Mizo National Front
General Headquarters
Mizoram : Aizawl
Press Release
ZOFATE INPUMKHATNA KAWNGA MARTAR TE HNATHAWH A ROPUI HLE.
_ Tawnluia Dy. CM
Vawiin May ni 23, 2023 (Thawhlehni) hian Mizo Hnam runah Martar thlah inkhawm neih a ni a. He hun hi Pu Tawnluia, Dy. Chief Minister, MNF Sr. Vice President ni bawk chuan khuallian niin a hmanpui a, thusawiin, “Zofate inpumkhatna atan leh inzawm khawmna atana min phuar khawmtu pawimawh tak chu martar te an ni. Mizoram hi Zofa zawng zawngte tan inpuia pawm anih theih nan martar ten an thawhhlawk hle a ni. Martar te inpekna ropui zia leh hlutzia hi kan hre telh telh dawn a. An thihchhan kha kawhmawh bawl leh suahsual vang a nilo a. Ram leh hnam tana nunna hlutak hlan an ni. Chawimawi an phu em em a ni, “a ti.
Martar te thlanmual hi ram leh hnam tana nunna lo hlan tute, fel taka chhinchhiah leh ngaihhlut a tul tihna avanga din a ni a. Martar te thlanmual ah hian hnam tana nunna hlantu zawng zawng te dah vek kan duh a. Chutih rualin, martar chhungte duhthlannaah kan dah a, inphum duhte chu kan buaipui zel a ni. Hmun hlu leh pawimawh (historical monument) anih avangin Art & culture deptt enkawl atan sorkar in a dah a. Tih changtlun chhoh zel tum a ni, a ti.
MNF Sr. Vice President chuan, MNF hi party dang ang kan ni velo a, mahni pumpui tanghma hai a, nihna um thinte tana din a ni velo. Hnam tana thisen fartawp thlenga beitute awmna leh dinchhuah a ni. MNF hi tumahin an dahhniam theih miahloh nachhan chu, hnam martar te thisenin a bual a ni a. Martar te hi kan arsi lian an ni, a ti bawk.
Thusawitu dang, Pu Rochungnunga, Gen. Secy, MNF Gen. Hqrs chuan, martar te khan hlau leh tlanchhe chungin nunna an hlan lo. Hnam hmangaihna thunlung tak tak kan neih avangin hnam sipai te khan nunna hlan kan hlau lo. Tu pawl, party emaw kohhran emaw tana nunna hlan an nilo a, Zofa zawng zawng te tana nunna hlan an ni a. Martar te hnathawh chhunzawm turin mi zawng zawng ka sawm a ni, a ti.
Vawiina hnam pasaltha thlahliam tak te hi :-
1. L/Corporal Tlankima. MNA
2. Capt. Chhunhranga. MNV
3. Pachhunga. MNV.
4. Laihnuna. MNV
Anni hi hmun hrang hranga a duty laia kahhlum an ni a. An chhungte ngenna anga an ruhro te hi phawrh niin, martarte thlanmualah dah tur a ni.
Martar thlah inkhawm hi Pu Vanlalruata Ralte, Vice President, Ex MNA Association chuan kaihruaiin, Rev. K. Darsailova’n hunserh a hmang a. Martar te sunna hun hman niin, Pu C. Zama, President, Ex. MNA Association hnen atangin report ngaihthlak a ni bawk.
Sd/-
(PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/04/2023/713
Dt.23.05.2023