Mizoram sorkar, UD&PA department-in SASCI loan aṭanga composite work drain siamna tur, Aizawl Municipal Corporation hnena vaibelchhe 5 lai a semah, ZPM sorkar-in opposition bial pahnih a telh ve duh lo chu MNF chuan kan dem tak zet a ni.

Composite work drain siamna tur sum tam tham tak hi ZPM tlinna AMC ward hrang hrangah semdarh a ni a. Hetih lai hian Ward No. IX Pi B Lalawmpuii MNF bial leh Ward No. XIX Dr Lalmalsawma Nghaka bialah te pek ve an ni lo a ni.

AMC hmasaa Aizawl khawpui hmasawnna tur hnathawh kal mek leh ruahman felsa vek tawh pawh Stay order chhuahin, an tikhaihlak a, Court ah zualko a niin, hnathawh kalmekin a tawrh phah nasa hle a ni.

Hetianga AMC rorelnaa hleihneihna nasa tak a thleng hi MNF chuan pawi kan ti hle a. AMC-ah hian MNF-in sorkarna a lo chelh ve fo tawh a, hetianga Party dang thlauhthlakna hi a la thleng ngai lo a. Hetiang thil tenawm tak hi AMC-ah la thleng ngailo niin, thil zahthlak tak a ni.

ZPM hi Party dang hleih bik nei lo tura thutiam la awm chhun Party an ni a. Hetianga hleihnei awmchhun party an ni ta hlauh zawk a mak hle a. Hei hian ZPM zia, lemchang mai an nih zia a pholang chiang hle a ni. Party induhsakna ngaithei lova, rualkhai taka mipui huapa hmalak tum, Kalphung thar Mipui Sawrkar thlentu tur tia inzuar, mipuiin beiseina neia an thlantlin Sawrkar hi an insawi loh ang zela khawsa an ni a. Zoram mipuiin an khawsa zia hi an ning tawh takzet a ni.

(PETER CHHANGTE)

Secretary

Media & Publicity Department/ Mizo National Front

Memo No. 542/2026