Mizo National Front
General Headquarters
Mizoram : Aizawl

Press Release

HEALTH MINISTER-IN UPHC, RT-PCR LAB., PICU LEH TRAUMA CENTRE CHAMPHAIAH A HAWNG

Vawiin April ni 26, 2023 (Nilaini) hian Health Minister Dr.R.Lalthangliana chuan Khawzawl District Hospital hmun hma enin Civil Hospital sakna tur a en nghal a. He mi hnu hian UPHC, RT-PCR Lab., PICU leh Trauma Centre Champhaite chu mipui tana hman theih turin a hawng.

Heng hmunahte hian Health Minister chuan vawiinah kan thil tih hian hriselna pawimawhzia a tilang a. “Kan hausakna leh rohlu kan hloh vek anih pawhin engmah kan la hloh tak tak lo; kan hriselna leh nunna kan hloh chuan engkim kan chan a ni,” tih thufing sawiin, covid khan hei hi a tilang chiang hle anih kha. Mizo mipui zawng zawng leh sorkar department zawng zawngten covid kha kan dotlang a, kan thawhhona Pathianin mal a sawm a ni. Covid vangin kum hnih leh tlemte chauh sorkar angin hma kan la tak tak thei chauh a, hma kan la zel dawn a ni. UPHC hi thil ropui tak angin lang lo mahse; a hlut bikna hi sawisen a ni lo, a ti.

“Trauma Centre hi Lungleiah kan hawng tawh a. Champhaiah kan hawng leh hi a lawmawm hle a. Accident chi hrang hrangte leh damlo tam takte tana panna tur atana pawimawh bik a ni, a ti bawk. Champhai Hospital sakna hi kan term hmasa a pawisa kan dah fel tawh, Congress sorkarin a chhunzawm a ni. Kan ram neihte hi uluk deuha kan enkawl a ngai hle bawk. Midangte tana tihtakzeta inpekna hi Health department-a thawkten kan tih tur a ni, a ti bawk.

Health Minister hian Mizoram District 11 awmah, hmun danga awm ve lo Critical Care Block (CCB), cheng nuai 2000 chuang kengtel, hmanraw changkang tak taka thuam tur chu Champhai District-in an hmuh tur thu a sawi a. Kumin inthlan hma ngei hian a lung phum hman anih tur thu a sawi. Khum pawh 50 a kengtel bawk ang tiin, Champhaia Nursing College pawh a remchang hmasa bera function tir anih tur thu a sawi bawk.

Law Minister Pu TJ.Lalnuntluanga pawhin thusawiin, vawinna he hun hman theihna tura hmalatute hnenah lawmthu a sawi a. Health Minister, Health department-a thawktute, khawtlang hruaitute leh Dr.ZR.Thiamsanga MLA hmalaknaah lawmthu a sawi. Hmasawnna hrang hrang hian amah a tihlawm thu a sawi. Champhaiah Pu Zoramthanga kaihhruaina hnuaia hmasawnna hrang hrangte a sawi a. Tunlai Zoram khawvelah chuan mi hmalakna sawi chhiat hi a lansarh thin thu a sawi a, hmasawnna tur tam tak leh beiseina eng mipuiah kan pek a pawimawh zawk thu a sawi. Pu Zoramthanga kaihhruai sorkar hian hmasawnnaah Champhai District a ngaihthah loh avangin lawmthu a sawi a, Champhai hi khawchhak lama kan unaute tan an Jerusalem anih avangin hmasawnna hrang hrangah tan lak zel a pawimawh thu a sawi bawk.

Health & Family Welfare Board Vice Chairman, Dr.ZR.Thiamsanga, MLA pawhin vawiina hun hman theihna tura thawktu zawng zawng chungah lawmthu a sawi. Vawiina kan thil tawn hi thil chhinchhiah tlak, khawtlang leh ram tan thil pawimawh em em a ni. Covid-in kum hnih chhung min tibuai a, ram leh hnam tan kum hnih chhung kan in volunteer a. Engmah ti lo ang maia tuten emaw social media-ah min puh thin hi na ka ti takzet a ni. Kan Chief Minister, Minister leh MLA-ten theihtawp kan chhuah vena min haider sak tlat a, kan sorkar hi a awm mai mai lo a ni, a ti.

RT-PCR Lab hi a funding minor work, DHME atangin a ni a. Ni 10.01.2022 a thawh tan kumin April ni 6 a thawh zawh a ni. A khawl tak hi lei a ni lo a, room hrang hrang chei nan cheng nuai 21 hman a ni. PICU hi central sorkar fund, emergency covid response package II atangin cheng 14,40,000.00 sen a ni. NHM atanga thawh a ni, a hmanrua zawng zawng awm sa a ni. Trauma Centre hi LB Associates Pvt.te thawh cheng nuai 80.83 man a ni a, a area chu 2250sqft a ni a. Kum 2019 a thawh ta, kumin April ni 3 a thawh zawh a ni.

RT-PCR Lab, PICU & Trauma Centre hawnna inkhawm hi Pi Esther Lalruatkimi Principal Secretary H & FW department chuan a kaihruai. Rev.H.Lalrinmawia, Director, Synod Rescue Home Champhai chuan hunserh a hmang a, Pu Lalfakzuala Sr. EE H & FW chuan technical report a pe a, Dr.PC.Lalramliana, Principal Director H & FW department chuan lawmthu sawiin hun a khar.

Minister hi Pu T.J.Lalnuntluanga Minister, Dr.ZR.Thiamsanga MLA, Dr.Lalrinchhana, DC Champhai, SP Champhai leh official thahnem takin an lo dawngsawng a ni.

Health Minister hi Pi Esther Lalruatkimi Principal Secretary, H & FW, H & TE; Dr.PC.Lalramliana Principal Director, H & FW; Pi Sangchhin Chinzah Director, H & TE; Dr.Vanlalsawma Director, DHS; Dr.Lalmalsawmi Sailo Director, H & ME; Dr.Eric Zomawia, MD, NHM; Pi Lalsangpuii Addl.Director, C & I (Commerce Dept.); Dr.Zarzoliana Addl.Director, SPD, RUSA; Pu Lalfakzuala Sr. EE, H & FW; Pu Ronald Lalchhuanawma Deputy Director, C & I; leh Pu Joshua Lalthakima Asst.Engineer, RUSA-ten an tawiawm a ni.

Sd/-

(R.LALHMANGAIHA)
Secretary
Media & Publicity Dept
Mizo National Front
Memo No.MNF/Media/04/2023/675
Dt.26.04.2023