Mizo National Front
General Headquarters
Mizoram : Aizawl

Press Release

ZOFATE TAWRHNAAH MP PAHNIHTE HMALAKNA KAN CHHUANG – MNF

Mizo Nationanal Front (MNF) chuan tunhnaia Manipur-a buaina thleng chu ngun takin a thlithlai reng a. He buaina avanga Zofate tawrhna thleng mekah, kan state sorkar hmalakna chak tak bakah, Pu C. Lalrosanga MP (LS) leh Pu K. Vanlalvena MP (RS) te hmalakna chu chhuanawm a ti hle a. A tul anga theihtawp chhuaha Zofate himna tur leh Kristian sakhaw himna atana an beihna hi a ropuiin a chhinchhiah tlak kan ti hle.

Kan MP-te pahnih hian Central sorkar thuneitute hnenah rang taka zualkoin, theihtawp chhuahin hma an la a. Central Minister te hnenah tawngka leh lehkhain Zofate harsatna leh buaina chinfel anih theihna turin thu an thlen nghal a. North East MP te leh MP dangte be kualin, theihtawp chhuaha hma an la hian awmzia a neiin a hlawk em em a. Buaina avanga zirlai, hnathawk leh tangkhangte hruaichhuah an neih theihna atana kan MP te hmalakna hi a chhuanawm kan ti takzet bawk a ni.

Kan MP pahnih ten Mizoram chhung leh pawna Zofate thlavang hauha theihtawp chhuaha hma an lak mekna hi mipuiin kan thlawp tlat a, kan theihna zawna kan thawhpui zel hi MNF chuan tul a tiin, mipui a ngen bawk a ni.

Pu K. Vanlalvena’n Manipur buaina chinfel anih theihna tur leh, he buaina avanga pawisawi lote tawrhna leh thihna chungchang chhuichiang tura Kristian MP te telna, joint Parliament Team din Prime Minister hnena rawtna a thlen hi tihhlawhtlin anih ngei MNF chuan a beisei tlat a ni.

Sd/-

(PETER CHHANGTE )
Joint Secretary
Media & Publicity Dept
Mizo National Front
Memo No.MNF/Media/04/2023/693
Dt.10.05.2023