Mizo National Front
General Headquarters
Mizoram: Aizawl

Press Release

ZO HNAHTHLAKTE RORELNA PAKHAT HNUAIA DAH HI MNF THIL TUM A LA NI RENG . MNF-AH MI THAR 119 LAWMLUH AN NI – Lalthlengliana, MNF Vice President

Vawiin September ni 20, 2023 (Nilaini) hian Taitesena Hall, Venglai, Kolasib-ah ‘Martarte-Ni 2023’ hman a ni a. He hun hi MNF Vice President Pu Lalthlengliana chuan khuallian niin a hmanpui.

Khuallian Pu Lalthlengliana chuan martar-te zahna chibai bukin, martar-te ni hi party dangin an neih ve loh MNF chauhin an neih thu a sawi. Martar-te lo awm chhan sawiin kum 1966-ah Mizo Hnam thlipui a tleh a, kha tih lai khan Mizo zawng zawng tih theih deuh thawten MNF rilru an put thu a sawi. Kum 1961-ah MNF an din khan an pawl thil tumte a tarlang a. Thlahtute atanga Pathianin min pek a ram leilung fate humhim leh chawisan, Mizote sakhua humhim tlat, Zo hnahthlakte rorelna pakhat hnuaia dah tum chu vawiin thlenga MNF thil tum la danglam lo a nih thu a sawi bawk. “India nen kan indo khan Mizoramah India-in a sipai tha tha leh ralthuam tha ber ber nen min bei a, chu mai chu duh tawk lovin Jet Fighter nen Aizawl min bomb a. Kohhran aiawh leh NGO-ten inhnuk hniam tura Pu Denga an ngen angin inremna kan lo nei ta a ni. Kan Hnam sipaite kha anmahni tan bei an ni lo a, Mizoram leh hnam tan an bei zawk a ni,” a ti.

Mizo Nationalism hi kan ngaisang a, chawisan leh tun din zel chu MNF thil tum a ni tih a sawi a. Kolasib chu bial vannei tak, Minister viak tha tak nei an nih tih hrilhin, ramri buai lai leh hripui len lai pawha bial mipui tan mai ni lo, Zoram pum tana thawh hlawk tak, ei leh barah harsatna awm hauh loa min viltu Supply Minister Pu K.Lalrinliana an nei chu an nihlawh bik tih sawiin, hneh taka thlan tlin leh chu an bat thu kalkhawmte a hrilh.

“Pu Duhoma leh a hote hi kum 30 dawn an kal tawh a, tawngkam chauha kalphung thar an tih hi thil awmze nei lo a ni a, vawiin thlengin anmahni pawhin a hrilhfiahna an la hre lo, pawl hrang hrang 10 zet an din tawh a. MNF chu India sorkarah zalenna sualin kum 20 kan ram mu a, India sorkar nen kan inrem a. Tunah hian mei mit lovin kum 60 chuang kan kal tawh a, keini chuan kalphung thar ni lo, kalphung nghet kan nei sa a ni,” MNF Vice President chuan a ti bawk.

Khualzahawm Supply Minister Pu K.Lalrinliana pawhin ram leh hnam tana martar-te chu thinlung taka a zah thu a sawi a. Vawiina nung dama la awm Ex-,MNA leh PAMRA-te ngaihsan awm a ti a, Mizo Nationalism thinlung pu tak taktute an ni a. Kan ram tana Martar leh rammute kha kan theihtawka chawimawi zel kan ba a ni. Zofate rorelna pakhat hnuaia awm hi vawiin thlengin kan thinlungah a la lian ber reng a ni a ti.

He hun hi Pu Lalzawmmawia, President, MNF East Block Kolasib chuan a kaihruai a, Rev.R.Lalnithanga Venglai Pastor bialtu UPC NEI chuan hunserh a hmang.

Martar-te sun nan minute khat ngawi renga din a ni a, Ex-MNA, PAMRA leh Martar chhungte atangin thusawi ngaihthlak a ni bawk.

Hemi hnu hian Pu Lalkhawsiama In, Forest Tlang, Diakkawn, Kolasib-ah Pu K.Lalrinliana Supply Minister hian MNF-ah mi thar 119 a lawmlut. Lawmluhte hi chhungkaw 41 an ni a, INC chhungkaw 26 leh neutral chhungkaw 15 niin, an vaiin voters-119 an ni.

Sd/-

(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/847
Dt.20.09.2023