Mizo National Front
General Headquarters
Mizoram : Aizawl

Press Release

VOTER 24 MNF-AH LAWMLUH AN NI

Chhe lailet dera puhna karah pawh Pathianin min hruai zel: Lalruatkima

Vawiin Dt 8.4.2023 hian Pu Lalruatkima Minister, Aizawl West II MLA ni bawk chuan a bial Dawrpui Vengtharah mithar, chhungkaw 8 aṭangin voter 24 MNF-ah a lawmlut.

Pi Vanlalzawni In Dawrpui Vengtharah mithar lawmluhna hun hi hman a ni a. Pu Lalruatkima chuan thusawiin, “MNF chu Mizo nationalism kengtu kan ni a, kan hnam, kan ram leh kan sakhua a him zelna tura thawktu kan ni. Kan innghahna thupui chu Pathian leh kan ram tan, tih a ni a. A chhe thei ang bera thudik ziak tluak lo leh dawt hmangtein beih kan tawk ṭhin a. Sawiselna leh deuna karah pawh kan Pathian chu kan vuan tlat a, chhe lailet dera puhna karah pawh Pathianin min hruai zel a ni,” a ti.

Pu Ruatkima chuan, “Hripui, lirnghing, vawk pul hri, ramri buai leh chhan hrang hrang vangin Zoram hun harsa tak kan tawk a. Pathian hruaina bakah, Pu Zoramthanga ruahman thiamna te, NGO leh kohhran thawhhona avangin kan paltlang thei a. Chhuanchham awm lovin vawiin kan thleng thei a, a lawmawm hle. Tunah chuan hrite a lo ziaawm chho ta a, hmasawnna nasa leh zual he ram tan hian a thleng ngei ang,” a ti a. “Gas kan hnianghnar ta em em a, buhfai lah nise kan chhekkhawl hnekhnuk a, ei leh barah harsatna kan nei ta lo te hi a lawmawm tak zet a ni,” a ti bawk.

Pu Ruatkima chuan, “ZPM leh Congress te hi kan thawh aia thawk ṭha thei an awm chuang lo tih hi a chiang hle. Congress chu kan hre tawh a, ZPM pawh kan hriat sate kha an ni nual hlawm. Tuna an MLA leh AMC Councillor-te pawh hi han en ila MNF nen an danglamna tehchiam a awm lo,” a ti a. “Pu Zoramthanga hnuaiah hian Zoramin hma a sawn nasa em em a, chu chu kan hmu mek a, kan hmu zel dawn bawk a ni,” a ti bawk.

He hun hi Pi Vanlalzawni, Dawrpui Vengthar MNF Unit President-in a kaihruai a ni.

Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.MNF/Media/04/2023/651
Dt 8.4.2023