Vawiin ni 12, August 2026 chhun dar 12 khan 'Mizoram Independence puan Diamond Jubilee Celebration Committee' hruaitute chuan, Mizo Hnam Runah Jubilee lawm programme kal zelah, zalenna suala lo fehchhuak pawl hrang hruaitute kawmin, hun hlimawm leh hlawk thlak tak an hmang.

He hun hi Dr.R. Lalthangliana, Sr.Vice President & Chairman, Organising Committee chuan a kaihruai a, he hunah hian Ex-Mizo National Army Association(Ex-MNA), Peace Accord MNF Returnee Association(PAMRA) leh Mizoram Underground Returnee Association (MURA) hruaitu thahnem tak an kal a ni. Dr.Thangtea chuan, zalenna suala fehchhuakte chu lungrual taka Zofate Inpui MNF a hawkhawm a, neitu chan changtlang theuh tura ngenin, kan theihna zawn theuha kan ram, kan hnam leh kan sakhaw humhim a, ti thangduang zel turin i beiho ang u, tiin a sawm a ni.

Kalkhawmte chuan, Diamond Jubilee puala kohkhawm an ni leh, zalenna sualtute MNF-in hlut taka a kalpui reng thin lawmawm an tih thute sawiin, Jubilee lawmna programme kal zel turah pawh inpumkhatna leh thawhhona tha tak nen lungrual taka pen ho zel tha an tih thu an sawi. MNF-in Zalenna sual a, Mizoram tana engkim huama a beihna chu vawiinah thangtharte tan malsawmna nasa takin a thlen a. Kan ram leh hnam him zelna tur pawh thlenin, rohlu min hnutchhiah tam tak hi kan vawn nun a, kan vawn him zel a pawimawh a ni, thangtharte theihnghilh tawh loh tura Mizo Nationalism vawn nun zel hi a tul a ni, tiin, hun hlimawm tak an hmang.

He hunah hian Pu K. Vanlalauva, NCC, Pu K. Lalthawmmawia, Secretary & PAC, Pu C. Lalramzauva, PAC & Chairman MNF Legal Board, Pu VL Krosshnehzova, General Secy. leh hruaitu dangten telpuiin, hlawkthlak takin hun an hmang a ni.

(PETER CHHANGTE)

Secretary

Media & Publicity Department/ MNF General Headquarters

No. 517/2026/ Dt. 12. 08. 2026