"Mizoram neih ang Memorandum of Settlement hlawhtling tak hi zirchian ka duh a; Mizo Peace Accord - Inremna hlawhtling neih kawnga sulsutu Pu Zoramthanga tawnhriatte hriat chian lehzual a, kawm hi ka duh a ni" - Pu Wangchuk

Tunlaia Activist lar tak Pu Sonam Wangchuk, Engineer leh Educator ni bawk chuan Delhi-a cham mek Pu Zoramthanga, MNF President chu appointment a dil angin nimin September ni 28, 2026 (Thawhṭanni) khan Mizoram House, New Delhi ah a kawm a. Darkar 1 leh a chanve chuang zet an inkawm a ni.

Pu Zoramthanga leh Pu Sonam Wangchuk inkawmnaah hian politics leh tunlai khawvel chungchang an sawi tam ber a. Pu Wangchuk hian Mizoram leh India inremna chu ropui a tih avangin zirchian ve a duh thu a sawi a. MNF President pawhin lawm taka lo dawngsawngin, he Peace Accord hi inremna tlo leh tluantling, hlawhtling ber a nih avangin mimal leh ram dangte pawhin zir thamah ngaiin an rawn zir fo tawh tih a lo hrilh a. Pu Sonam Wangchuk pawhin zir belh leh zirchian zel a duh a, amah leh Ladakh lama a ṭhiante nen Mizoramah emaw, a remchan dan anga inkawm a, zirchian lehzual a duh thu a sawi nasa hle.

MNF President chuan he inremna atana India Sorkar patlinzia sawi langin, Pu Laldenga, electoral roll-a chuanglo kha India Sorkarin Interim Agreement-ah ṭul an tih avangin Indian Constitution ang thlapa thlan tlin Mizoram UT Chief Minister Pu Lal Thanhawla pawh an lan-tir duh a. Hei hian India Sorkarin remna a duhzia leh remna atan a man pek an inhuamzauzia a lantir a. He inremna tlo tak leh entawntlak ber pakhat neitu Mizoram mipuite hian hetiang inremna hi nei ve zel sela an duh thu Pu Sonam Wangchuk hnenah hian a lo hrilh bawk.

Pu Wangchuk chuan Pu Zoramthanga chu fakin, ramhnuaiah kum 20 MNF underground movement-a awm tawh, kum 15 zet Chief Minister ni zui ta bawk leh, chawl miah lova kum 36 chhung MNF President-ah a ṭang thei chu mak a tiin a fak nasa hle a ni. Hun remchang la siamsak leh tur leh, Memorandum of Settlement zirchiang tura Mizorama lo zin a duh thu Pu Sonam Wangchuk hian a sawi nawn bakah, MNF President Pu Zoramthanga pawh Ladakh ah zin ve ngei turin a sawm nghal bawk.

He inkawmnaah hian Mizoram House Kitchen siam Mizo chhangban kan leh Mizo thingpui nen Pu Zoramthanga, MNF President leh Former Chief Minister ni bawk chuan Pu Sonam Wangchuk hi a lo hlui a. A lehkhabu ziah 'From Guerilla Fighter to Chief Minister' leh, Memorandum of Settlement original scanned copy chu a hlan nghal bawk. Inkawmna hun ṭha tak an neih hnuah Pu Zoramthanga leh Pu Sonam Wangchuk chu an inthlah ta rih a ni.

(B LALHMANGAIHZUALA)

Secretary

Media & Publicity Department/ Mizo National Front

Memo No. 543/2026/ Dt.29.09.2026