Mipuia chhiah an lakte hi tihniam rawh se: Lalruatkima

March ni 27 hian Serlui North Block MNF Block Conference, Vairengte Multipurpose Hall-ah neih a ni a. He hunah hian Pu Lalruatkima ex Minister, Treasurer chu khuallian a ni a, Pu Lalrinsanga Ralte bialtu MLA chu khualzahawm a ni. Pu Lalruatkima chuan party hrang hrang aṭangin MNF zawm thar voter 222 MNF-ah a lawmlut a ni.

MNF Treasurer chuan thusawiin, ZPM sorkarin mipuiah chhiah an tipung nasa tih a sawi a. "ZPM sorkar hian mipui min sawrfu nasa hle a. Buhfai man a letin an ti to a, mipui kan phun mur mur a. Kan sorkar hunah kan ennawn dawn a, kan tihniam leh dawn. Electric bill kan ti pung lo, an ti. Mahse, MNF sorkar lai nen khaikhinin a pung nasa tih hretute chu mipui kan ni. Tui bill pawh a pung tih kan chiang a ni," a ti a. "Kawng siam nan Petrol leh diesel-ah road cess an la a, hei hian kan bungraw phurh man te, motor chuan mante a ti sang nasa em em a ni. Assembly House-ah 'kawngṭha kan nei tawh' an ti a ni lom ni? Kawng siamna chhiah mipuia an khawn rengte hi titawp rawh se. Revenue stamp man nasa taka an ti to te hi ti tawp rawh se," a ti bawk.

MNF Treasurer chuan, "ZPM sorkar hnuaiah mipuiah sum lengvak a tlem em em a. Pawisa van thu sumdawng leh mipui mimirin an sawi nasa hle. Hei hi ZPM sorkar-in mipuiah chhiah an lak an tih san nasat vang leh a nghawng a ni.

Chhiah hrang hrang an lak, an tihpun hi tihniam turin kan ngenna ni," a ti bawk. "Kan puk ve lovang, titute hian an puk tam ta hle a. Kan budget aiin kan leiba a tam ta hial a ni, a rapthlak zawk a ni," a ti.

Pu Ruatkima chuan, "Ramri venghim turin Mizoram Police-te an hlu tih kan hria a. Chutiang bawkin Serlui bial mipuite ramri venga in huaisen ṭhinna hi a ropui kan ti. Ram tan hian in hlu a, inhuaisenna te a hlu em em a ni. Bialtu MLA huai leh chak, ram hmangaihtu Pu Lalrinsanga Ralte in nei hi in vannei hle a ni. Hmasawnna tam tak inbialah a hnuk lut hi ka lawmpui che u a ni," a ti bawk.

MNF Treasurer chuan, "Kum 2028 inthlanah MNF kan sorkar leh dawn tih a chiang. Congress hi Delhi drip-a nung an nia Delhi lamah drip khai tur a awm lo. Delhi lamah engmah an ni tawh lo. ZPM lah nise kan enchhin hi mipui kan inchhiar a ni," a ti bawk.

Khualzahawm Pu Lalrinsanga Ralte, Bialtu MLA pawhin thusawiin, Serlui bial mipui te'n bial tan theihtawp a chhuahna an hmuhpui ṭhin avanga lawmthu sawiin, bial enkawl zui tura an ring ngam leh thlan nawn leh a nih leh avangin lawmthu a sawi a. Bial mipuite thlawpna zarah Serlui bial hmasawn zelna turin theihtawpin hna ka thawk zel dawn a ni," a ti.

Pu Lalrinsanga Ralte chuan kan sorkar hrawn mek ZPM Sorkar ah mipuite an beidawnga, enchhin tlakah an ngai tawh lova, Belhtlak awm leh belh tur dik MNF party an bel zel a, tun boruak zel thlirin kum 2028 MLA inthlan lo awm turah hian Sorkar-na siam tur chu MNF bak an awmlo a ti a, MNF hi chak takin a thochhuak leh ngei dawn tih a sawi bawk.

He hun hi Pu H Lalthlengliana President, Serlui North Block-in a kaihruai a ni.

(LALLENMAWIA JONGTE)

Secretary

Media & Publicity Department: Mizo National Front

Memo No. 456/2026/Dt.28.03.2026