Vawin September ni 18, 2026 (Zirtawpni) hian MNF Senior Vice President Dr. R. Lalthangliana MLA chu Aizawl South I huam chhunga Headquarters, Block leh Unit hruaitute nen inkawmhona Republic veng YMA Hall No.2-ah an nei.

He hunah hian Dr. R Lalthangliana chuan beihrual lai a nih avangin ruahmanna siam zung zung harsa a tih thu sawiin Aizawl Khawpuiah MLA bial 11 leh Block 13 kan nei a, Block 4 changin Block zawng zawngte September thla chhunga tlawhchhuah vek a tum thu a sawi.

Dr. Thangtea chuan Aizawl khawpui hi a pawimawh a, kan Jerusalem a ni. Kohhran, NGO leh Mizoram thil pawimawh lian tham awm khawmna a ni a, thingtlang hmun hrang hrang atanga an rawn thlir ber pawh Aizawl hi a ni. Chuvangin kan chetzia ah Mizo nun ze mawi, aia upa zahthiamna leh kristian kan nihna kan vawng tlat tur a ni, a ti.

Dr. Thangtea chuan, "Hotu ni lovin hruaitu, Unit emaw, Block emaw headquarters-ah pawh kan ni tur a ni. Chungvangin Block leh Unit thlan thar zawng zawngte hotu ni lovin hruaitu in ni tur a ni. Hruaitute kan inhriat chiana kan inkawm nel a, kan in lpawh tlan a ngai hle a ni," a ti.

MNF Senior Vice President chuan, "MNF hi pawl danglam tak ani a, political party satliah ringawt a ni lo. Mizo Nationalism atanga din a ni, Mizo Nationalism nun pui tura din kan ni, kan ṭobul leh kan inghahna kan hriat chian a ngai. Sorkar loh velah kan nihna a dal thiang lo. MNF hi tute emaw hausak phahna tur a pawl din a ni lo a, kan tu leh fate, Mizo zawng zawng, kan hnam lo la awm zel tur atana din leh lo piang a ni a, pawl dang nen kan in ang lo hle a ni. MNF hian a party tan ringawt a thawk lo a, Mizoram tan a thawk nasa tawh hle a ni. Vawin hian sorkar hmasa a kan tih dik loh leh kan lo tih sual tam tak, in rilru kan lo tih natna zawng zawngah ngaihdam ka dil nawn leh a, a hma aia thain kan kal tawh ang," a ti bawk.

He hunah hian Pu R. Tlanghmingthanga, Ex-Minister, NCC GHQ pawhin thu a sawi.

(ZIRSANGZELA)

Joint Secretary

Media & Publicity Deptt / Mizo National Front

Memo No.533/2026/ Dt.18.09.2026