Vawiin July ni 17, 2026 (Zirtawpni) hian Mizo Hnam Runah chhung inkhawm neih a ni a. Hun hnihna a thusawitu Pu J.Malsawmzuala Vanchhawng General Secretary GHQ chuan MNF chu Pathian leh kan ram tan titu, ram chhung leh pawn thleng pawha kan hnam leh sakhaw tana him lo do ngam leh do rengtu a nih thu a sawi a.

Pu J.Sawma chuan Foreign Contribution Regulation (Amendment) Bill, 2026, parliament-a putluh tum mek chu kohhran hote pawhin an duh lo a, MNF pawhin a do tlat a ni a ti a. 7th July, 2026-a SIR sawiho tura All Party Meeting neih tumah pawh khan MNF aiawha telte chuan FCRA hi sawiho tur leh pass anih lohna tura a huhova hmalak rawtna Agenda an pulut a, meeting kotu rorellai ZPM aiawhte chuan an party PAC lamin an zirchian mek thu an sawi avangin All Party Meeting hian thutlukna emaw, thu chhuah intawm emaw a siam ta rih lo a, MNF dinna chu a ngai reng a ni a ti. Pu J. Sawma Vanchhawng hian tunhnaia West Bengal-a Kristiante nekchepna leh Biak In tih chhiatna thleng pawh MNF chuan a dem thu leh pawi a tih thu a sawi bawk.

Pu J. Sawma hian MNF-in chona a hmachhawn mek tih sawiin, Mizo mipui te, kohhran ho te, tlawmngai pawlte leh thalai rual, zirlai leh hna zawng mekte hian an beisei ang sorkar kan dinpui thei dawn em tih min thlir mek a ni a ti a. Sorkarna chan leh kan chak chhan hi mahni hamthatna tur leh hlawkna tur ringawt nge Zoram thatna tur tih kan ngaihtuah fo a ngai a. MNF thuthlung 'Pathian leh kan ram tan' tih hian dik tak leh fel taka rorelna kalpui turin min phut a, sorkar tha, rintlak leh langtlang, mitin huap zo, thalaite hmasawnna tura remchanna tin reng chhawpchhuaktu tur din ngei tura kan inbuatsaih a tul a ni a ti.

Pu J Sawma hian MizoTaxi Apps chungchang sawiin, bihchian chuan thil mak tak leh enchian ngai a awm thu a sawi a. "Mipui hamthatna leh Driver-te hamthatna kal kanin sorkarin mipuite a barh lui mek a, a tuartu chu mipui kan ni leh si a, ruahmanna tha awm lo a, 'Ti phawt ila, a diklo laite kan siamtha ang' tih hi sorkar tha zia a ni ngai lo a, mipuite himna leh mi tam tak eizawnna khawih thilahte chuan ngaihtuahna zau tak sen hmasak tur a ni a, arkhawthimdai chi a ni lo a ni a ti a. Hmun danga an tih ve loh Taxi pute hnen atanga Registration Fee Rs.500/- lak anih dan pawh enfiah ngai a nih thu sawiin, chhiah reng reng hi India Constitution Article 265 in a phut angin Dan in thuneihna a pek hmang chauha pak theih a ni a ti a. Mipui hnenah sorkar hian sawi duh leh duh loh chin an neih thu Pu J.Sawma Vanchhawng hian a sawi a, taxi hmangtu mipuite hnen atanga platform fee lakkhawm chu App enkawlna atana hman tur nia thuneituten an sawi laiin Zonet discussion atangin hlep awm apiangte chu App enkawltu Digiride Technologies Private Ltd. leh Mizoram sorkarin 50-50 a insem tur a ni tih sawilan a ni leh ta a ni a ti.

Pu J Sawma chuan eirukna dona atana hmanraw tha ber chu langtlanga thil kalpui a ni a, langtlang soarkar a awm theihna tura Parliament dan siam RTI sorkarin a kalpui mek dan a mak hle a, politician tawngkama chhanna inpek pawh a awm thu a sawi a. Dan ang chuan SPIO-in a kuta information awm chu a pe mai tur a ni a. Tunah chuan dawhkan hrang hrang a paltlang a, Minister approved phawt te a awm tih a lang reng. "I thil zawh hi Pu Zoramthanga sorkar pawh khan..." tihte a awm a, Minister-in a chhang tih a chiang hle. Zawhna chhanna mak tak tak pawh a tam a, nakinah kan la sawi zel ang. Eirukna do tura parliament dan siam RTI hi ZPM sorkar hian nasa takin a pawngsual a, a pawi takzet a ni a ti.

Pu J.Sawma chuan State dangte revenue a pun chhoh lai mekin, ZPM sorkar hnu atangin Mizoramah GST collection kum tin a tla hniam zel tih a sawi a. Kum 2023-24 ah GST cheng vbc 970 hmuh anih laiin 2024-25 ah cheng vbc 937 ah a tlahniam a, kum 2025-26 ah cheng vbc 931-ah a tla hniam leh a. GST pe lo thei turin hnathawh tur amount tlem tê tein a chan sawm a, sum lamah harsatna kan tawh phah bawk a. A chhan chu, diklo taka Contractor in ruat vang te, work supervisor inruat zawnga sorkarin hma a lak vangte a ni a, ZPM sorkar hi restricted tender a hna in pe nasa ber a ni, a ti bawk.

Chhung inkhawm hi Pu Rochhunga Ralte Ex-MLA, Adviser GHQ chuan kaihruaiin, Pu Vanthawma Secretary GHQ chuan hunserh a hmang.

(ZIRSANGZELA)

Joint Secretary

Media & Publicity Deppt

Memo No.505/2026/ Dt.17.07.2026