Vawiin June ni 11, 2026 (Ningani) hian MNF President chamber-ah PAMRA leh Ex-MNA Association hruaitute chu MNF Senior Vice President Dr.R.Lalthangliana kaihhruaina hnuaiah inkawmhona khunkhan tak an nei a, tun laia Zoram khawvel politics boruak hrang hrangte an thlirho nghal.

He hunah hian Dr.R.Lalthangliana chuan MNF-in Mizoram Independence puan kum 60-na kan hman chhoh lai mekin, Mizoram leh hnam tana zalenna sualtute Ex-MNA Association leh PAMRA, hun rei tak zalenna suala ram hnuaia lo awm tawh te'n co-ordination committee din a, lungrual taka kal ho zai an rel chu lawmawm a tih thu a sawi a, ram tana an lo thawhrim tawhna leh inpeknaah a fak bawk.

MNF Senior Vice President chuan, "Under ground hun lai te, over ground-ah pawh MNF-te kan lokal tawh danah mipui duhthusam lo lai a awm ang tih kan ring a, chutiang thil awm palhah chuan ngaihdam kan dil tak zet a, hmasawn zel tur leh tun lai khawvel mil anga inzir zelin MNF chu kan kal mek zel a ni. Politics-ah hamthatna um avanga Zoram tana zalenna sualtute sawinep tumna leh sawi bawrhban tum an awm mek hi a pawi takzet a, hei hi inzirtirna diklo a ni tih thangtharte leh Zoram mipui hian i hre nawn fo ang u," a ti bawk.

He meeting-ah hian Co-ordination committee Chairman Upa Vanlalbiaa President PAMRA, Vice Chairman Pu Rochungnunga President Ex-MNA, Secretary pahnih Pu Lalchhuanawma GS, PAMRA, Pu K.Lalengzama GS, Ex-MNA, Treasurer Pu Vanropuia Sailo Treasurer Ex- MNA, Financial Secretary Pu Lalchhuanthanga Treasurer PAMRA-te an tel a. MNF Senior Vice President hi MNF GHQ General Secretary pahnih Pu L.T. Kima Fanai GS i/c GAD leh Dr.Renee Lalrinzuali GS i/c Ex-MNA ten an tawiawm bawk.

(R.LALHMANGAIHA)

Secretary

Media & Publicity Deptt / Mizo National Front

Memo No.494/2026/ Dt.11.06.2026