PU RAMTHANMAWIA MLA-IN TUIPUIRAL BADMINTON CHAMPIONSHIP A HAWNG A, KHAWBUNG PHC LEH EMRS-TE A TLAWH BAWK

Vawiin ni 19.08.2026 ( Nilaini) hian East Tuipui bialtu MLA Pu Ramthanmawia chuan 'Tuipuiral Badminton Championship 2026' chu Khawbung Community Hall-ah Khuallian niin a hawng.

Khuallian Pu Ramthanmawia chuan Tuipuiral Badminton Club-in Badminton lama tui mite tan inelna tualzawl a buatsaih sak thin chu lawmawm a tih thu a sawi a, "Badminton hi kum upa leh naupang lam tan pawh khelh theih niin Mizote khelh mi tak, International level thlenga kan lan theihna Game anih avangin kan uar deuh deuh a pawimawh a ni," a ti.

Tuipuiral Badminton Championship 2026 hi Khawbung Community Hall-ah August Ni 19-22, 2026 chhunga khelh tur niin infiam mi154 an inziak lut a, inelna hi category 12 ah neih tur niin match150 a awm ang.

Vawiin vek khan Pu Ramthanmawia chuan Khawbung PHC leh Khawbung EMRS building sak mekte a hmunah a tlawh bawk.

Pu Ramthanmawia chuan PHC building thar sak zawh anih avang leh EMRS building sak hna tan a ni chho ta leh sorkar hmasa hmalakna sorkar tharin tha taka a chhunzawm sak avangin lawmawm a tih thu a sawi a. PHC building thar chu tha taka sak anih a beisei thu leh tangkai taka PHC a thawktu Medical Officer leh Staff bakah helai chhehvel mipuiten an hman tangkai a beiseih thu a sawi bawk.

Khawbung PHC hi Zothan Consultancy Services, Luangmual-te thawh niin November ni 20, 2024 khan hna tan a ni a, February ni 13, 2026 khan an sa zo va. Agreement Amount hi Rs.357.12 lakhs a ni.

East Tuipui bialtu MLA Pu Ramthanmawia chuan Khawbung Eklavya Model Residential School chu a kutchhuak, a bul atanga tawp thlenga a buaipui a nih avangin a Baby ve a nih thu leh hetiang project lian bial mipui tana an sual chhuak thei hi a chhuan thu leh lawmawm a tih takzet thu sawiin," EMRS hi Central School tha anih avangin kan bial tana rohlu tak tak a la ni dawn a. RD Block huam chhunga pakhat chauh dah theih anih avangin Khawbung EMRS hi kan bial pumin kan intawm vek tur a ni, kan zavaia ta a ni," a ti bawk.

Bialtu MLA Pu Ramthanmawia chuan Hna chhia a duh loh thu leh a bial chhunga hna reng reng chu tha taka thawh a ni tur a ni a ti a. EMRS leh PHC-te ang Assets lian tham hi kan neih leh mai mai dawn loh avangin hna thawktute pawh hna tha taka thawk tura a duh thu leh a chhiat thata lo vil leh ven chu a khaw neitu Khawbung mipuiten mawha laa an lo vil ven a duh thu a sawi bawk.

Khawbung EMRS hi 2019 kum atanga Bialtu MLA Pu Ramthanmawia hmalakna a bul tan chhoh niin concept paper pawh bialtu MLA ngenna anga Pu H Lalnunmawia ( Mapuia ) Khawbung HSS Principal-in a siam niin, theihtawp chhuahin MLA hoin, Bial mipui leh Tuipuiral Zirlai Pawlte nen buaipui chhoh a ni a. A hmun tur hi Khawbung VC leh khawtlang mipuiin a thlawnin phal takin an pe a ni.

Khawbung EMRS hi Planning & Programme Implementing Department hnuaiah ZIDCO kaltlangin H & R Construction-ten an thawk mek a, October ni 13, 2025-ah hna thawh tan niin, October ni 13, 2027-ah zawh hman tura beisei a ni. Tunah hian Physical Achievement chu14.24 % a ni a, Agreement Amount hi cheng vaibelchhe 46.35 a ni.

Pu Ramthanmawia hi MNF General Headquarter atang Pu Ngurzamlova Adviser, Pu PB. Lalduhawma Secretary, Pu C Vanlalhmachhuana Jt. Secretary leh Pu Lalneihkima Jt. Secretary ten an tawiawm bawk a ni.

(LALZAWMLIANA)

Joint Secretary

Media & Publicity Deptt / Mizo National Front

Memo No.520/2026/ Dt.19.08.2026