SPORTS HMASAWNNA MITE MAK TIH KHAWPIN A NASA

Thu dik chanve leh thubelhchian dawl lo hmangin MNF sorkar Pu Zoramthanga kaihhruai chuan beih a tawk mek zel a. Engmah thawk tak tak lo ang hialah Party thenkhat phei chuan sorkar an chhuah hial a. Thil hrechiang lo leh zir chiang lote bum tuma hmanhlel an awm mek lai hian Mizoram chuan hripui lengin a tibuai chung pawhin hma a sawn mek zel a. Tun tumah hian Pu Robert Romawia Royte Minister of State enkawl department Sports & Youth Affairs bik ringawta hmalakna kan thlir dawn a ni.

Kan sports minister hi a chet that em avangin Opposition tan chuan thik tham niin, thu belhchian dawl lo leh rinthu nen an bei chiam chiam mai thin a. Thudik erawh alo lang chhuak leh thin a, Assembly House chhungah ngei pawh Pu Lalduhoma, ZPM MLA chuan Zoram mipui hriatah ngaihdam hial a dil a ngaih phah a nih kha.

Hengte avang hian a mimalah thlur bingin Office of Profit hmanga bei lehin rinthu nasa takin an bawl phuan a, a ban hial te an phut a nih kha. Mahse, an beihna chu thu belhchian dawllo a nihna alo lang zel a. Thudik chu a ding chang zel a ni.

Minister chak, a chan Department te hneh taka enkawl thin, a hmalakna zarzo duh ve a, bial tin deuh thawin an auhrawn tlak kan nei hi MNF chuan kan chhuangin, a hnathawh ropui tak tak, abik takin thalaiten hmasawnna kawng ke an penna tura ruhrel tam tak hluitu, a neih ang ang midang tana ui ngailotu hi fakawm kan ti takzet a. Mizoram tana a ngaihna hretu hi, a ngaihna hretu a nih chhunzawm zel pawh kan beisei tlat a ni.

Sport lama hmasawnna thenkhat i han thlir teh ang:

1. Mizoram State Sports Policy 2019 : MNF Manifesto tihlawhtlingin Mizoramin a la neih ngaih loh Sports Policy tha tak chu sorkar atanga kum 1 ral hmain peih fel a, hman nghal a ni.

2. Sports Industry Status pek a ni : India rama vawi khat nan Mizoram sawrkar chuan Sports chu industry nihna a pe a. Private Companies te leh sumdawng mite tan pawh sports hmasawnna atan kawng zau zawkin a inhawng ta. Tunah chuan sport facility tam tak eg : Futsal ground etc. pawh mimalin an din a, eizawn nan an hmang ta a ni.

3. 5% Reservation for Sports persons : Group B non – gazetted hnuai lam hna nghet a direct recruitment-ah sports thiam bikte pualin 5% reserve a ni a. Qualified tho si, sports person ten an inchuh tur a ni.

Hmawsawnna ruhrel din:

Tun kum 4 leh a chanve chhunga sports infrastructure din nana Mizoram SYS Deptt. Sum dehchhuah hi a ropuiin a chhuanawm takzet a. Central atanga sum an haichhuak tam hle a, DPRs tam tak siam a nih avangin leh nachang hre taka a changtu Minister leh Deptt ten an umzui avangin mipui mak tih khawpin sports infrastructure ropui tak tak kan nei thei ta a ni.

1. Residential Sports School : Lehkha zir chunga sports thei bikte training-na tur Sports School 5 chu PMJVK atangin sanction a ni a, a 5 hian Rs 16751.70 lakh a sak zawh tur niin, 70% vel zawh tawh a ni. Sports School sak mek te chu Mamit Rs 3286.34 lakh, Kawrthah

Rs 3286.34 lakh, Lawngtlai Rs 3461.70 lakh, West Phaileng Rs 3286.34 lakh leh Lunglei Rs 3430.98 lakh te a ni.

2. Community Service Centers : Community Service Centers 7 @ Rs 140 lakh per centre sanction a ni a, 3 chu sak zawh tawh niin, a dang 4 te pawh 90% vel chu zawh tawh a ni bawk. Kawng hrang hrangah a tangkai leh dawn a ni.

3. Phullem Fields : Tunlaia thalaite duh leh mamawh em em chu Phullem field hi a ni. Tun term chhunga sak tura ruahman 30 zet zinga 21 hi Sports Deptt hmalaknaa thawh a ni a, 14

zawh tawh niin 7 thawh mek a ni. (UD&PA leh Aizawl Smart City in 9 an thawk bawk) State budget sum ni lo, Central suma heti zat thawh theih hi a chhuanawm hle a ni. Phullem field atan SYS Deptt in sum a thawhchhuah zat chu Rs 12,000 lakh a ni.

4. Mizoram Sport Policy-in a sawi angin Sports Complex 3 sak mek a ni a. Lunglei Rs 4919.31 lakh, Lawngtlai Rs 5019.43 lakh leh Mamit Rs 4496.19 lakh te a ni. Facilities tha tak tak a awm avangin Mizoram sports hmelhmang tidanglam dawrh tura ngaih a ni. Mizoram mamawh em em Athletic track, Sports Hostel, Futsal, Volleyball, Basketball, Tennis Courts, Halls etc a awm ang.

5. Hostels : Thalai ten hostels an mamawh a, SYS Deptt hian hostel tha tak tak 4 an sa mek a, Rs 282.80 lakh man zel a ni.

6. Basketball, Volleyball Courts : Standard Facility vek niin 100 chuang siam a ni. Heng hnathawh nan hian state budget pawn atangin Rs 3700 lakh chuang thawhchhuah a ni.

7. Futsal Ground : Dedicated Semi-Indoor Futsal Ground 2 siam mek a ni a, heta tan hian Rs

637.31 lakh, Central atangin hmuh a ni.

8. Hockey Synthetic Ground : Mizoram mamawh em em Hockey Synthetic Ground 2 siam mek a ni a. Lunglei-ah leh Muallungthu (Aizawl) ah Rs 1500 lakh chuang senga siam a ni.

District Sport Complex te leh Sports School te hian Indoor Halls a ken tel bakah infiamna Halls eng emaw zat siam a ni bawk.

SYS Deptt hian hmasawnna hna tam tak a thawh rual hian GST leh labour cess tam tak thawkchhuakin sawkar sum bawma sum chhung luttu lian tak a tling a ni.

C. SPORT PROMOTION :

Tun kum 4 leh a chanve chhung hian kum 2 chhung Covid vangin competition mumal a awm thei lo va. Hun tha rei lote kan neih chhunga Mizoram Sports Person te achievement erawh a ropui hle.

Hockey-ah Lalremsiami Hmar a parvul a, Olympics-ah 4-na a ni thei a. Jeremy Lalrinnunga’n Commonwealth Games-a Gold Medal a lak avangin sorkarin in hmun a pe a, Remsiami pawh in hmun leh sorkar hna a pe bawk.

Sports discipline hrang hrangah hmasawnna ropui tak tak kan hmu a. Badminton, Basketball, Football, Volleyball, Racing, Contact Sport hrang hranga Mizoram hmasawnna hi rin sen chi pawh a ni lo hial zawk.

Mizoram Budget pawn atangin:

Mizoram budget pawnlam atanga Sports Deptt sum thawh chhuah pawh hi a tam khawp mai. Rs 2600 lakh vel annual plan sum nei siin Rs 45000 lakh chuang a thawk chhuak hem mai. Asset hlu tak tak a siam bakah GST leh Labour cess atangin sum tam tak Sorkar-ah ala chhunglut cheu bawk.

Issued by Media &_Publicity Department_

MNF, General Headquarters, Mizoram; Aizawl_