Central Sawrkarin Foreign Contribution(Regulation) Ammendment Bill 2026 puluta India rama sakhua leh tlawmngaipawl thenkhat ram dang atanga tanpuina dawn thin dan khauh zawka kalpui a tumna Council of Churches in Mizoram(CCM) in dodal a, ni 11, August 2026 a kawngzawh a buatsaih tur chu MNF chuan a thlawp tlat a, he huna tel theuh tur leh kal vek turin MNF Party mipuite kan inhriattirin kan inngen a ni. He hun buatsaih tur hi tluang taka hman a nih a, Mizoram mipuite duhdan Central Sawrkar hriata puanzarna leh lantirna hlawhtling tak a nih ngei kan duhin, kan beisei takzet a ni.

FCRA chungchangah hian Mizoramah MNF chuan Political Party tinte pawh thukhat vua a, a huhova duhlohna lantir a, dodal tlan a duh avangin All Party Meeting neih tawhah pawh rawtna alo thlen tawh a. A thu thlen tawh ang hian MNF chuan he Bill kal mek hi tlang lo se, dodal zel nise tih hi a thutlukna ala ni reng a. Ram dang atanga sakhaw tenau zawk leh tlawmngaipawl India rama awmte chhawmdawlna leh puihna awm thin tihkhaihlakna leh heng puihna lokal thin atanga thahnemngai taka rawngbawlna tih bawrhban tumna hi MNF chuan a pawm theilo a, a dodal tlat a ni.

Mizorama Sawrkarna chelhmektute pawh he Bill hi do a, central sawrkar hriat a dodal a, parliament thlenga kan MP te hmanga Mizoram mipuite duhdan lantir ngam turin kan phut bawk a ni.

India rama Sakhaw tihbik nei, a lian zawkin a te zawkte nekchep a, tihthuanawp a tumna hmalakna reng reng chu Sakhaw zalenna ram kan nih anga dodal zel hi MNF chuan a dinna nghet tlat a nih angin, hemi kawnga CCM hmalakna hi a thlawpin, hlawhtlinna hmu ngei turin Mizo Mipuite lungrual taka thawkchhuak turin kan sawm takmeuh meuh bawk a ni.

(VL KROSSHNEHZOVA)

General Secretary

Media & Publicity Department/ MNF General Headquarters

No. 514/2026/ Dr. 07.8.2026