembly koin ILP hlih kan remtih loh thu te Mizoram sorkar chuan a passed a nih kha. Kum 2007-ah ILP hlih tumna awma hriat anih leh avangin, MNF sorkara Law Minister Pu H.Rammawi hoin, all party leh all NGO aiawh team chuan thawhpuia sawm turin Arunachal leh Nagaland te kan va tlawh a. Neiphiu Rio Nagaland CM phei chuan, "An duh chuan hlip se la, lokal rawh se, an lu kan lo tansak ang, mi lu la hnam kan nih hi," a tih hial laia kan CM Pu Duhan dawih aw a chhuah ta mai bik hi a zialo hle a ni, a ti bawk.

Pu C. Lalmuanpuia, Gen. Secy. MNF Gen. Hqrs. chuan inkhawm hi kaihruaiin, Pu S. Tlangkhuma, NCM, MNF Gen. Hqrs. chuan hunserh a hmang.

(PETER CHHANGTE)

Secretary

Media & Publicity Department/ Mizo National Front

Memo No. 516/2026/ Dt. 10.08.2026