Vawkhniahzawn thla vawiin ni 7, 2026 (Thawhlehni) zing dar 7 hian MNF Founder President, Mizo Hnam Pa Pu Laldenga thihcham vawi 36-na pualin, a thlan Treasury Square, Aizawl-ah hun hman a ni a. MNF President, Pu Zoramthanga hovin MNF hruaitu thahnem tak leh chhungkaw lam te an kalkhawm a, Mizo Hnampa thlanah hian zahna pangpar an dah a. Sunna hun hman a ni bawk.

MNF President Pu Zoramthanga, former CM chuan thusawiin, "Inremna hlawhtling ber leh ram zalen ber min hlawhchhuah puitu, hnam hmangaihna chi Zofate thinlunga tuhtu, Pu Laldenga hi hriatreng a phu a. A thihcham a lo thlen hian zahna chibai kan buk nawn leh a ni. Hnamdangten Pu Laldenga hova remna hlawhtling kan nei thei hi an awt a, vannei min ti hle a ni. Hetianga inremna tha kan nei thei hi ropui min tihpui a, sawi nuam an ti hle. Thangtharten zalenna kan neih hi kan vawnghim zel tur a ni," a ti.

Chhungkaw aiawha thusawitu, Pu Laldenga fanu, Dr. Reenee Lalrinzuali MNF Gen. Secy ni bawk chuan, Pathian ringtute tan, Amah Pathian leh kan ram neihchhun tana ke kan pen hi a inhmeh hle a. MNF in kan thupuia, "Pathian leh kan ram tan," kan tih hi kan zavaia kan thupui lo nise a tha hle ang. Kan nun min kaihruaitu leh kan ram tan thil pawimawh tak a ni reng dawn a ni. Hnam tana nunna hlantu zawng zawngte an zahawm takzet a, zahna ka hlan a ni, tiin, a pa thihcham puala hun hmangtu zawng zawngte chungah lawmthu a sawi bawk.

He hun hi Pu Lalruatkima, MNF Treasurer chuan a kaihruai a. Upa Lalrammawia, Adviser in hunserh a hmang. Pu K. Vanlalauva, Ex- Minister chuan tawngtaiin kalkhawmna a tin.

(PETER CHHANGTE)

Secretary

Media & Publicity Department/ Mizo National Front

Memo No. 502/2026/ Dt. 07.07.2026