AMC INTHLANA LALNA LEH THUNEIHNA THLAKHLELH VANGIN KUM 2 HNUAH KAWNG SIAMTHA AN NI.

-Lalpianfela Chawngthu,

Vice Chairman, MNF Legal Board & Gen.Secy. NNF GHQ.

Vawiin ni 27 March, 2026 Zirtawpni hian Mizo Hnam Run ah chhung inkhawm neih niin, Pu Lalpianfela Chawngthu Legal Board Vice Chairman chuan thusawiin, AMC Inthlan puan a lo ni ve ta a, Khawvel sorkarah hian duh duh huna inthlan puan ching an awm a, chung zingah chuan North Korea te, Burma te an tel a. Tun hnaiah anni ram pahnih pawh an inthlang ve ve tawh. ZPM hian heng ramte hi a entawn mek a, VC inthlan min sawn hnaih sak a, AMC inthlan min sawn hlat sak thung a, dan awmsa reng palzutin, lalna leh thuneihna an channa tur hun remchang, an chet that hun thlirin mipui min inthlanpui a. Mizoram mipui hian ZPM hnuaiah hian 'North Korea of the West' nge kan nih 'Burma of the West' kan nih pawh kan inhre hrang thei tawh lo a ni, a ti.

Pu Mapiana chuan, Kum 2018-a MNF sorkar khan Congress sorkarin kawng chhe pui pui a hnutchhiah te siamthat hna an thawh nghal mup mup thu sawiin, ZPM sorkar erawh chu MNF sorkarin kawngtha kan hnutchhiah avangin kum 2 chhung kawng siamthat hna thawk mumal loin an awm thei. An vannei chungchuang hle a, an sorkar atanga kum thumnaah kawng an han siamtha ve ta hram a, heng an kawng siamthat mek, kawng a nihna tura lai dar a, tha tamtak lo seng tawhtute chu engmah thawh nei lo a an sawi thin, sorkar hmasate an ni, a ti a. An kawng siamthat mek te hi mipui min hmangaih avanga siam niloin AMC inthlana lalna leh thuneihna an thlakhlelh vanga siam an ni, tih hi mipuiten an hriatreng thu leh kawng siam nan hian mipuiin chhiah kan chawi avangin, ZPM sorkar hnuaiah hian engtik lai pawhin kawngtha neih hi mipuite chanvo a ni a, kan veng kawng a chhia anih chuan ZPM hi vote nawn kan ba miah lo.

Media lama kan lo hmuh danin October ni 30, 2025 zan khan PWD Minister, Pu Vanlalhlana chuan, “Wheelbarrow kal theihna chin pawh siam vek kan tum” a ti a. Vengtin hian kawng siam chungchangah ZPM kan tehna tur chu kan veng theuha wheelbarrow kal theihna chin an rawn siam tawh em? tih a ni, kan veng kawng wheelbarrow kal theihna chin an la siam loh chuan AMC inthlanah vote kan ba lo, an siamthat china awmte pawh hian Chhiah kan chawi tlingkhawm atanga siamtha mai an ni tih hriain, mipuiin kan siam a ni tih kan hriat a tul, a ti bawk.

Pu Mapiana chuan, MUHCS chungchang sawiin, MUHCS 1.0 kha mipuite leh Opposition Party te pawhin heti em em te chu kan tlin reng ang emaw kan ti hial a, mipui pawh kan lawm a, chawlhkar tluana sa hmeh reng ang kan ni. Mahse, MUHCS 2.0 a lo chhuak a, sa hmeh a khat tan ta a ni ber, 1.0 rawng senduk kha a senlar pawh ni loin, a sendang a ni chho dawn ta niin a lang, a ti a. Pensioner-te hi tun dinhmun Mizoramin kan thlen theihna tur atana thi leh thau pawlha, a thim avar pawh thlu lo a kan ram leh hnam tana hma lo hruaitu leh kawng sialtu an ni, an thiamna leh finna zawng zawng hmanga min kaihruaitu leh theihna zawng zawng kan ram tana lo hlantu kan pi leh pu te hian duat an phu kan ti em le? ZPM sorkarin hetiang mai maia a enkawl hi an phu lo a ni. MUHCS 2.0 ah an dinhmun a chhe chho ta hi a pawi takzet a. Sorkar tha chuan a senior citizen-te a tuamhlawm tur a nih laiin, ZPM sorkar hi chuan kum upa te pawh an huphurh tawh em em mai a ni, a ti a.

MNF Legal Board Vice Board Vice Chairman chuan, MUHCS 2.0-ah Pensioner-te an lawm lo a. Sorkar hnathawk pawhin MUHCS hmaa an awm theihna Hospital-ah an awm thei tawh dawn lo niin a lang. MUHCS chungchanga Pvt.Hospital-te nena agreement an siamna rate an puangzar ngamlo te hi eng dan nge an tlawhchhan? Mipui sum - Public Fund hmanna chipchiar puanzar ngam loh hi dan bawhchhiatna a ni a, thil dik lo pawh awm se mipuiin kan hre thei dawn lo a ni, a ti bawk.

Mizo Hnam Run chhung inkhawm hi Adviser, Upa PP Thawla, Ex-Minister chuan kaihruaiin, Pu Lalnghakliana Adviser chuan hunserh ahmang a, Nl. Annie Khawlhring chuan zaiin min awi bawk.

(B.LALHMANGAIHZUALA)

Secretary

Media & Publicity Department: Mizo National Front

Memo No. 454/2026/ Dt. 27.03.2026