Mizo National Front
General Headquarters
Mizoram : Aizawl

Press Release

‘ZU KHAP HNUAH ZU AVANGA THI POLICE AN TLEM’ – Pu Lalchamliana.

Vawiin November ni 28, 2022 Thawhtanni hian Mizo Hnam Runah chhung inkhawm neih a ni a. Hun hnihnaah Pu Lalchamliana, MNF Adviser, Home Minister ni bawk chuan thu a sawi.

Pu Lalchamliana chuan, MNF sorkarin kohhran leh mipui duhdana zu a khap hnuah zu vanga thi Police an tlem tih a sawi. Damdawi ruihhlo do tura CYMA in Central Anti Drugs Squad an din hi ṭha ka ti a, kan thlawp theuh a pawimawh a ni a ti. Zoram mipuiten kan awmna hmun ṭheuhah CADS hmalakna hi ṭawiawm ang u, tiin ngenna siam bawk.

MNF Adviser chuan tun dinhmunah Mizoramah party pangngai pathum, inthlannaa in la lian thei an awm tih sawiin – MNF, ZPM, Congress an ni. BJP thlengin an hotute hi MNF party chhul chhuak vek an ni. Engatinge MNF an chhuahsana pawl danga an awm? Policy leh thildang a awm lo. Leadership an chan loh vanga pawl danga awm, pawl din chawp an ni. ZPM hi party a hotu nihna chan loh vanga chhuak an ni. MNF aia inti nationalist a, leader chan loh vanga pawl din an ni. An pawl base hi ZNP vek an ni. Tunhnaiah Pu Ṭhena naute ho PC lam hmin tumin tawngkam thlum nen a bei leh mek tih sawin, Sabengtung sakeibaknei vuna inthuam, Sihalin ‘a hram hi lo hre fo tawh lo ila chuan kei pawhin ka hlau ang mawle!’ a tih kha a ni.

An kalphung thar hi enge hria in awm em? An kalphung thar ber nia ka hriat chu VUC hi a ni. Anni pawh hian a ṭul an ti lo niang! Hlawhpung lak loh tur, an tia, a duh hmasa sa an ni a. Keini chuan a sema sem kan ti dawn lo an ti a.. Mahse, ZPM MLA in tuizem a sem, puanthui khawl a sem an ti leh tho si. India rama kan awm chhung hian sorkar laipuiin a duanbak piah lam kalphung thar hi Independent state kan nih loh chuan tih theih a nih ka ring lo, a ti.

Congress pawh central thlenga hruaitu mumal nei thei lo an ni a, an khawngaihthlak letling a ni. ‘Ṭhat loh theih lohna bawm hi hmu in awm tawh em? Lut an la awm lo a ni awm e’ a ti bawk.

Pu Lalchamliana chuan, Assam sorkar nen ramri chungchanga Gauhati-a Assam nen a inbiakna chungchang a sawi a, Assam nena kan ramri chungchangah hian Boundary Committee in a duhdan ang zelin kan kal dawn a ni a ti. Home Minister chuan zawhna lian tak awm mek chu, ‘Mizoramin kan hauh mek 1875 Innerline forest area hi kan duh ang ngeiin Assam hian min pe ta sela. Assembly Constituency panga (5) rinluh a ngai dawn a, kan duh tak tak ang em?’ tih hi zawhna lian tak, opinion poll lak hialna awm a nih thu sawiin, mi thenkhatin ‘kan umchhuak vek anga ni mai lawm’ an ti ngawt a. Tunlai khawvelah chutiangin a chet theih tawh loh tih hi kan hriat tlan atha a ni, a ti.

Mizoram kuhva thar chhuah hralhna kawnga harsatna pawh inbiaknaah sawilan a nih thu Pu Chama chuan sawilangin, ‘kuhva hring hi Assam in a dang ringawt hi a dik lova tihtawp dan zawn nise tih sawiho a ni a. Home Department-a DIG level-ah sawihoa chinfel dan zawn ni rawh se, tiin thu dah a ni a. Meeting chawlh laiin Assam Chief Minister-in amah ngei a rawn bia tih a sawi a. Assam Chief Minister chuan kuhva hring Sumdawnna tawp thut chu ama tihtawp a nih loh thu rawn sawiin, Union Ministry thua tihtawp a ni zawk tih leh, atuk maiah Union Minister Amit Shah a dawr dawn a, ‘chutah chuan ka lo sawi anga, in Chief Minister pawhin lo dawrzui ve rawh se’ a ti bawk a. Tichuan DIG level-ah inbiaka chinfel nise tih chu paih a ni leh ta tih a sawi. Home Minister chuan ‘Ramri buaina chu chawlhkar khat maia chinfel theih pawh a ni lova. Ramri chungchangah chuan dawhtheih taka kan chet a, dawhtheih taka kan pen a ngai’ a ti.

Myanmar lam atanga Kuhva ro lo lut chungchang tarlangin, ‘Kuhva hi amah mai hian dan phal loh (illegal item) a ni lo va. Export Import item ah pawh a tel veka. Mahse, dan anga insumdawn tawnna kalpuina hnuaiah chauh a ni tur a ni a. Border trade mumal kan neih hnuah chuan Legal item a ni ang. Border trade mumal kan la neih loh avangin legal item anga lakluh theih a la ni lova. Tuna alo luh dan hi chu Dan lova lut a ni. Mizoram sorkar hian theihtawp a chhuah a, Kawngpui dunga check-na tur hmun hnihah siam a ni tawh. Heti chung hian 100% kan man kan thei hauh lo. Myanmar nena kan inri na aṭanga KM 15 vel hi Assam Rifle chan a ni a, Bangladesh border hnaih lam hi BSF mawhphurhna a ni thung. Mahse, heng duty hi an lo paltlang leh zel tho mai a. Keimahni mi leh sa, kuhva chingtute tan harsatna athleng a. Mizoram sorkar tih theih bak a nih tlat avangin vawiin thlengin duh angin kan la titawp thei lo a ni a ti.

Mizo Hnam Run chhung Inkhawm hi Pu R. Lalhnuna, PAC Member, MNF Gen.Hqrs chuan kaihruaiin, Pu Sanghmingthanga Pautu, Adviser MNF Gen Hqrs -in hunserh a hmang a, Pu Self Danial-a, Secretary, MNF Gen. Hqrs hnen atangin zin report ngaihthlak a ni bawk.

Sd/-
(LALLIANZUALA FANAI )
Jt. Secretary
Media & Publicity Department
Mizo National Front
Memo No.MNF/Media/03/2022/564
Dt. 28.11.2022