MNF chuan Lalremsiami Hmarzote leh Lalthantluangi te hi chawimawina chibai kan buk a ni.

-Tawnluia, MNF Working President

Khuangchawi thla vawiin ni 5, 2026 (Thawhtanni) chawhma dar 11:00 hian Mizo Hnamrun chhung inkhawm neih a ni a. Hun hnihna political session-ah Pu Tawnluia, MNF Working President, former Dy. CM, chuan thusawiin, "Mizo nula pahnih, Lalremsiami Hmarzote leh Lalthantluangi ten Asian Games-a Gold medal an la hi MNF chuan zahna chibai kan buk a, kan chawimawi a, thinlung takin kan lawmpui a, kan chhuang takzet a. An kal zelna turah duhsakna sangber kan hlan a ni," a ti.

MNF sorkar laiin sport lama mi hmingtha leh chhuanawmte chawimawina leh lawmpuina pek tura tih hi kan lo pass tawh a. Lalremsiami Hmarzote pawh hi 15 lacs hlan a lo ni tawh a, Kolasib ah inhmun pek a lo ni tawh a ni. Tuna sorkarin kan nula chhuanawmte chawimawina a pe tur hi kan lawm hle a ni, a ti.

Pu Tawna, Ex. Dy. CM chuan, ZPM sorkar hian nasa takin mipui min bum a. Dikna leh rinawmna a fam mek a ni. Mipui thinlungah an hniam tial tial a. CM hian Hitler-a ang maia thuneihna pumhmawmin, portfolio a ngah lutuk a, Finance hi a chang thiam lova, a hnehlo hle tih a chiang a ni. SASCI sum tamtak a lapse a, tun financial year chhung hian state dangten SASCI sum tamtak an dawn tawh laiin, ZPM sorkar hian chengkhat pawh a la hmu ve lova. Hemi chungchang hi mipui hmaah sawifiah ngei turin Chief Minister hi kan phut a ni, a ti.

MNF Working President Pu Tawnluia chuan, ZPM sorkar hian sorkar hmasaten tihdikloh tamtak an nei angin an sawi fova. Mahse, case nei sawitur kan awm silova. Chhui kan ngam a ni tih pawh kan sawi tawh. MNF chu thalaite din a ni a, thalaite hmakhua ngaiin policy tha tak a hrualmum mek a ni. Thalaite tan zau takin kawng kan hawng a. Dikna leh rinawmna tungdingin, corruption free gov't kan tiam a ni, a ti.

Pu Zoramthanga chungchang sawiin, Pu Tawna chuan, "Mizorama party hlun, azawna kum 36 zet hruaitu, term 3 zet CM lo ni tawh Pu Zoramthanga hian India mai nilo, khawvel thalaite rilru a chawk tho a. Faktlak leh entawntlak anihzia miten an hrethar zel a ni, " a ti.

Sinlung Hills Council chungchang report Pu Lalpianfela Chawngthu, Vice Chairman MNF Legal Board hnen atangin ngaihthlak a ni a. "ZPM ten Sinlung Hills Council namthluk tumna chiah hmalakna an la nei a. Hmar mipuite tana engmah tihve neilo ZPM te chetdan hi a zahpuiawm hle a ni. SHC sorkar hi MNF siam anih angin, kan ta a ni," a ti.

Dr. Renee Lalrinzuali, PAC, MNF Gen. Hqrs. chuan inkhawm hi kaihruaiin, Pu Lalbiakkima Zote, Secretary, MNF Gen. Hqrs. chuan hunserh a hmang.

(PETER CHHANGTE)

Secretary

Media & Publicity Department/ Mizo National Front

Memo No. 550/2026/ Dt. 05.10..2026