Vawiin June ni 30, 2026 (Thawhlehni) hian 'Remna Ni' vawi 40-na chu Mizoram hmun hrang hrangah MNF hruaituten urhsun takin an hmang.

Tawi East & West Block huaihawta Thingsulthiah Community Hall-a hman puitu President Pu Zoramthanga chuan remna kan neih theihna tura sulsutu leh thawktu zawng zawng, Kohhran, NGO, Political Party te leh ram mipuite chungah lawmthu sawiin Remna Ni chibai a buk a. "Vawiina Remna Ni kan hman mek, MNF leh India inremna hi inremna zawnga hlawhtling ber, hunin a finfiah tawh niin, a rei tulh tulh ang a, a hlutna kan la hre zual zel dawn a ni," a ti.

Pu Zoramthanga chuan, "MNF leh India inremnaah hian India Danpui chhunga Mizoram inhumhimna Article 371G pawimawh tak a tel a. He Article hi kan hnam Pasalṭhate sa lu hawn, nunna leh tawrhna tam tak nena hlawh chhuah, Mizo mipuite pawhin tawrhna hrang hrang nena kan hlawh chhuah a ni a; India Danpuiin Mizo hnam min venhimna a ni," a ti a. India Danpuiah Mizoram State chungchanga ruahmanna bik engpawh lo inziak mah sela, State Legislative Assembly remtihna lo chuan Mizoram State-ah hman theih a ni lo ang, tiin Mizoram chu thuneihna min pe a ni, a ti.

"Inremna avanga kan hlawh chhuah - Mizoram Special Provision Article 371G chelek a ngaih hunah tak, ZPM Sorkarin hmang ngam lova FCAA 2023 pumpui an pawm fai vek mai kha Mizoram chhunga Mizote thuneihna Central Sorkar kuta hlanna dik tak, Mizoram leh Mizo hnam tan thil pawi tak a ni a, ṭhangtharte tan pawh a la pawi dawn chauh a ni," Pu Zoramthanga chuan a ti bawk.

"Kan Hnam Sipaite sa lu hawn, a bika kan humhimna neih, ZPM Sorkarin Pu Lalduhoma hova Central kutah an lo pek ngawt hi MNF a Sorkar leh hunah kan la let leh dawn a; Article 371G humhim ngam MNF hi Mizoram humhim turin a sorkar leh ngei a ṭul bawk a ni," a ti a. "MNF leh India inremna hi ram dangte pawhin chilthli tla zawih zawiha an en, an awh ve em em a ni a. Kan ṭhenawm ramte pawhin remna tluantling duhin he inremna ang hi neih ve tumin MNF hi min ko mek a, hunin a finfiah tawh he inremna tluantling ber hi i humhim zel ang u," tiin Pu Zoramthanga, MNF President chuan ram mipuite a sawm nghal bawk a ni.

Mizo Hnam Run Aizawla hmannaah Senior Vice President Dr.R.Lalthangliana chuan, tuna kan remna ni hman hi chawlh lawkna a ni a, ram changkang zawkte angin hnam hmangaihna tak tak thinlung nen Economics Independent kan sual leh mek a. Remna kan neihna atan kohhran, zirlai pawl, political party-ten theihtawp chhuahin, engkim chan huamin, Pathian hnathawh ropui tak lolangin, remna ziahah Mizo Nationalism an tung tel lova; an tung tel ngai hek lovang tiin, Dr. Thangtea chuan, 'mahni ke a ding thei turin kan intodelh a ngai a, Remna Ni lo thleng hi Mizoram tan kan hlan ve thei dawn em tih hi ka zawhna a ni, a ti bawk.

Mizo Hnam Runa hmanna hi Pu Lalruatkima Treasurer chuan a kaihruai a. Tukin zing khan Senior Vice President leh Treasurer hian Remna Run Luangmualah zalenna sual kum 60 tlin lawmna pualin thing an phun bawk. Dr.Thangtea hian Col.Lalrawnliana lehkhabu ziah 'Exodus Day leh Bangladesh War' tih chu a tlangzarh nghal bawk.

Pu Vanlalzawma, Vice President, pawhin Mamit Chhim veng Hall-ah hmanpuiin, MNF founder President Pu Laldenga thusawi sawi chhawngin, MNF lo chhuahna chhan pakhat chu kan awm loh hlanin Mizoramah Arona hovin Sebawng lem inlo chhungin in lo siam ang tih kan hlau a ni tiin MNF kha Mizoram hmangaihna avangin an lo chhuak a. MNF-te kha Kum 20 meuh hrehawm tuarin ram tan an feh chhuak a, ram hnuaiah rilṭam tuihala an awmin ei tur an hmuhin a hmutuin ei mai loin ṭhiante nen a huho in an ei tlang ṭhin. Chung zawng zawng chu ram leh hnam hmangaihna avangin an lo paltlang a, tunah ṭhangtharte hian kha an inhmangaihna ang te, aia upa zahna te, kei kei ti loin, in hmangaih tlangin ram tan i inhlan thar leh ang u, kan hnam pasalṭhate hniak hnungzui turin thangtharten ke i pen ang u, a ti.

New Serchhip North VC Hall-a hmanpuitu PAC Pu R. Lalzirliana, Ex-Minister chuan remna hlutzia hre tur chuan remlohna hreawmzia kan hriat a ngai a, tuboh leh dolung inkara awm ang maiin mipui kan awm lai hre pha chuan a hreawmzia kan hriat kha. NGO, zirlai, Kohhran leh mipuiten hnam sipaite lo haw tawh mai ru an ti a, inremna ziah kawngah hre bik nih tum an awm ṭhin. Kan CM Pu Duhoma hian MNF leh India sorkarin Shillong Accord an sign laiin ka pu Ch. Chhunga nen kan awm, a ti a. MNF in Shillong Accord an sign lo tih chu Pu Zoramthanga'n a rawn sawifiah tawh kha. Remna sign a nih avangin mi ṭhenkhatin an peih tawh lo a, an tlawm a, an rawn chhuak alawm tih ang chi ṭawngkam hman hi a fuh lo, a ti.

PD Sena Memorial Hall, Champhai Kanan Venga hmanpuitu Ex-Minister, Pu TJ Lalnuntluanga GS pawhin kan hnam movement kha politics avang te, mahni intarchhuah duhna vang te, pawl anga hamṭhatna lak duh avangin sawi nep emaw, sawihnawm duhna lo awm ṭhin chu pawi a tih thu leh zirtirna him lo leh diklo a nih thu a sawi. Remna ni kan hman hi Mizo zawng zawngte aiawh MNF leh India sorkar inremna a ni a ti a. Remna siam kawnga hma lo la tawhtu zawng zawngte chungah lawmthu sawi thar lehin, hnam sipaite a ngaihsan thu leh a chhuan thu a sawi a, Pathian duh danin kan tawn ṭheuhah ngaihdamna thinlung nen remna leh muanna vawng him zel ang u, a ti bawk.

MNF MLA pute : Ramthanmawia - Hnahthial Mizo Hnam Run; Er.H. Lalzirliana - Vantawng Group YMA Hall, Thenzawl Bazar veng; Pu K. Laldawngliana - Lungdai; Er. R. Rohmingliana-te chuan Lunglei, Mizo Hnam Runah an hmanpui.

Pu Tawnluia Ex-Dy. CM, NCC- Khawzawl Zaingen Hall; Pu K.Vanlalauva, NCC, Ex-Minister - Sesawng; Pu R. Lalzirliana, PAC, Ex-Minister - Serchhip; K. Lalrinliana Adviser, Ex-Minister- Kolasib Hnam Run; Er. Lalrinawma GS, Ex-Minister - Ni 100 Hall, Tlungvel; Dr. ZR Thiamsanga GS, Ex- MLA -Thangtea Hall, Champhai Kahrawt; Er. K. Lalsawmvela GS chuan Phullen Community Hall-ah an hmanpui a. Pu Lalnunmawia Pautu, Vice President, MNYF Hqrs. hovin Ṭhiakah hman a ni bawk.

(R. LALHMANGAIHA)

Secretary

Media & Publicity Deptt

Memo No.501/2026/Dt.30.06.2026