Vawiin ni 28 September, 2027 (Thawhtanni) hian Mizo Hnam Runah chhung inkhawmah Dr.L.Thangmawia Ex-MLA, Gen.Secy GHQ chuan thusawiin, India sorkarin min ngaihsak loh avangin kan dam khawchhuah nan Mizo National Famine Front(Tam do pawl) din a ni a, chumi kal zel chu Mizo National Front (MNF) kan tih hi a ni. Vawiin ni thlenga Mizo mipui aiawha Zalen sual ngam chu MNF hi a ni, a ti.

Dr.Thangmawia chuan, MNF hi din a nih chhan ang ngeiin vawiin ni thlengin Mizo hnam tan nghet takin a ding zel a. Central sorkarin a duhdan tam takte kan ram leh hnam tana him lova a ngaihah chuan a dodal tlat zel a. Inthlanpui hnuhnung ber 2023-ah khan sokarna siam zo lovin MLA 10 kan nei a. Kan sorkar kal ta (2018-2023) kha a vanduai hle a. Khawvel pumpui chawkbuaitu Covid hripui avanga ni 718 lai Lockdown a ni te, dawr tam tak leh thil siamchhuahna hmunte khar anih avanga India sokar sum dinhmun chhe ta em em mai leh chuvanga Mizoram-in kan sum dawn tur cheng vaibelchhe sangtel kan chan ta te, hengin a nghawng zel avanga sorkar hnathawk hlawh a hun taka kan pe thei lo te, kan policy siamte leh kan flagship programme SEDP tihlawhtling tura sum leh pai harsatna namen lo kan tawhte leh hmasawnna hna tluang taka kalpui theih a nih lohna te kha a pawi hle a ni. Chubakah ramri buai, chhiatna hrang hrang thleng leh Myanmar leh Manipur buaina avanga kan unaute kan lo tuamhlawm ngaih lai nen a lo innang leh zel bawk a, kan tum anga kan awm theihlohna tam takah Zoram mipui hnenah ngaihdam kan dil nawn leh a ni, a ti a.

Hetianga harsatna namen lo kan tawh mek laiin kan unau ZPM ten tan an rawn la a, Mizoram sorkar awm tawh zawng zawngte thiam taka thudik chanve hmanga beiin, engmah thawk lo thawthanga chhuahin thalaite rilru an hruai sual a, anmahni chu enchhin turin Zoram mipuite tih tak zetin an ngen a. Inthlan dawna an campaign au hla te kha a ropui em em a ni, a ti bawk.

Dr.Thangmawia chuan, ZPM sorkar fakna lam sawiin, ruang phurhna sorkara bill theih a an siam te, aikal lak tih tawp leh pension diklo a la titawp tura an hmalaknate pawh a tha hle mai. Hengte hi kan ram tana tul leh pawimawh hmasa tam tak sorkar kalta ten an lo tih zawh tawh avanga ti thei an ni tih erawh kan hriat a tha hle. Enchhin tura inzuar an ni bawk a, enchhin lamah pawh fak an phu, Chief Minister leh Party President nih kawp loh min enchhin pui hnuah tunah hian nih kawp min enchhin pui leh tan mek a, enchhinna chhawng hnih tun term-ah min kaipui hman a ni. Kawng siam vil tura MLA/Minister duty tura a bik taka inruat sorkar Mizoram-in a hmuh hmasak ber an ni a, Kawng repair tur Minister in han hawn lte pawh a ropui dang dai ve hrim hrim. State kan nih hnua Chief Minister lo zawh puia a tel hman vawikhat ka hriatna a ni a, an tul awm teh reng nen hun an insiam thawl thiam hle hi an fakawm khawp mai. “kan ti ang” an tih, tih leh loh mai theihna leh “kan ti lovang” an tih awlsam taka tih leh mai theihna an nei tha hle a, lungrualpui inti thinte hian tlawmna nun an nei tha viauin a lang. Kohhran an ti tatu thiamte hi an fakawm hle, a uar zual phei chuan keini chu unit hran a ngai lo, kohhran hi kan unit a ni mai te an ti hial a nih kha, a ti.

MNF Gen.Secy.chuan, Mipui min bum kan tih fo pawh hi an rilru chak vang zawk a ni em? tiin a ngaihtuah theih, an sawi laia an rilru tak taka an sawi kha a hnu lawkah a aia kalphung thar tha an hre leh zung zung a, mipui min hrilh leh hman si lo va, anmahni lamah fel thlup thin mahse mipui lam kan lo inpeih hman thin lote pawh a ni ang. State University Aizawla awm a tulzia kan ngaithla zo chauh a, Lungleia a awm a tulzia an hrechhuak leh thuai a, an thiam loh pawh a ni lo ang, an research base data te hi a inthlak chak deuh niin a rin theih a, an road map neih sa kha a rintlak lohte pawh a ni thei, kalphung thar an kal chak pui lutuk a, mipui ten kan umpha meuh lo pawh a ni zawk mai thei bawk, a ti bawk.

Kan sorkar laia ka lo enkawl ve SRDC chungchangah SRDC bill pass mai tur nia ngaih theihin Assembly-ah a bill a lut a, a hminga mawhphurhna lo chelh tawhtu leh House pawha vawi hnih lai lo auchhuahpui tawh tu ka nih angin session an neih hma atangin SRDC area a mi thenkhat ten min rawn chibai hman nual a, nghakhlel taka pass mai tura kan lo thlir laiin Cabinet meeting pawh pal tlang vek tawh, Assembly hiala bill lut chu kar khat lek chhungin rilru an lo thlak leh hman a, nghakhlel taka lo nghak fan fan tute an hawihai ta hle a, kan lo in chibai lawk sual nasa hman hle a ni. Chuvangin mipuiten he kalphung thar sorkar hi a tak a thlen hma chuan lo inchibai lawk chiam chi a ni lo tih erawh hriat a tha awm e, a ti Pu Thangmawia chuan a ti bawk.

Dr.L.Thangmawia chuan, mi thil chik mite erawh chuan tun sawrkar an bihchiannaah - 16th Finance Commission-a Mizoram sum dawn tur a pun chhoh mek laia lei ba a tam ta tual tual mai leh sum leng vak a tlem tlat si te, Petrol leh diesel man atanga cess (chhiah) cheng vaibelchhe tam tak lirthei neitute atanga lak a nih tawh mek laia Mizoram hmun hrang hrang leh Aizawl daifem kawng chhe kum tluan reng mai te, Buhfai man a leta tih pun leh chhiah chi hrang hrang mipuite phur tirit zawnga tihsan te, Contractor tha tak tak tam tak kan neih laia Empanel firm kum hnih lek chhunga lo pung thut mai leh heng ho tana Restricted tender a hlawma pekchhuah (blanket approval) lo ni ta te, sorkar langtlang kan beisei laia RTI hmanga thil dil chhuah harsat avanga court hial thlen ngai ta te, Sorkar hnathawk leh pensioner zahawm tak takte hrek zawnga Health Care Scheme kalpui luih tlatna te, zirna lama thahnemngai khawtlang nu leh pa tam tak rilru tina zawng a vantlang sikul dinhmun tihhniam te, Research base-a kal inti si a research finding leh data mipui hmuh tur awm leh tlat si lo te, Minister zawng zawngte hna thawh dan tur road map siamsa vek nia sawi vawiin thlenga a tak hmuh tur awm si lo te, Party induhsakna titawp tura mipui hnena an intiamna phatsana Party worker-te invulhna nasa tak kan hmuh mek te, Khuallian a tang tur leh Lo zawh runpui hmanpui tura Minister leh MLA rualte motor tam taka an inzui duah duah te, Sorkar hmasa ten harsa taka an lo sual chhuah kan ram rohlu hralh theih a piang hralh tura thahnemngai taka hmalak mek a lo ni ta te, irhfiak damdawi kartin maia hriattur lo awm fo mai te, kuthnathawktute hmangaih inti si a an tana budget tlemte dah te, Electric bill tipung lo inti si a a hma aia kan chawi a tam tlat mai thin leh current kan nei chhe em em mai te, Zofate chimral kan nih loh nana min humtu ILP duh hun huna Central-in a thiah mai theih ni a sawi leh Inremna sawi bawrhban duh tlatna te, Assembly session meuha pass tawh a hnu lawka a letling zawnga pass leh mai theih te, sem policy hnualsuat tura nasa taka sawi anih laia sem tur dap reng mai te, sorkar khalh ngil tur ni a hahipa sawi Val Upa Council ten khalhngil a hneka party kaihbu (puppet) a an tang ta hlauh zawk te, hmalakna thar awm mumal si lovin sorkar hmasate hmalakna famkim lo lai tlemte ching pawr tura tan lak reng mai te, ram hmasawnna ngaihtuaha hah taka thawh aia an pawl chhung fel lo buaipui leh sorkar kal tawh sawiselte chu hna pui beraah an nei ta a, a ti.

An zuam zawng Taxi (4Wheeler & 2Wheeler) leh Autorickshaw hmanga chhungkaw chawm mektu mi 8000 chuang zette chhiah lak belh an duh avanga barhluih Apps (Mizo Taxi Apps) hman luihtir an tum tlat mai te, Zirchianna mumal nei lo va MSSSB an thiat ringawt te hi thalai hnazawng laite tan a pawi hle a, MPSC zawh loh nghawngkawl bah tirin tuna MPSC mualphonaah pawh thui tak he sorkar hian mawh an phur a ni. An sorkar theih nana an intiamna te engahmah an ngaih chhunzawm loh nate hi Zoram mipuiten kalphung thar an beisei ang a ni ta lo va, a ni telin an hniam zel a, anmahni puitu neutral leh thalaiten an tinsan mek a, Zoram mipuiten enchhin sorkar an rinna nghah a tlahniam zel a, ZPM a ZPM-na parmawi chu kum thum lek chhungin a lo chuai tan ta a ni. Heng kan sawite hi keini mai ni lovin an MLA te leh an hotuten an party office-ah leh Press mite kaltlanga an puanchhuah ah te a chiang em em a ni. A nihna takah chuan ram tana rilru tak tak an sen avanga ZPM, an beisei anga thil kal leh ta si lo te hi keini opposition ho aiin an khawngaihthlak letling a, an ZPM em em thinna te khan an rilru chhungril a tina vawng vawng mai a ni, Pu Thangmawia chuan a ti.

ZPM sorkar reilote kum thum vel lek kan enchhin tawhah hian kan hnam a him lo va, kan kristianna a him lo va, kuthnathawktu tamtak an beidawng mek a, lirtheia eizawngte an chep a, sumdawngte sum leng vak a tlem avangin an mangang a, sumdawnna lama inchimralna kawng a inhawng zau sawt hle, sorkar hnathawkte nekchepin an awm a, Departmental work party mite induhsaknan a uchuak taka kalpui anih avangin SGST a tlahniam a, restricted tender nasa taka pung hian corruption kawngka zau takin a hawng a, thangthar chhuan lo la awm zel turte phur tirit turin leiba nasa takin a pung thur thur a, invauna leh inhrosakna thawm hriat tur a tam hle a, rorelpui ngai lo hiala mahni inhmuh that famkimna thawm hial hriattur a awm bawk. Ruihhlo tam tham tak man thawm hriat tur a awm reng a, tualthahna rapthlak leh chhiatna thawm ten thin a ti thawng thin hle bawk. Anmahni ngaihdan tawmpui thei lo lte chu Setana pawl an ti hial a, Zo nun zemawi hnawlin sorkar khalhngil tumte leh an duh loh zawng sawite chu ringtute tih a mawi lo tawngkam chhe tin reng nen Social media leh a theihna naah an umzui a, a rapthlak hle a ni. Ram tana mi inpe, Prominent citizen tia chhal ngam, Zofate zinga mi tak tak kan neih tlemte te zinga mi Pu Bualhranga pawh VUC atang a banna a thehluh avangin mawi leh mawi lo thlu lovin an vawm zui mawlh mawlh a. He tianga firfiak taka politics kalpui hi kan ram kal zel tur atan a tha lo hle, kan hnam rohlu aia upa te zahna leh hawihhawmna mausamna leh hnam pawisawina a ni a, MNF chuan hetiang hi kan tih ve a rem lo ang, a ti bawk.

Dr.L.Thangmawia chuan, MNF erawh chu kan HNAM himna atan nghet takin a ding reng a. Kan hmalam hunah sorkarna nena Zoram tana nasa zawka thawk turin MNF Gen. Hqrts-a inbuatsaih mek a. Policy & Programme duangtuten a kum tela thalai mithiam - PhD, Master leh Bachelor degree nei thar tam tak kan thalai mithiam ten kan ram tana tha an thawh theihna tur policy thar an ngaihtuah mek a, kut hnathawktu taima tak tak ten lei rem an rah theih nan kan policy neih tawh sate tunlai mila siam that mek zel a ni a, zirna quality tha zawk kan neih theihnan te, Health Care Scheme kan hman mek that tawklohna lai siam tha turte, kawngpui tha leh tlo kan neih theihna tur te leh hnam thinlung kan put thar theihna tur te, sumdawnna leh eizawnna kawnga chimral kan nih lohna turte, kan sorkar hrawn mekin hnam pawi a khawih e siamtha a, kan hnam leh sakhua humhim turte leh eirukna tello langtlang sorkar kan siamna turin a mawhphur tura ruat ten rim takin hna an thawk mek a ni. A tul anga mithiam bikte leh kuthnathawktute rawn zelin tun atanga hun rei lo teah a hmawr bawk hman beisei a ni. Heng policy-te hi kum thar lamah chuan Zoram mipuite hriattur a puanchhuah a ni tawh ang a, a ti hlawhtling turin Zoram mipuiten hnathawh kawr min haktir leh ngei ka ring tlat a, Tun sorkarin hnam pawi a khawih te a tlai hmaa siamtha a, kan ram leh hnam tana hah taka thawk turin rilru i siam thar leh ila, ZPM unauten sorkar an duh luat avanga mipui thiam taka an bumna ang hi kan ti ve thiang lo a, ram neitu thinlung pu kan nih avangin sorkar ngawr ngawr duh avanga tha ber leh fel ber anga inchhuah hi a rem ve lovang. He ram, he hnam leh sakhua humhim a, ram hmasawnna ngelnghet leh thalaite hmakhaw ngaia kan ram kaihruai tura insangmarin, kan puanven te sawichhing ila, a taka tihhlawhtlin theihloh tur tam tak intiam a, ahnu a phatmarna zawn leh ngai ve lo turin i inbuatsaih ang u, a ti bawk.

Hnam Run chhung inkhawmah hian Pu.Lalruatkima Treasurer kaihhruainain, Pu Sukra Bahadur Thapa, Chite Veng, Phailam atang a ruang rawn kalpui mek, naktukah vui tur sunna hun hman a, chhung inkhawm hi Pu Vanlawma Chhangte, Adviser, MNF GHQ in kaihruaiin, Pu C.Thanga, Organiser, MNF GHQ chuan hunserh a hmang bawk.

(B.LALHMANGAIHZUALA)

Secretary

Media & Publicity Department/ Mizo National Front

Memo No. 540/2026/ Dt. 28.09.2026