Vawiin ni 29, September 2026 hian Tuirialah Aizawl East I Block MNF tlawhchhuah Programme Pu Lalruatkima, Treasurer MNF hova hman a ni a, thusawiin, MNF te hian kan din chhan kan hriat chuan a pawimawh a, Zofate rorelna pakhat hnuaia kan awmna tura theihtawp chhuah mek kan nihna hi kan theihnghilh a thianglo. Unau inhmangaih tur, dam leh tlang khatah, thih leh ruam khatah tih thuvawn neitu kalzel kan ni, tih hi kan theihnghilh a remlo, a ti.

MNF chuan luipui kama chengte hamthatna a theihnghilh lova, forest dan kal mekin an zalenna a khuahkhirh mek phelh a, zalen taka nitin nun an hmanna turin theihtawp a chhuah dawn a ni. Mizo hnam neitu kan nih tlat avangin kan nitin nunah Mizo hnam damna leh himna hi kan rilru chhungril luah bertu tur a ni. Veng tinah MNF chu a rinawm, a rinngam, hnam rilru an pu tlat min tihna tura kan nun kan siamthat deuh deuh a tul. 1966 a Mizo Nationalism, huaisenna leh inpekna rilru kha vawiinah kan kaihharh leh a tul a ni. Hnam rilru pu reng si, kaihharh an nih loh avanga MNF lam la hawilote hawi tir hi kan mawhphurhna a ni, a ti bawk.

AMC hmasa hna kalmek chu ZPM in thuneihna an chan ve leh an tikhaihlak nghal a, Sawi atanga Ward fund thendarh tur chu MNF leh Congress Councillor te chu an sem ve duh lo bawk. Kalphungthar, mipui sawrkar min tiamtute khawsak phung hi kan dem takzet a. An kalphung zahthlak tak hi siamtha se kan duh takzet a ni. Hetiang kalphung thalo tak hi MNF in Pathian leh Mipui zara sawrkarna kan chan ve leh mi zawng zawng huapin, thleibik nei kalphung hi bansanin hma kan la dawn a ni, Pu Ruatkima chuan a ti bawk.

He hun hi Pu Kalvari Tlangmawia, President, Aizawl East I MNYF-in kaihhruaiin, Upa Thangluaia, Tuirial Airfield in hunserh a hmang a, MNF General Headquarters atangin Er. Lalrinawma, Gen. Secy. & Ex-Minister, Prof. F. Lalnunmawia, Gen. Secy & Ex-MLA, Pu LT Kima Fanai, General Secy., Pu VL Krosshnehzova, Gen. Secy., leh Pu Vanlalneia, Secy. & Ex-Corporator, AMC te kalin, anni hnen atang hian fuihna thu tha tak tak ngaihthlak a ni bawk. Aizawl East I Block atangin Unit, Group leh Block hruaitute, MNF VC/LC memberte bakah member thahnem tak an kalin, thu tha tak tak an sawi a ni.

(B. LALHMANGAIHZUALA)

Secretary

MNF General Headquarters

No. 544/2026/ Dt. 29. 9. 2026