Mizo National Front
General Headquarters
Mizoram : Aizawl
Press Release
ZAMPUI TLANGDUNG MIZO THALAI PAWLIN TAWHKHAWMNA HMASA BER
DATE 9-11, June 2022 chhung khan Zampui tlang dung Mizo intelkhawm pawl thalai wing (MCYC) intawh khawmna lian hmasa ber chu Hmunpui khuaah neih niin, Zampui tlang dunga Mizote an fuankhawm thahnem hle a ni. He programme-ah hian khuallian atana sawm anih angin Dr.Vanlaltanpuia MLA, Chairman Mizoram Youth Commission (MYC) chuan a telpui.He intawh khawmna lianah hian Manipur leh Mizoram atangin Mizo People Convention (MPC) aiawhin Pute – Lalrinliana President (MPC), K.Laldawngliana (MPC), Lalmuanpuia Punte vice president ZORO leh MZP General Head Quarters atangin Jacob Lalmuanpuia General secretary-ten an telpui a ni.
Mizo convention (MC) hi Zampui tlang dunga Mizo zawng zawngte inzawm khawmna pawl lian ber niin, hnam hrang tam tak inchenpawlhna Tripura State-ah hian chhiatni thatni leh politics thilah pawh Mizote innghahna leh thlamuanpui ber a ni.Tunah hian he pawl hi chak zawka a kal theihna turin thalai pawl (youth wing) din niin a vawikhat nan he intawhkhawmna lian hi neih a ni. Zampui tlang dung hi piputen kum 1904 vel bawrah an dai dar a, tunah hian Mizo khua sawm chuang lai awmin mipui singkhat chuang an awm mek a ni. Heng mipuite hmakhaw ngai hian Mizo convention (MC) hian Zampui Regional Council neih tumin sorkar laipui leh state sorkarah pawh dilna (memorandum) an lo thehlut tawh a ni. He pawl hian hnam issue leh Mizo thlavang hauhnaah a thawh hlawk em em a. Tripura sorkarah pawh hmun pawimawh tak an chang mek bawk.
He programme-ah hian khuallian Dr.Vanlaltanpuia MLA chuan thusawiin, ram leh hnam humhalhna kipui pawimawh ber pakhat chu zirna hi a ni a, a bik takin All India Service leh Central Service-ah dinhmun pawimawh kan luah a tul takzet ani, a ti. “Zampui tlangdungah hian IAS leh Service dangte Mizote hian nei tam zel i la, ram leh hnam thilah nasa takin kan dinhmun kan chawisang thei dawn a ni. Chutiang ni thei tur chuan Zampui thalaite zirna uar leh zual turin ka chah che u a ni. Mizoram atan pawh All India Service leh Central Service-a kan tlin theihna turin Mizoram sorkarin Mizoram Youth Commission kal tlangin Super IAS 40 full sponsorship programme a kalpui mek a ni,” a ti bawk.
He programme hmanga a kal pah hian Dr.Vanlaltanpuia MYC Chairman chuan Laldenga football ground Tuidam te, Sports Academy Kawrthah, Tripura leh Mizoram inrina hmun Thaidawr tlang leh 5th IR batallion duty post Zomuan tlangte tlawh nghalin sipai duty-te nen inkawmna hun hlimawm tak hman an hmang nghal a ni.
Sd/-R.LALHMANGAIHA
Secretary
Media & Publicity Dept.
Mizo National Front
Memo No.MNF/Media/03/2022/440
Dt.13.06.2022