Pu Zoramthanga, MNF President leh MNF Party hruaitute chu September ni 27 & 28, 2026 chhunga Pratidin Media Network buatsaih ‘5th Edition of The Conclave 2026’ Ashok Hotel, New Delhi-a neihah telin, Pu Zoramthanga, MNF President chuan One-on-One Interview Session hlawhtling tak a neih bakah Red Carpet Interview Session-ah Press mite a hmachhawn a. MNF Working President Pu Tawnluia leh Hon'ble MLA, Dr. R. Lalthangliana, Sr. Vice President, MNF ten Red Carpet Media Interview an nei bawk.

Pratidin Media Network chuan an Event lian ber, The Conclave 2026 vawi 5-na chu September ni 27 leh 28 hian Ashok Hotel, New Delhi ah an buatsaih a. He hunah hian policy siamtu politician lar te, political hruaitute, mithiam bik te, social activist-te, Industry aiawhte, infiammi te, artist te leh India ram hmun hrang hranga mi pawimawh chu sawm an nih anga kalkhawmin, India hmarchhak bial leh ram pum huapa thil pawimawh hrang hrang an sawiho a. Mizoram Chief Minister hlui Pu Zoramthanga, MNF President pawh a bika sawm a nih anga telin hun pawimawh tak pek a ni a. MNF Party hruaitu ten an ṭawiawm a ni.

'5th Edition of the Conclave 2026' ni khatna, September ni 27 hian Union Minister of Parliamentary Affairs Pu Kiren Rijiju-a'n Keynote Address a pek hnuah, he Conclave Session pawimawh berte zinga an chhiar tel, Former Chief Minister Pu Zoramthanga lehkhabu ziah “From Guerrilla Fighter to Chief Minister” tih thupui hmangin lehkhabu ziaktu chanchin leh politics kawng a zawh dan sawihona neih a ni a. MNF President Pu Zoramthanga chuan One-on-One Interview hlawhtling tak nei zuiin, Pratidin Media Network Director Ms. Smitakshi B. Goswami chuan a interview a. Conclave Session zawhah hian Red Carpet Media Interview neih chhunzawm lehin, Book Signing hun a hmang nghal bawk. Pu Zoramthanga lehkhabu "From Guerrilla Fighter to Chief Minister" chuan mite ngaihhlut a hlawhin, he lehkhabu kaltlanga MNF leh Mizoram chanchin ngaihven thar an tam zia te, he lehkhabu kaltkang veka remna leh muanna hlawhtling tak 'Mizo Peace Accord' (Memorandum of Settlement) chanchin leh Pu Zoramthanga chanchinin India ram ṭhalaite leh zirlaite thinlung a luah thukzia leh boruak a siam len-zia a takin he Conclave-ah hian a lang bawk a ni.

Red Carpet Media Interview session-ah MNF Sr. Vice President Dr. R. Lalthangliana, MLA chuan MNF aiawha lawmthu sawina leh Conclave hmanpui tura a bik taka sawm MNF President chanchin te, Memorandum of Settlement hlawhtling ber kan neih theihna tur leh India rama state ralmuang ber kan nih theihna tura Pu Zoramthanga leh Pu Tawnluia te thawhhlawk zia, Peace Accord architect pawimawh tak an nihzia leh khawvel ram dangte tan pawh entawntak a nihzia uar takin a sawi a. MNF hruaitute inhmelhriattirna a neih bakah kum 2028 Mizoram Election chungchang sawiin, "MNF chuan kum 2028 Election thlirin tunlai khawvel changkanna leh hmasawnna mila ke pen zel tur leh, kan mipuite leh kan ṭhalaite beisei dan mil policy & programme neih ngei kan tum a, kan inbuatsaih ngawrh hle a ni," a ti a. Kan ram leh hnam humhim tlat chunga ram mipui huapzo tur hmasawnna ṭha zawk thlentir turin MNF chu kan inbuatsaih uluk hle a ni, a ti bawk. He hunah hian Former Dy. Chief Minister Pu Tawnluia, Working President, MNF chuan Press mite zawhna chhangin hun a hmang zui ve bawk.

Pu Zoramthanga, MNF President hi MNF hruaitute - Working President Pu Tawnluia, MNF Sr. Vice President Dr. R. Lalthangliana, MLA; Er. K. Lalsawmvela, Member, PAC, MNF GHQ; Pu Gogo Lalremtluanga, Gen. Secy., MNF GHQ, Pu Lalnunmawia Pautu, Secy., MNF GHQ leh Pu Isak Malsawmtluanga, Secy. and PS to the President, MNF GHQ ten an ṭawiawm.

'The Conclave' buatsaih ṭhintu Pratidin Media Network hi NE India lam ngai pawimawh bik Media Network lian tak niin, NE lam chanchin bikte ram pum huapa sawihona zau zawkah hruai luh hi a tum lian tak pakhat a ni a. Media platform hrang hrang kaltlangin he network hian public affairs, khawtlang nun, culture, ṭhalaite, infiamna leh hmasawnna kaihhnawih thil te a ngaihvenin a buaipui nasa hle a. Chutih rualin policy siamtute, mithiamte, mi langsar te leh mipuite inkarah inzawmna remchang siamin ram hnuk khawih thil pawimawh sawihona leh inbiangbiakna awmze nei tak a buatsaih ṭhin a. Tun ṭuma Conclave pawh hi he hmalakna chhunzawmna niin, India hmarchhak leh India ram pum huapa thil pawimawh hrang hrang sawihona hun an buatsaih leh a. Conclave-ah hian ram rorelna, politics, zirna, culture, infiamna, hmarchhak bial chhung inpumkhatna, ṭhalaite leh hmasawnna kaihhnawih thil chi hrang hrang sawiho a ni.

(LALṬHAKIMA)

Joint Secretary

Media & Publicity Department/ Mizo National Front

Memo No. 541/2026/ Dt.28.09.2026