MIZO HNAM RUNAH GUERILLA FIGHTER ATANGIN CHIEF MINISTER TIH LEHKHABU TLANGZARH A NI

Vawiin July ni 13, 2026 (Thawhtanni) chhun dar 11:30am hian Mizo Hnam Runah MNF President, Pu Zoramthanga former chief minister chu a piancham ni takin a lehkhabu buatsaih 'Guerilla Fighter atangin Chief Minister' tih chu former deputy chief minister Pu Tawnluia member NCC, GHQ chuan a tlangzarh sak.

He lehkhabu hi Saptawnga tihchhuah tawh a ni a, Pu Zoramthanga chuan a beisei phak bakin Mizoram chhung mai ni lo, ram pawn lam thleng pawha an hlutsak chu lawmawm a tih thu a sawi. Thangthar lo awm zel tur tan Mizo hnam movement chanchin mamawh lakkhawm theihna tur 'Mizo Hnam Movement Dictionary' tangkai tak anih ngei a beisei thu a sawi bawk.

Pu Zoramthanga chuan lawmthu sawiin, a tirah chuan he lehkhabu hi 'ka autobiography' tih mai ka tum laiin; saptawnga min buatsaih saktu penguin hovin 'from rebel to chief minister' tih rawh min ti a. Keiin zalenna sualtu kan ni a, hel kan ni lo a, chutiang chu ka duh lo, ka ti a, 'freedom fighter' tih zawkte kan rel laiin, tuna a bu hming 'Guerilla Fighter atangin Chief Minister' tihah hian kan sirtluk ta a ni. Miin an chhiarin hreawm an ti palh ang tih ka hlau hle a, mimal rilru tina zawngin thu pakhat mah ka ziak lovin ka hria a, a taka ka paltlang thudik tak, ka experience atanga ka ziah a ni, a ti.

Pu Zoramthanga chuan zallenna an sual laia harsatna an paltlang dan hrang hrangte a sawi a, East Pakistan leh Europe ram hrang a ṭulna avanga an fan chanchinte a sawi bawk. Mizo hnam hi Lalpa'n hun hnuhnungah a chanchintha hrilh turin MNF hman hi a duh a, Lalpa'n kawng lakah min kalsan lovang, a ti bawk.

Lehkhabu tlangzarhtu Pu Tawnluia former deputy chief minister, member NCC GHQ, Underground sorkara Army Chief lo ni tawh chuan ka tan chuan he lehkhabu release-tu nih hi 'tawnloh sa bawp' a ni ringawt a, a release-tu nih hi ka phulovin ka tlinglo hle tih ka inhria. Mizo hnam movement-ah a tir atanga tel, vawiin thlenga min la dam puitu, kum 36 zet MNF President ni mek Pu Zoramthanga'n a lehkhabu ziah 'Guerilla Fighter atangin Chief Minister' tih lehkhabu hi thang leh thar lokal turten Mizo Nationalism tun dinna atana tangkai taka an hman atan lawm takin a release a. Pu Zoramthanga'n Mizo hnam tana zalenna sual laia sulsutu pawimawh tak a lo nih tawhna leh Mizoramin Chief Minister kan neih tawha thawk tha ber a lo nih tawhnate hi thangtharten an theihnghilh ngai loh tur thu a sawi.

Lehkhabu thlir lawkna neitu Dr.Zoramdinthara Associate Professor & Head of Department, Mizo department, MZU chuan lehkhathu ziaktu hi India ram leh zofaten kan hriatna ber chu Mizoram leh hnam tana zalenna sualtu a nihna leh Mizoram Chief Minister ṭum thum ngawt anih tawhna hi a ni. A ziaktu hian lehkhabu tam tak ziak lo mahse; ziak mi huangah tuna lekhabu a ziah avang hian kan senglut thei ta a, he lehkhabu hi thang leh thar lo awm zel turte tan Mizoramin zalenna a sual chungchangah lehkha rawn tlak berte zing ami a ni zel ang, a ti.

He lehkhabu hi mahni chanchin leh sulhnu ziahna chanchin (autobiography) a tih theih bawk. He lehkhabua tawngkam a hmante hi thu khunkhan leh harsa hmang lovin, tawngkam tluangtlam, chiang leh fiah si, chhiar leh hriat nuam tak a hmang vek a, hei hian thuziak thiam tak a nihna a tarlang. Mawlmang tak, uar thiam si tawngkam a hmang theite hian ziaktu ropui anihna a pholang a. He lehkhabuah hian mahni infakna thu pakhat mah a zep tel lo a ni, lehkhabu preview-tu chuan a ti bawk.

Inkhawm hi Dr.R.Lalthangliana MLA, Senior Vice President chuan kaihruaiin, Rev.B.Vanlalduha PCI chuan hunserh a hmang. Nl.Lalrempuii Hnamte leh Tv.K.Lalrintluanga ten zaiin kalkhawmte an awi.

(R.LALHMANGAIHA)

Secretary

Media & Publicity Deptt

Memo No.504/2026/ Dt.13.07.2026.