Vawiin April ni 15, 2026 (Nilaini) hian MNF Senior Vice President Dr R. Lalthangliana MLA chuan AMC inthlan kan hma chhawn mekah MNF official candidate-te tan campaign,-in Ramthar veng leh Ramhlun North-ah hun a hmang. Nimin khan Tuithiang, Salem, ITI tlawhin, ward no-IX campaign office Chhinga vengah a hawng a, nizan khan Republic vengthlangah hun a hmang bawk.

MNF Senior Vice President chuan MNF-in Aizawl khawpui, District Capital hrang hrang leh thingtlang khaw chengker ber thlenga an hnathawh hrang hrangte a tarlang a. Aizawl khawpui hmasawnna zawng zawng tih theih deuh thaw MNF kutchhuak anih thu a sawi bawk.

Dr. Thangtea chuan tuna Aizawl khawpui chhung kawng pawimawh zual resurfacing hna thawh mek chu lawmawm a ti a. "Amaherawhchu, inthlan campaign laia Pu Lalduhoma leh a hoten an duh loh leh sawisel nasat em em restricted tender hmanga ZPM sorkarin a thawhtir a ni a. Pu Lalduhoma leh a pawlte chu inthlan campaign laia an sawi loh ang hlirin an awm a. Enchhin fuh lohzia nasa takin mipuiin kan hre tawh a, AMC-ah hi chuan enchhin tawh lo ang u, Aizawl khawpui hmasawnna turin MNF candidate-te thlangtling turin ka ngen che u a ni," a ti.

Dr. Thangtea chuan Aizawl khawpui chhung kawng hi eng sorkarah pawh a khat tawka thuamthat reng thin anih thu sawiin, "Tuna ZPM sorkarin kawng a thuamthat mek hi chu, ZPM hian central atanga pawisa a hmuh emaw, loan emaw, budget emaw, petrol leh diesel cess an khawn pawisa atanga siam a ni lo a. MNF sorkar hmasain, A-T-L road, world bank project contractor a ban security chhuhsak, pung awma an khawl, cheng vbc 90.69 lo tlingkhawm atanga siam a ni a, ZPM sum thawhchhuah atanga siam a ni lo," a ti.

(R.LALHMANGAIHA)

Secretary

Media & Publicity Deptt: Mizo National Front

Memo No.470/2026/ Dt.15.04.2026