Vawiin Mizo Hnam Run chhung inkhawmah Pu Tawnluia, former Dy. CM & NCC, MNF Gen Hqrs chuan thu sawiin, India leh Mizo mipui ten Remna Thuthlung kan siam a, hei hi India Danpui-Constitution ah ziah luh a ni a; MNF leh India sorkar inremna anga sawi awm hi kan la serious hle a ni, a ti.

Pu Tawnluia chuan Remna thuthlung chungchangah kar kalta khan kan chief Minister chuan Mizoram Law College a thu a sawiah, Remna Thuthlung chungchangah thil mak a sawi a, pawi kan ti, a ti a. India sorkar aiawhin Home Secretary Pu R.D Pradhan leh Mizoram UT chief Secretary Pu Lalkhama ten hming an ziak a ni a; an signature pawh hmuh theih vek a ni, a ti. Kan CM in MNF leh Central Home Department inremna (Accord) anga a sawi hi thu dik lo a ni, tiin Pu Tawna chuan, 'He thil hi kan la serious riau a, Remna kha Mizoram mipuite siam a ni a. India Constitution Article 371 (G) a thun turin inremna thuthlungah khan ziah a ni a, Constitution ah sengluh niin, MNF te chauh khan ziak ni ila engtin nge kan hman theih ang', a ti

Pu Tawna chuan mipui leh Remna thuthlung ziah kha kan Chief Minister hian a tibawrhbang a ni tiin, hemi chungchang hi naktukah MNF Party hruaituten bawhzui turin meeting an ko hi ka lawm hle a ti a.

ILP chungchang sawiin Pu Tawna chuan, 'Remna Thuthlung a ziah a nih angin, keini chuan thlahdul kan phal ngai dawn lo', a ti. Kan CM erawh chuan Central sorkar thuneihna a ni tiin a tlanchhe nghal dui mai a, keini chuan state sorkar min rawn a ngaih dawn avangin kan phal ngai dawn lo a ni,' a ti.

MNF sorkar laia hnalak chungchangah Mizoram Sub Ordinate Service Selection Board (MSSSB) chu June 2019 ah din niin Group 'B' chin a la a. Regular Post 328 a ti fel a, Departmental Promotion exam vawi 52 a ti hman bawk a. Tuna kan Chief Minister in MSSSB chairman chu political appoinment a tih hi a dik lova, khati laia chairman khan kan party ah Adviser a nih loh hnuah chairman hna a chelh zawk a ni, a ti.

PAHOSS chungchang sawi bawkin Pu Tawna chuan Feb. 6, 2019 ah kan din a, lirthei 423 dah theihna Rs. Nuai 159 sengin kan sa a ti. PAHOSS atan cheng nuai 7002 budget ah nuai 6139 sanction a ni a, nuai 1152 kan hmang a. Covid avangin chet theih a ni ta lova; nuai 4900 kan hman bang chu K. Deposit ah dah a ni, a ti. PAHOSS ah eirukna pakhat mah a awm lova, Court ah thiam lohna tur kan nei lova, kan fihlim, a ti.

Pu Tawna chuan FCAA chungchangah 'kan Chief Minister hian 'Dawi Aw' a chhuah fo a, khawi phenah nge bihruk a tum, kan sorkar leh a nih chuan keini chuan kan ṭhiat leh ang, a ti. FCRA Bill chungchangah Kohhran hruaitute leh kan sorkar hotute an inhmu a, sorkar hmalakna hmuh tur a awm lo tiin, 'Kristian sakhua sawinghing in a awm mek a, khawnge sorkar a awm,' tiin, Mizoram in tun a a mamawh ber chu rinawmna leh dikna a ni' a ti a. MNF chuan kan ram leh hnam dinchhuahna atan Politics kan khel, a ti bawk.

Vawiin Hnam Run chhung inkhawm hi Pu K. Laldawngliana, MLA & General Secretary, MNF chuan a kaihruai a. Upa Lalawmpuia Khiangte, Secretary, MNF chuan hunserh a hmang bawk.

(LALRINMAWIA SAILO)

Secretary

Media & Publicity Department/ MNF General Headquarters

No.511/2026/ Dt. 03.08.2026