Vawiin June 15, 2026 hian MNF Vice President & LoP Pu Lalchhandama Ralte chuan Sakawrdai Joint YMA buatsaih YMA Day Vawi 91-na chu GSA Khelmual, Sakawrdaiah a hmanpui a, YMA Motto nunpui turin mipui pungkhawmte a chah.

Khuallian Pu Lalchhandama Ralte chuan, "Tun hma kum 20 kaltate ngaihtuahin, Sakawrdai ngeia YMA Day kan hmang ta hi a lawmawm hle a. Hnama kan pianthar hnuah

Sap missionary hmasaten bul min lo tan sak - YMA hlutna hi kan la hmu zel dawn a ni," a ti.

"YMA motto - 'hunawl hman that' tih a nih angin midangte tan malsawmna ni tur leh tangkai taka hun hmang turin kan infuih ni se. 'Zofate hmasawnna ngaihtuah' kan tih hian Zoram chhung leh pawna zo hnahthlak zawng zawngte a huam vek a, Sakawrdaia YMA Inkhawmpui 2025-a kan pass angin chi bing leh hnam bil inlakhran tumna a awm loh nan leh kan inpumkhatna vawng nung reng turin intangrual tlat ang u.

"YMA Motto-ah 'Kristian nun dan tha ngaihsan' tih a nih bawk avangin YMA member-te chu Kristian nun dan tur - ruihhlo laka kan fihlim a tul a ni. YMA kumpuan 'ruihhlo do' tih pawh nasa zawka kan kalpui a ngai a ni," a ti.

Pu Chhantea chuan, "He kan kawtchhuah hi hmun pawimawh tak a la ni dawn tia kan lo sawi tawh thin angin, a takin a hlawhtling chho zel a, State dang nena kan inkalpawhna pawh a lo tlang ta a, ruihhlo tawlh pawh a hluar phah ngei ang. Hmasawnna kan neih rual hian Kristian nun dan tha nen, ruihhlo donaah tha taka kan thawhho a ngai.

"Tin, Sakawrdai tlang dung hi zirnaah tan kan lak a ngai hle. Mi hlawhtling leh office pawimawh luahtu kan chher chhuak tam lo. Kan khawtlang hian zirna uar ila, hma kan sawn zel theih nan zirna hi a laimuah i dah ang u," tiin mipui kalkhawmte a chah a ni.

Sakawrdai Joint YMA-ah hian branch pali - Chhim Veng, Hmar Veng, Vengpui leh Upper Sakawrdai Branch-te an tel a. YMA Day lawmnaah hian chhun lamah hnam lam intihsiak leh infiamna neih a ni.

MNF Vice President leh Leader of Opposition Pu Lalchhandama Ralte hi Sinlung Hills Council EM-te leh MNF Hqrs hruaitute bakah Tuivawl North & South Block MNF aiawhten an tawiawm a ni.

(LALṬHAKIMA)

Joint Secretary

Media & Publicity Department: Mizo National Front

Memo No. 497/2026/ Dt.15.06.2026