MNF General Headquarters-in Aizawl South III North Block tlawhchhuah program, Melriat Community Hall-a neih a hmanpuinaah Pu Tawnluia, MNF Working president chuan ZPM atangin mi 4 a lawmlut.

Pu Tawnluia Working president chuan thusawiin, MNF party kan insingsa mek a. Kum 2028 MLA election lo awm leh tura MNF party-in hnehna chang a, ram rawng a bawl leh theih nan MNF party chu a inpeih tawh a ni, a ti. Mizo Nationalism chawinung zel turin MNF party chu a lo kal tawh angin a kal zel dawn a. Mizo Nationalism chawinung duh thangthar zawng zawngte MNF party a lut tur a sawmin, Kum 2028 MLA Election lo awm turah pawh thalai zawkte tan hmun zau zawk a awm tur thu a sawi a ni.

Pu Tawna chuan, Policy and program chungchang sawiin, MNF party chhungah a buaipuitu mithiam leh hawi zau zawk ten uluk takin ruahmanna siamin committee vawi duai lo an thu reng a. Kum 2028 Election a Pathian leh mipui zarah MNF-in hnehna a chan theih huna ram hmasawnna tur atana policy and program an duante hi a hlu hle dawn a ni, a ti bawk.

ZPM chungchang sawiin, ZPM chu lungrual tak tak lo, awmkhawm duh si awmkhawm thei si lo pakhat ang a lan tum, pawn lam a tuam pum a chhung khi reng si an ni, a ti a. Enchhin tur a inzuar, enchhin dawl si lo an ni a, tunah chuan kum 2023 a enchhin tute khan sawrkar nawn tir an chak tawh lo a ni, a ti.

Pu Lalrinsanga Ralte, MLA General Secretary pawhin thusawiin, MNF hi Pathian leh kan ram tan tia innghat party, kum 60 chuang mei mit lova kal thei Mizoram a Party nghelnghet ber kan ni a. Kan vanneihna belhchhah turin vawiin thlenga ram leh hnam tana nunna hlan huam kan hotuten min la dampui hi a ropui a, lawmna chang i hria ang u, a ti. Lungrualna, thawhhona tha nen kan hotute hi i tawiawm zel ang u, a ti bawk.

ZPM sawrkar chungchang sawiin Pu Rinsanga chuan, chhiah la ve lo tura insawi ten petrol-ah chhiah an la a, kawng siam nan an ti a, Aizawl khawpui chhung hmun tlem a zawng an siam bak Zoram pumah kawng an siam thu erawh hriat tur a awm lo thung. An sum nei lo mangang nge hralh tur zawng reng rengin an buai a. Helai maiah ZMC pawh hralh an tum uai uai a, Lengpui Airport te pawh hralh an tum a, mahse mipui phun nasat vangin an la hralh lo hram hram chu a nih hi, a ti bawk.

Sawrkar lo kal tawh zawng zawngte ram tana engmah thawk lo leh ti lo a chhuahin, min en chhin ru tiin sawrkar lo kal tawh te aia danglam bik, tha bik turin an inzuar a nih kha. Hei an sawrkar ta a, kum 3 em pawh a ral hmain enchhin leh duh hi a kum telin an tlem tial tial a, mipui an beidawng tulh tulh a. Sawrkar hmasa lo awm tawh te aiin an danglam ngei a, sawrkar chhe ber leh, mipui beidawn nasatna berah an in siam mek a ni, a ti bawk

He hun hi pu B Lalbiakmawia, President Aizawl South III North Block-in a kaihruai a ni.

(B LALHMANGAIHZUALA)

Secretary

Media & Publicity Department/ Mizo National Front

Memo No. 545/2026/ Dt.30.09.2026