Vawiin September ni 21, 2026 (Thawhtanni) hian MNF chuan 'Martar Day' Vawi 46-na chu Mizoram hmun hrang hrangah urhsun takin a hmang. Martar Day hi nimin ni 20 kha a hman ni tur ni mahse, Pathianni anih avangin vawiin hian hman a ni ta zawk a ni.

A hmanna pui ber Mizo Hnam Run, Aizawlah MNF President Pu Zoramthanga chuan Hnam Martarte hlutna leh ropuizia sawiin, "Ṭhangthar lokal zelte pawhin ram tana zalenna sualtu Mizo Hnam Sipaite leh Hnam Martar-te ngaihsan nachang leh hlut nachang an hre zui zel leh an ngaihven thar nasa hi ropui ka tiin lawmawm ka ti tak zet a ni," a ti a. "Hnam Sipaite leh he Hnam tana Martar-te inpekna leh hnathawh zawng zawng te, engkim huama an inhlan ralna kha a ropuiin a zahawm em em a. Vawiina la damte leh ṭhangthar lokal zel turte pawhin zah tak chunga kan hriat reng leh thudik hre tura kan zirchian a pawimawh hle a ni," a ti.

"Zalenna sualtu Mizo Hnam Sipaite leh Mizo Hnam Martarte thisen zara kan ramin thil tam tak a lo hlawhchhuah tawhte hi a hlu em em a. Inremna (Peace Accord) a awm theihna tura Kohhran, Political Party, NGO te, ram mipui leh kan Hnam Sipaite'n kan mipuite ngenna avanga inremna lo awm ta leh an lo hlawhchhuah kha a hlu em em a. Heng zawng zawng hi kan thinlungin engtikahmah a theihnghilh ngai lo va, kan ram tana nunna hlantu Hnam Martar-te thisen hi Mizoram tan a luang thlawn ngai dawn lo. Chuvangin vawiinah hian MNF leh he ram leh hnam hian zahna chibai i buk nawn leh ang u." a ti.

"Sorkar lai mek Chief Minister te, kan Political Opponent ṭhenkhatin MNF movement leh Mizoram Peace Accord (Memorandum of Settlement) sawinep leh sawihnawm tum ṭhin mah sela,; Mizo Hnam Sipaiten kan ram leh hnam tan nunna thapa zalenna an lo sualna te, Mizo Hnam Martarte thisen man hlutziate hi a dal phah ngai dawn lo va, sawinep theih ngawt a ni lo a. Inremnaa tel ve lo, a engamah hre tak taklote lo sawinep tum ve ngawt chi pawh a ni hek lo," Pu Zoramthanga chuan a ti.

MNF President chuan, "Harsatna tam tak paltlanga Mizoram Peace Accord-in a hlawhchhuah Article 371(G) te, kan ILP insawhnghehna tiderthawng thei zawnga ZPM sorkar chet duh dan hi a demawm hle a. Kan thuneihna hmanga kan ram kan humhimna tur FCAA an lo dahkhamna zawng zawngte hi Pathian leh mipui zarah MNF a sorkar leh hunah kan lalet ang a, kan ram leh hnam, kan mipuite tan kan sawhnghet leh ngei theih nan kum 2028-ah MNF hian Mizoram enkawl tura sorkarna an chan leh ngei a ṭul a ni," a ti bawk.

Serchhip-a hmanpui tu Pu Tawnluia, Working President chuan Mizo Hnam Martar thlanmual, Luangmualah khuan MNF hnam sipai, zalenna suala Martarte chauh dah an ni lova. MNF pian hmaa British dotu Mizo Hnam pasalthate hming pawh dah vek a ni. Chuvangin Hnam Martar thlanmual dik tak a ni a ti.

Pu Tawnluia, Dy. CM hlui chuan Pu Lalduhoma thusawi chhangletin, "Kan CM-in Law zirlaite hmaah MNF leh Home ministry inremna chauh a ni. MNF te hi Mizoram aiawh a ni lo, a ropui chiam lo ve a ti duh a. Inremna pawh teitet a tum lui ngar ngar a ni. ILP pawh sorkar laipuiin an duh hun hunah an hlip thei a ti duh a. Hetiang zawnga sawi duhtu kan CM ni mek, Serchhip bialtu MLA hian 'dawih aw, tlanchhe aw' a chhuah a ni, a ti a. '"Tunhnaia MNF OB ruat tharte hian tumahin candidate nih kan tum lo.Ṭhalaite khawvel a ni tawh a, chuvangin MNF hian ram kaihruai a, hmasawnna kawng zawhpui turin mizo nationalism a chiang ṭhalai a tam thei ang ber kan candidate dawn a ni," a ti bawk.

Lungleiah chuan Senior Vice President Dr.R.Lalthangliana MLA-in a hman pui a, Mizo Hnam Runah hman a ni. Dr.Thangtea chuan Mizo hnam martar-te zahna chibai a bûk a, hnam sipai la damte a ngaihsan thu sawiin, Mizo hnam Pa Pu Laldenga kha khawvel hriatah hnam anga min pho chhuaktu a ni a, zahna chibai ka buk bawk a ni, a ti.

Tunah hian zalenna suala beih kum 60-na kan hmang mek a. Kan hnam sipaite khan kum 20 chhung Mizoram chhung leh pawnah thisen tam tak luangin kan ram tan an bei a, thangtharten kan hlut thiam a ṭul hle a ni. Tunah hian Mizo thalaiteah Nationalism-a harh thar lehna thleng mek hi a lawmawm tak zet a. Chief Minister Pu Lalduhoma hian kan hnam movement kha nasa takin sawihnawm tum thin mahse; mithiam tak tak te, India ram chhung leh pawn a mite pawhin an hlut hle a, min hlutsak tulh tulh zawk a ni. MNF chu hmalam pan zel tur kan ni a, kawng lakah party dangte angin kan tawp ve mai mai thiang lo. Mizoram leh hnam, kan sakhua leh hnamzia vawn him tlat hi NNF thil tum ber a ni. Zohnahthlak khawvel hmun hrang hranga thendarha chengte rorelna pakhat hnuaia awm tir leh hi MNF thil tum lian ber a ni, a ti bawk.

He hunah hian MNYF Headquarters President Pu Gogo Lalremtluanga leh Vice President Pu Lalnunmawia Pautu leh thalai engemaw zatin an hman pui a, Pu Gogo Lalremtluanga pawhin thu a sawi bawk a ni.

Saitualah chuan Pu Vanlalzawma, Vice President, Ex-MP hovin Saitual Lal Dorawta Hall-ah hman a ni a. Pu Zawma chuan Martarte Ni puala pungkhawmte hnenah thuawihnain malsawmna a kentel thusawiin, Martarte inpekna pawh thuawihna vang leh hnam rilru put tlat vang a ni, a ti. He bial hi party ang pawhin bial thuawih thei in ni a, chu thuawihna nun chu kan hmabak politics-ah pawh neih chhunzawm zel a tul a, he thuawihna hi MNF ze dik tak niin, Zoram puma MNF-te pawhin kan nunpui zel tur a ni, a ti. Mahni indahthaa party hmasawnna tur kan ngaihtuah rualin kan ram leh hnam kan dah hmasabzel a tul a ni. Mizo hnam tan a tawp thlenga tang ngam party kan nihna hi kan tlansan a thianglo, a ti. Engkim chan huama Mizote tana Martarte hi an hlutna thangtharten an la hriat belh zel dawn a ni, a ti bawk.

Khawzawlah chuan Tuichang MNF North Block huaihawtin Zaingen YMA Hall-ah hman ni a. Hun hman puitu Pu Lalruatkima Treasurer chuan, "Tuma awpbeh ngai loh hnam kan ni ṭhin a, Zofa unaute ṭhendarhin kan awm ta a. Zalenna famkim neih theih nan leh kan hnam leh sakhua him zel theih nan Zoramin zalenna a sual a. Jet fighter meuh hmangin India-in min bei a. Nunna tam tak kan chan a, in leh lo leh buhzem thlengin hal a ni a. Kan hmeichhiaten pawngsual an tawk a, a rapthlak em em a ni," a ti a. Hnam tana martar-te kha an thamral mai dawn lo a, Zofate thinlungah an nung reng ang. Martar-te inpekna chhunzawm turin nang leh kei hi Martar-te thisenah i inhlan thar ang u. Mi ṭhenkhatin sawihnawm tum mahse, Zofate zalenna sualna kha khawvel hian a hria a, he hnam tan hian a hlu a ni. Kan ram kan hnam kan sakhua a him zel nan MNF chuan theuh tawp a chhuah zel dawn a ni," a ti.

Champhaia PAC Pu TJ.Lalnuntluanga Ex-Minister chuan MNF-in zalenna sual a, Mizo Nationalism meichher a lo chhit avangin, chimrala awm mai tur Zofate hnamah kan harh chhuah phah a. Martar-ten an nunna hlu tak an lo hlanna kha MNF tan chauh nilovin Zofa zawng zawng tan a ni. Pathianin a din, hnam pasalthate thisen a lei, Zoram leh hnam hi a boral lovang, a ti.

Mamit-ah Vice President Pu Lalchamliana; Kolasib-ah Pu D.Thangliana Vice President; Adviser MNF GHQ Pu K.Laldawnglina, MLA, Hortoki; Adviser Pu TC.Pachhunga Ex-MLA, Hnahthial; General Secretary GHQ Er.Lalrinawma, Ex-Minister Khawbel; General Secretary Dr. L.Thangmawia Ex-MLA chuan Kawlkulhah an hman pui bawk.

Martar Day hmun hrang hranga hmannaah hian Martar-te thlanmualah zahna pangpar dah a ni a, Martar-te sun nan minute khat chhung ngawi renga din ṭheuh a ni bawk.

(R.LALHMANGAIHA)

Secretary

Media & Publicity Deptt / Mizo National Front

Memo No. 534/2026/ 21. 9. 2026