Vawiin June ni 12, 2026 (Zirtawpni) hian Mizo Hnam Runah chhung inkhawm neih a ni a, he huna thusawitu MNF General Secretary Pu Lalremruata Chhangte chuan, tun hnai kum 1 leh a chanve chhunga Mizoram Public Service Commission (MPSC) in hna lak a buatsaihah thil dik tawk lo a thleng tam hle a. Thil fel lo awmte rang taka chhui chhuaka mawhphurtu chungah dan anga action la turin Mizoram sorkar a phut thu a sawi.

Pu Lalremruata Chhangte chuan, “MPSC hian Mizoram chhunga sorkar hna sang lak (direct recruitment) bakah a ken tel exam hrang hrang an khawih avangin thawktute an hahin an ṭul hle ang tih a rin thiam theih a. Chuvang chuan, a chhawk zangkhaina tura rintlak MNF sorkar khan Group 'B’ (Non- Gazetted) leh a hnuai lam hna lak leh promotion/ departmental exam hrang hrang buaipui turin Mizoram Sub-Ordinate Service Selection Board (MSSSB) February ni 28, 2020 khan a din a, MPSC tih tur ṭhahnem tak tiin a pui nasa hle; MSSSB hna lak kalphung kha sawisel tur avang a, hna dil ṭhin Mizo ṭhalaite pawhin an fak a, hamṭhatna hmu pawh an ṭhahnem hle a, MSSSB 2020-‘21 leh 2021- ‘22 an annual report hmuh theihah hna lak (direct recruitment) 117 a nei hman a, mi 1618 promotion tur a siam hman bawk a, departmental exam 189 a buatsaih a, MR atanga contract a tih ngheh 38 a nei a, temporary service mi 993-te a tichiang (confirm) hman bawk a, hna tih nghehna (regularisation) post 52 a siam hman bawk a ni,” a ti.

MNF General Secretary chuan, “ZPM hian an sorkar tukah Mizo ṭhalai hna zawng mekte tana din, MSSSB a ṭhiah nghal avangin MPSC kutah hna lak kaihhnawih engkim a awm leh nghal vek a, MPSC tichangtlung tura Chief Minister Pu Lalduhoma intiamnaah engemaw chen hmalakna awm mahse; tunlaia MPSC hnalak dan dinhmun thlirin hmasawnna a tam lemlo hle a, February 2, 2026 a MCS Combined Exam (2025) result chhuak-ah tling tawh pakhat chu hnawl leh a ni a; May 13, 2026 a Junior Grade (MES) Combined Exam (2025) result tih chhuahah Electrical & Electronics Engineering Wing-ah MES pasarih lak turah pariat tih tlin niin, pakhat an paih tla leh bawk a, hei hi top officer tura hna lakna anih avangin thil diklo lian tham tak a ni,” a ti.

Pu Lalremruata Chhangte chuan, “Sorkar hnalakah Mizoram sorkar pawh a ṭang a, MPSC hian exam chi hrang hrang a nei deuh reng a, a lawmawm hle. Hna lak kaihhnawih engemaw chen lo chhawk zangkhaitu MSSSB awm ta si lovah pressure sang tak an hmachhawn tih a hriat a. Thil fel tawk lo langsar tak tak, tun hmaa la thleng ngai lo exam buatsaihah a thleng zut reng a, hun lokal zel turah zirlai leh ṭhalai hna zawng mek, rilru thianghlim tak pute’n MPSC rinna an hloh mai ang tih a hlauhawm ta hle a ni, India Dan pui hnuaia din ngat MPSC zahawmna tih bawrhban leh rintawklohna thleng mek hi en liam mai chi a ni lova. A chhan hriat chhuah vat a hun tawh a; hrem ngai an awm anih pawhin mawhphurtu chungah dan anga action la turin Mizoram sorkar ka phut takzet a ni”, a ti bawk.

MNF General Secretary chuan Chief Minister chan Finance department aṭangin sorkar kal tawhte a la thleng ngai lo, thil dik leh tha zawk nilo kalphungthar sorkarah a thlen thu a sawi bawk.

Lalremruata Chhangte chuan, “Oppostion an nih laia MLA/ Minister-te corruption tihna awlsam ber restricted a hna inpek anih thu uar takin an sawi a; ti velo tura intiam te’n Congress leh MNF sorkar aiin an uar sauh zawk a ni ngawt lova, tih ngai loh a nawlpuia restricted tender hmanga hna inpek phalna ‘blanket approval’ chu April ni 15, 2025 khan an siam ta zawk a; sorkarin bungraw tam tham tak a lei dawn a, a man leh quality check chungchanga dan hmanga lo endik a, thlifimtu State Purchase Advisory Board (SPAB) ah Mizoramin state a neih hnua a vawi khat thlen nan June ni 10, 2026 khan notifiaction ti chhuakin, chairman ni reng ṭhin Chief Secretary an dah bo ta daih a, PWD hnuaia cheng nuai 500 chin chunglam hna thawktu tur thlanna mawhphurtu- endika pawma hnawl thei, State Works Advisory Board (SWAD) ah pawh chairman atangin CS hi dah bo nghal a ni a; SPAB leh SWAD an kalpui tum dan chu fiah takin a hmuh theih nghal a ni,” a ti bawk.

Chhung inkhawm hi Upa N.Zokunga Adviser, GHQ chuan kaihruaiin, Pu C.Lalrinkima Chanmari West chuan hunserh a hmang.

(R.LALHMANGAIHA)

Secretary

Media & Publicity Deptt /Mizo National Front

Memo No.495/2026/ Dt.12.06.2026