Vawiin ni 25.05.2026 (Thawhtanni) chawhma dar 11:00 khan Mizo Hnam Runah Chhung inkhawm neih a ni a. Hun hnihna, Political Session-ah Pu Ramthanmawia, MLA & PAC Member, MNF GHQ chuan thuchah pawimawh tak a sawi.

Pu Ramthanmawia chuan "Sum luh dân leh state dinhmun chungchangah, International boruak (Israel-Iran-USA) vanga petrol leh diesel man sâng zêl avângin, Mizoram sorkar chu mipuite chunga harsatna thlentu Oil mana 'Cess' an lak mek chu tihtawp a hun tawh hle a ni. North East-ah Mizoram chu tuialhthei man sâng ber a nih tawh avângin, mipui harsatna tawh mek hi thlîrin sorkar hi a inngaihtuah nawn a ṭûl a, Cess an lak hi ennawn a, titawp turin kan phut bawk a ni," a ti.

Pu Ramthanmawia chuan MNF Party chu hnam martarte thisen leh Pathian kaihhruaina hnuaia hnam chhanchhuak tura din a nihzia uar takin a sawi a. "Kan party in Hnam rilru pu a kan kal mekna hi midangten min chhuhsak tumin, min tihkehchhiat vek tum mahse a theih dâwn loh a ni. Pathianin a bul min ṭanpui a, a hruaina ngeia din a nih angin hmalam a pan zel dawn a ni" a ti bawk.

Dawt leh thudik chungchang sawiin, Pu Ramthanmawia chuan, Dawt hi a tlo ngai lo a, dawt hian khawvelah hmun a chang rei ngai lo a ni. ZPM ten opposition an nih laia dawt hmanga mipui an hruaisual dante sawiin, dawt hian thlen theih chin a neih laiin thudik erawh a nung reng dâwn a, Mipuiin thudik hrefiah tura beng kan dawh nasat zawk hun ala herchhuak zel dawn a, kan thalaiten thudik chauh an duh hun hi tun aiin ala nasa dawn chauh a, chumi hunah chuan dikna a kal zel tur MNF-ah an lo kir leh ngei dâwn a ni, a ti bawk .

Chhung Inkhawmah hian thupha chawina, inhlan tharna leh Pathian hruai zelna dilin tawngtairualna hun urhsun takin hman a ni a, Pu VL Krosshnehzova, Gen. Secy., MNF GHQ chuan kaihruaiin, Pu Michael Lalramsanga, Secy., MNF GHQ-in hunserh a hmang bawk a ni.

(LALTHAKIMA)

Jt. Secretary

Media & Publicity Department: Mizo National Front

Memo No. 485/2026/ Dt. 25.05.2026