Vawiin Dt 22.07.2026-a Mizo thalai rualin an dikna chanvo humhalh nana huaisen taka an penchhuak hi MNF chuan lawmawm kan tiin, kan thlawp a. Zirlai ten an chanvo thuneihna hmanga rahbeh sak an duhlohna leh hemi avanga tuartute thlavang an hauh sak hi an tih tur dik tak an ti ah kan ngai a, huaisen taka thudik tundinna tura pen zel turin kan chah bawk a ni.

Vawiina Thalai rual pungkhawm hian thuneihna hmang sual a, thil diklo ti thin te hi an hua a, an do dal a, ngampa taka an tal chhunzawm loh nan a tidiklo te hrem leh a tuartute zangna dawmna pek an ngiat hi thil tih makmawhah kan ngai.

Thudik tundin duhna leh sual huatna hi Mizo Nationalism laimu a ni a, huaisen taka ram leh Hnam tana penchhuah hi kan Nationalism kawngpui a ni. Thalai rual heti zat chutiang tingam tura penchhuak Ngam an awm hi a thlamuanthlak kan ti takzet.

Rim taka zir a, theihtawp chhuah ten an dikna chanvo tur tihbawrhban sak an ni thin hi India ram kalphung diklo lian tak a ni a. Chu hrichhia chu keini hmarchhak kilkhawra awmte pawh hian kan hua a, kan ram chhunga bukhuar ve tur atan phei chuan kan phal lo bur a ni.

Zirlaite chanvo tihbawrhban kawngah tunnhnaiah kan rama MPSC hnuaiah pawh sawi tur a awm nual hi a pawi kan ti a, kan sawrkar hian zirlaite rilru thianghlim tak hmanga thudik tundin an duhna hi hrechiangin thil diklo awmte chhuichiang a, hmala nghal turin kan phut a ni.

He punkhawmna hian kan hmalama Zoram ti eng se, India ram pawh hian Mizoram thalaite chuan sual an hua a, nawmsipbawlna hmanga kan ram suasam hi kan remti ve lo a ni tih hi lo hre mawlh rawh se. Sualdo a dikna hmanga Hnam tundinna kawnga hmalatute reng reng chu MNF chuan kan thlawp zel dawn a ni.

(B LALHMANGAIHZUALA)

Secretary

Media & Publicity Department/ Mizo National Front

Memo No. 508/2026/ Dt.22.07.2026