“Zirlai tan Social Media hman dan chin tawk hriat a tul” – Prof. F.Lalnunmawia.

Vawiin June 9, Ningani khan Aizawl South III Bialtu MLA Prof. F.Lalnunmawia chuan a bial chhung Aibawk Higher Secondary School tlawhin, kum 2022 HSSLC Result chhuaka an sikul tih ṭhat avangin lawmpuina Thuziak leh Rs.10,000/- a hlan.

Bialtu MLA Prof.Mawitea chuan, “Kum 2022 HSSLC Result chhuakah Aibawk HSS atanga 82.93% in an pass thei hi lawmawm ka ti hle a. Result ṭha nei tura Zirtirtute inpekna hi a hluin, an fakawm takzet a ni.” a ti.

Prof. Mawitea hian zirlaite fuihna thu sawiin, “Zirna hi mihringte min chher puitlingtu a nih avangin ṭhahnemngai leh zuala zir turin kan beisei che u a. Kan tlangdung leh Zoram tihmingṭhatu ni turin vawiina zir mek te hi ka ngen duh che u a ni. Tunlai khawvelah Mizo ṭhalaiten internet an buaipui nasa a, hun tam tak Social Media leh thildangah an khawhral a. Chu chuan zirna kawngah nasa takin a pawt hniam a, heng lakah hian tuna zirlaite hi in fimkhur a ṭul takzet a. In zirna atana ṭulte anih loh chuan internet/social media hman dan tawk in thiam a ṭul hle a ni”a ti bawk.

He hunah hian Aibawk HSS Principal Pu Lalrinmawia Pachuau pawhin thu sawiin, Bialtu MLA Prof.F Lalnunmawia’n kum 2022 HSSLC a result tha tak an neih avanga lawmpuina thuziak leh sum a pe chu lawmawm a tih thu a sawi. “Kan bialtu MLA hian Aibawk HSS te hi min ngaihsakin kan tan a inhawng em em a, kan mamawh te min tihsak ṭhin hi kan lawm takzet a. Bial tana a thawh zelna turah duhsakna sang ber kan hlan a ni” a ti bawk.

Aibawk HSS hi kum 2012 khan din a ni a. Tunah hian zirlai 41 an awm mek. He hun hi Aibawk VC, School Managing Board Member te leh MNF Unit hruaitu ten an hman pui a ni.

Sd/-LALTHAKIMA
Joint Secretary
Media & Publicity Dept
Mizo National Front
Memo No.MNF/Media/ 03/2022/436
Dt.09.06.2022