Vawiin hian Mizo Hnam Runah chhung inkhawm neih a ni a, Pu Robert Romawia Royte MLA, Adviser chuan thu a sawi.

Pu RRRa chuan, "ZPM Chief Minister Pu Lalduhoma hian ama bial Thenzawla Aizawl State capital sawn rawtna Central sorkarah ziakin a submit ngei a, sum pawh dilin an hmu bawk. Mizoram Capital Thenzawla sawn hi Aizawl mipuite hian an duhin ka ring lo. Chu mai a ni lo, ZPM MLA pakhat phei Assembly session-ah

Aizawlah eng thil thar mah awm tawh lo se a duh thu hial Assembly session-ah sawi a nih kha. Hetianga Aizawl dah pawnlang leh ngai pawimawh lo hi AMC-ah sorkar tir chi an ni lo," a ti.

MNF MLA chuan, "AMC-ah kum 10 chuang MNF a sorkar tawh a, AMC ṭhat leh chhiatah pawh mawh a phur a ni," a ti a. "AMC hi India rama urban local body ṭha ber pawl a ni a, North East bikah phei chuan an entawn ber a ni. Kan AMC te hi an chhuanawm em em a ni. Dawt nena phuah pawlha ram leh hnam pawi tam tak khawihtute hi AMC-ah hian sorkar tir ngam chi an ni lo," a ti bawk.

Pu RRRa chuan Budget session thlirletna neiin, "ZPM awm hma chuan session-ah House Leader, Minister leh MLA ten dawt sawi an hlau hle a, dawt sawi hriat tur a vang. Tun sorkarah chuan dawt sawi a tam em em mai a, an din lai ngeia tihdikna lo siam ngaite pawh a awm hial a ni. CM leh a naute hian Assembly Session pawh zah zo lovin dawt an sawi nasa hle a. Ruling MLA ṭhekhat pawhin an CM dawt sawi nasa lutuk chu hreawm an tih thu an sawi hial a ni," a ti bawk.

"ZPM hian opposition an nih laiin sum puk chungchangah, 'mipui min dahkham', 'kan puk ve dawn lo' titein an sawi ṭhin a. An han sorkara a puk theih zawng zawng an puk a, a tam thei ang ber puk hi an policy a ni. Tun Session-ah ngei pawh khan thil thleng ngai lo leh thil awm theiah pawh ngaih loh a thleng a. Chu chu kan budget aiin kan leiba a tam zawk kha a ni. MNF sorkara thleng nise ZPM ho hi an nasa ngawt ang," Pu Robert-a chuan a ti a. "Kan CM-in 'kan tihṭhat vangin SASCI ah lawmman kan dawng' a tihte kha dawt pachal a ni a, lawmman dawn nilovin Central duhdana Reform siam vanga sum puk belh phalna mai a ni," a ti bawk.

MNYF President nibawk chuan, "SASCI chungchangah India ramah a ti ṭha ber pali-na kan nih thu Chief Minister hian a sawi a. Hei pawh hi dawt pachal bawk a ni. SASCI-ah hian khawi level-ah mah ranking pek a awm lo. Pakhatna pawh an awm lo a, pahnihna pawh an awm lo a, sawm pasarihna pawh an awm chuang lo. Kan Chief Minister hian hmun ṭhakhata a dawt sawi hi amah bawk hian a awih leh a, a thutak sawi zui hmiah hmiah zel niin a lang," a ti a. "Dawt an sawi chak em avang hian MNF hian thudik kan sawi chak ve a ngai a ni," a ti bawk.

Chhung inkhawm hi Pu K Liantlinga Ex MNA, Adviser-in a kaihruai a, Pu H Sangzawna Adviser-in hunserh a hmang a; Pu TC Kaphmingthanga, AMC campaign Committee Secretary-in report a pe bawk a ni.

(LALLENMAWIA JONGTE)

Secretary

Media & Publicity Department: Mizo National Front

Memo No. 449/2026/ Dt. 23.03.2026