Vawiin June ni 8, 2026 (Thawhtanni) hian Mizo Hnam Run chhung inkhawmah MNF Senior Vice President Dr.R.Lalthangliana chuan Rajya Sabha MP, MNF official candidate atan Zothansangi Hmar D/o Rualkhuma Hmar, College Veng, Aizawl chu a puang. Candidate hian vawiin hian Pu Zothansanga Ralte, Assembly Commissioner hnenah nomination a file nghal a, MLA 4 ten signature pe a rawtna siamin, MLA leh party hruaitu engemaw zatinin an tawiawm.

Dr.Thangtea chuan, "Vawiina kan candidate hi thalai viak tha tak, Zofate zinga chhuanawm tak a ni a, thiamna lamah pawh theuneu lo tak a ni. MNF-ah kum naupang zawk leh thalaite tan hmun zau tak a awm a, hmeichhiate hi RS MP candidate-ah a ruat hmasa ber party kan ni a, hmeichhiate hian MNF-ah hmun pawimawh tak an luah thei a ni tih a lantir a, duhsakna sang ber kan hlan a ni, a ti," a ti.

MNF MP (RS) candidate Zothansangi Hmar pawhin MNF-in ram tana hma a lo lak tawh leh hmachhawp te chhunzawm ve theihna kawng zawh tura MP (RS) candidate atan ruat a ni chu phulo a inti a, lawmawm a tih thu sawiin, MNF candidate mai ni lo, Mizo hmeichhiate aiawha ding leh Mizo mipui aiawha ding a nih thu a sawi. Ukil ka nihna angin Dan hi miretheite tanpui nan, dikna humhim nan hman theih a ni tih ka hria a, hemi kawngah hian theihtawp ka chhuah ang, a ti.

A ngaih pawimawh turte sawiin ramri leh hnam humhimna te, hmeichhe dinhmun chawikanna tur leh chhungkaw din chhuahna tur te, thalaite ei bar zawnna, thiamna leh hnathawh tur te, North East Industry Policy thar din te, skill development leh sports & music lama hma a lak tur thute MNF MP RS candidate chuan a sawi.

Thusawitu Pu Gogo Lalremtluanga General Secretary GHQ chuan Remna leh muanna kan neih atanga kum 40 na anih tawh thu a sawi a. Tun laia tawngkam lar tak Gen Z te hi internet khawvela piang leh sei lian an ni a, corruption do leh politics khawvelah hma latu ber pakhat pawh an ni. Mizo hnam sipaite pawh kha kum 14 leh kum 29 inkar deuh vekte an ni, a ti. Kan hnam sipaite kha Gent 66 vuahin, ram leh hnam tana pen chhuak hmasa ber tute an ni. Hnam movement kha lo awm lo ta se la, Mizoramah Mizote hi majority kan ni pha ang em, hnam dang in leh lo bakah hnam dang Pathian Biakin engzat tak awm ang maw, tiin, vawiinah hian kan hnam movement kha diriam thei kan ni lo, kan zah hle tur a ni, hnam sipaite kha lo awm lo se Mizoten vawiina kan dinhmun hi kan thleng lo ang, a ti.

Chhûng inkhawm hi Prof.F.Lalnunmawia Ex-MLA, General Secretary GHQ chuan a kaihruai a, Pu Lalnunmawia Jont Secretary chuan hunserh a hmang.

(R.LALHMANGAIHA)

Secretary

Media & Publicity Deptt / Mizo National Front

Memo No.493/2026/Dt.08.06.2026

BIO-DATA : ZOTHANSANGI HMAR D/O RUALKHUMA HMAR (L), ROSANGZUALI (mother) R/O COLLEGE VENG, AIZAWL

Zirna lamah B.A, (Political Science) LLB.

Hnathawh : Ukil, kum 2015 atangin a thawk tan a. MNF term hmasa khan Asst. Public Prosecutor-a ruat a ni a. Tunah Private Law Firm, Saihmingliana Sailo (MNF Legal Board member zing ami) nen an din a, ukil hna a thawk mek a ni.

Kum naupangte in, chanchinbu-ah ram leh hnam issue hrang hrangte auchhauhpui nan, Article engemawzat a lo ziak tawh a, tunah pawh freelance/occasional writer a ni mek. Mizoram Information Commission-in kum 2015-a, RTI leh Mizote chungchang essay in ziah siak a buatsaihnaah lawmman 1-na pawh a lo tawh a. Kum 2015 vek khan a pa in, Kejriwal lehkhabu Swaraj let tura a tih angin, he Swaraj chu a let ta a. Kum 2016-ah MC Lalrinthanga’n a publish sak a. He lehkhabu Swaraj (Mahnia ro-inrel) hian lehkhabu lehlin tha thlan chhuah zingah top-5 ah a lang nghe nghe ani.

Mahni tawka ram vei ve em em, thuziak hmanga a veizawng te lo auchhuahpui thin a ni. An veng College Veng YMA-ah pawh Executive Member te pawh lo ni tawh a ni. Veng chhung chanchinbu leh kohhran chanchinbu pawh a lo enkawl tawh thin bawk. Tunah hian MNF Legal Board, Treasurer a ni a, tin, Mizoram Hindi Board leh Mizo Youtuber Association te tan Legal Adviser a ni mek.

Politics lamah hian chhungkua atangin a Pu Thanghuta (L), Mizoram underground sorkara Senator thin a ni a, tin a pa hi Rualkhuma Hmar (L), kan party MNF Adviser leh MNF Legal Board chairman nihna lo chelh tawh thin a ni.