Mizo National Front
General Headquarters
Mizoram : Aizawl

Press Release

Politics-ah rilru dik leh hrisel put hi a har lai ber a ni a; malsawmna dawng tur chuan rilru dik leh hrisel put ngei ngei a ngai thung

Covid do nan khan budget-a awm lo cheng nuai hlir nuai singhnih chuang kan hmang
– Dr.R.Lalthangliana, Health Minister

Vawiin May ni 29th, 2023 (Thawhtanni) hian Convention Centre, Lungleiah MNF Sub-Headquarters Lunglei huaihawtin ‘THAWKTUTE INFUIH THARNA LEH MI THAR LAWMLUHNA HUN’ hman a ni a.

Dr.R.Lalthangliana Minister, H & FW; H & TE, C & I chuan MNF party zawm thar Zobawk, Lunglei ‘E’ leh ‘W’ Tuipui atangin INC, BJP, ZPM leh Neutral atangin voters -942 te chu MNF-ah a lawmlut.

Lawmluh paha thusawiin Dr.R.Lalthangliana Minister chuan MNF lo Indin dan leh nih phung a sawifiah hmasa a, Golden Jubilee lawm tawh, hming la thlak ve lo, ‘Pathian leh kan ram tan’ titu party awm chhun kan ni a ti. “Politics-ah chuan hman deuha hlim kha an hlim reng lo tih alang thin. Tunah pawh ziaka awm chhuifiah ngam, mi 942 zet kan inlawmlut leh a, a lawmawm hle. Lunglei District operation kan hawnna niah ka puang nghal a, hei hi chu aitechhinna chauh a la ni a, kan la inlawmluh belh zel dawn a ni. Kum 30 zet MLA ka ni ve tawh a, tuna kan Chief Minister Pu Zoramthanga kaihruaina hnuaia MLA-te hi kan lungrual em em a, tun ang tluka bial vil tha leh taima MLA an awm ka la hre ngai lo. Pathian leh mipui zarah Pu Zoramthanga kaihhruaina hnuaiah MNF hi kan sorkar leh ngei dawn a ni,’ a ti.

Politics-ah chuan rilru dik leh hrisel put chu a harsa lai ber ani tiin, malsawmna dawng tur erawh chuan rilru dik leh hrisel put ngei ngei a ngaih thu a sawi a. “Min beitute min beihna, Pu Zoramthanga kaihhruai sorkarin engmah tilo ang maia min chhuah hi pawm loh thiam mai tur. Kan thil tih leh hmasawnnate hi kan mitin kan hmuin kan hre vek. Hei hi party ngial nghet MNF leh Congress chuan kan sawi ngai lo a, a ti thintute hi rilru hrisel lo, party ngial nghet lote an ni ang,” a ti bawk.

Health Minister chuan ” Kum 30 dawn MLA ka lo ni ve ta a, tuna India ram Health Minister-ah hian ka senior ber a, India rama Commerce & Industry Minister meeting-na thlengin a tel zing ber ka ni ang. He ta an sawi zin ber chu state tinah development leh sorkar hna lak kawngah tun thlengin covid khan min la nghawng zel a ni. Mizoramah pawh Covid do nan khan budget-a awm lo, cheng nuai hlir nuai singhnih chuang kan hmang a, Health Minister ka nihna angin an ziah tel loh pawh ka hmu nual,” a ti bawk.

Pu Lalrintluanga Sailo MLA, Dy. Govt.Chief Whip, Mizoram chuan, “LMC leh Zemabawk VC by- election kha awm lo se, kumin kum tawp inthlan hian MNF hi kan tla palh mai thei. LMC-a kan tla kha Pathianin min ben harhna a ni a, a lawmawm hle. Social Media-ah ZPM-ten dawta sual tinrengin MNF min hek a, MNF worker-te insawifiah ve lovin kan ngawi mai mai a. Tunah chuan dawt leh sual tinrenga min heknate chu sawifiah vein, Zoram kan hmangaihna thu thlengin kan tlangaupui ve ta a. Tunah chuan LMC-a kan tlak zawih zawihna bialah kan inlawmlut ruih ruih a ni. Arabian sea hleuh kai anga insawi ZPM hotupa Pu Lalduhoma hi Alzheimer natna a nei em ni tih hi vawiina chanchinbu mite kaltlang hian ka zawt a. Nu chhula piangah tumah Arabian sea hleuhkai an la awm lo. Alzheimer a nei lo anih erawh chuan kalphung thar awmze neilo tlangaupui fo a, Super CM candidate nih tum hi rak rak tawh lo turin ka chah nghal a ni,” a ti.

Lunglei High Power Committee Vice Chairman, Pu Lawmawma Tochhawng MLA pawhin hmuh theih leh khawih theiha hmasawnna hi rilru hrisel put loh chuan ralna leh tawpna a ni a. MNF-te chu material development-ah chauh innghat lo i la; rilru hrisel leh thianghlim, kan chenpui leh thenawm khawvengten keimahniah ataka an hmuh theih ngeina turin rilru dik leh hrisel i pu tlat ang u, a ti bawk.

Pu Vanlalhmuaka President, MNF Sub-Headquarters Lunglei pawhin he hunah hian thu a sawi a. Lawmluhte atanga thu sawi ngaihthlak a ni bawk.

Martar-te sun nan ngawi renga minute khat chhung hun hman a ni a. Pu C.Chawngthanmawia Vice President chuan inkhawm hi kaihruaiin, Upa R.Tawnliana chuan hunserh a hmang a. Pu F.Lalneihtluanga Treasurer chuan lawmthu sawiin hun a khar.

Sd/-

(R.LALHMANGAIHA)
Secretary
Media & Publicity Dept
Mizo National Front
Memo No.MNF/Media/04/2023/721
Dt.29.05.2023